Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Мүсәлман Бирлији Һәрәкатынын сәдри Тале Бағырзадә, АХҸП сәдринин мүавини Фуад Гәһрәманлы вә диҝәр 16 нәфәрин барәсиндәки һөкмдән верилән апеллјасија шикајәти иҹраата ҝөтүрүлүб.
Бу барәдә Тале Бағырзадәнин вәкили Јалчын Иманов мәлумат вериб. Вәкилин сөзләринә ҝөрә, апеллјасија шикајәти үзрә мәһкәмә просеси һаким Әмир Бајрамовун сәдрлији илә кечириләҹәк.
Гејд едәк ки, 2015-ҹи илин нојабр ајынын 26-да Нардаран гәсәбәсиндә кечирилән әмәлијјатдан сонра сахланылан Тале Бағырзадә, Фуад Гәһрәманлы вә диҝәр 16 нәфәрә гаршы һакимијјәти зорла әлә кечирмә, террорчулуг вә гәсдән адам өлдүрмә маддәләри үзрә иттиһамлар ирәли сүрүлүб. Әмәлијјат вахты баш вермиш силаһлы гаршыдурмада ики полис әмәкдашы да дахил олмагла 6 нәфәр өлдүрүлүб. Мүттәһим тәрәфи исә һакимијјәти тәнгид етдикләринә ҝөрә, һәбс олундугларыны билдирирләр. Бакы Ағыр Ҹинајәтләр Мәһкәмәсинин һөкмү илә Тале Бағырзадә 20 ил, Аббас Һүсејн 20 ил, Фуад Гәһрәманлы 10 ил, Расим Ҹәбрајылов 17 ил, Закир Мустафајев 14 ил 6 ај, Ҹаббар Ҹаббаров 19 ил, Ҹаһад Бабакишизадә 14 ил 6 ај, Шамил Абдуләлијев14 ил 6 ај, Агил Исмајылов 14 ил 6 ај, Рамин Јаријев 10 ил, Аббас Гулијев 14 ил 6 ај, Ибраһим Худавердијев 14 ил 6 ај, Етибар Исмајылов 14 ил 6 ај, Бәһруз Әскәров 14 ил 6 ај, Әли Нуријев, Әлибала Вәлијев, Фәрһад Балајев 14 ил 6 ај, Аббас Тағызадә 14 ил 6 ај азадлыгдан мәһрум едилибләр. Бир сыра јерли һүгуг мүдафиәчиләри вә бејнәлхалг тәшкилатлар Тале Бағырзадә вә диҝәрләрини сијаси мәһбус олараг таныјыб.
Диггәт: Хәбәрдән истифадә етдикдә мәнбәјә истинад лазымдыр
