Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, сағлам организм һәлә инсан дүнја ҝәлмәмишдән өнҹә, ана бәтниндән башлајыр. Белә ки, ушағын һансыса хәстәликлә дүнјаја ҝәлмәси сонрадан мүхтәлиф проблемләрә јол ачыр вә һәтта бәзи хәстәликләрин мүалиҹәси үчүн узун заман тәләб олунур. Ушагларда мүшаһидә олунан хәстәликләрин јаранма сәбәбинин ашкарланмасы илә јанашы, онун мүалиҹәси дә мүһүм әһәмијјәт кәсб едир. Сон заманларда јени доғулан ушагларда невроложи хәстәликләр ҝениш һал алыб.
Баш педиатр Нәсиб Гулијев ачыгламасында билдириб ки, ушағын бу хәстәлији јашамамасы үчүн она дүзҝүн гуллуг лазымдыр.
“Невроложи хәстәликләрин јаранмасында бир сыра факторлар вар ки, онлар да ушаг доғулдугдан сонра гыса мүддәт әрзиндә ашкара чыхыр. Гејсәријјә әмәлијјаты илә дүнјаја ҝәлән ушагларда бу хәстәликләр даһа чох мүшаһидә олунур. Невроложи хәстәлијин јаранмамасы үчүн ән јахшы үсуллардан бири ушагларын тәбиәт гојнунда вахт кечирмәсинә шәраит јаратмагдыр. Тәбии олан истәнилән мәфһум ушаға мүсбәт тәсир едир”.
Педиатр Вагиф Гарајев исә билдирир ки, невроз даһа чох конфликтли аиләләрдә раст ҝәлинир.
“Ушаг валидејндән психоложи вә ја емосионал шиддәт ҝөрүрсә, бу мүтләг шәкилдә онун әсәб системиндә из гојур. Мүәјјән јашдан сонра бу психоложи зәдә ушағын давранышларында өзүнү ҝөстәрир. Белә ки, ушаг ја чох агрессив олур ја да өзүнә гапаныг олуб коллективлә үнсијјәтдә чәтинлик чәкир. Һамиләлик дөврүндә гадын чох стресс јашајырса бу һеч шүбһәсиз ки, дөлүн инкишафына тәсир едир. Педиатрлар ушағын ана бәтниндә јарандығы андан етибарән һамиләлијин ҝедишаты һаггында мәлумат топлајырлар. Невроза сәбәб бәзи һалларда ананын һамиләлик просесиндә стресс јашамасы, евдә аилә үзвләри илә олан анлашылмаз мүнасибәтдир. Әҝәр ушағын мәркәзи синир системиндә органик бир проблем јохдурса, јәни тибби мүдахилә тәләб едән бир сәбәб мөвҹуд дејилсә, о заман проблемин сәбәбини ушағын әтраф мүһитиндә ахтармаг лазымдыр. Психоложи, емосионал тәсир варса, бунлар арадан галдырылмалыдыр”.
Диггәт: Хәбәрдән истифадә етдикдә мәнбәјә истинад лазымдыр
