Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, һазырда карсда сахланылан бөјүк әхлаг устады Мөвсүм Сәмәдовун дәрсләриндән 5-ҹи һиссәни охуҹуларына тәгдим едирик. Бу дәфә ки, дәрсдә Доктор Сәмәдов вәтән анлајышындан вә вәтән севҝисиндән данышыб.
Вәтән – бир милләтин илләр боју јашадығы, адәтинин, әнәнәсинин, варлығынын, шүурунун, бирлијинин, торпағы илә бирләшдији мәкандыр. Елә бир мәкан ки, ана гуҹағы кими исти, ата гојну кими әмин вә етибарлыдыр. Вәтән садәҹә мүәјјән сәрһәдләри олан ҹоғрафи бир мәкан дејилдир. Вәтән хүсуси севҝи вә һөрмәтә лајиг мүгәддәс торпагдыр. Биз вәтәнин сујуну ичир, чөрәјини јејир вә һавасыны удуруг. Евимиз, кәндимиз, обамыз бу торпаглардадыр. Ата вә бабаларымыз бу торпагларда ујујур.
Вәтәни бизим үчүн мүгәддәс едән нәдир? Ахы гуруҹа торпаг неҹә мүгәддәслик дашыја биләр? Демәк, бизим үчүн ону мүгәддәс едән нәснәләр вар. Бу нәснәләр исә ата-бабаларымызын бу торпагда јашамыш олмасы, ону беҹәрмәси, горумасы вә уғрунда вурушмасыдыр. Онлар бу торпаглар уғрунда ҹанларындан кечмиш вә шәһидлик рүтбәсинә гәдәр јүксәлмишләр. Вәтәни вә вәтәндашы севмәк бөјүк бир әхлаги кејфијјәтдир. Динимизин әмри, уҹа Рәббимизин разы галдығы әмәлдир.
Һәдисләрдән бириндә “Вәтәни севмәк Аллаһа имандандыр” дејә бујурулмуш вә вәтән севҝисинин әһәмијјәти өн плана чәкилмишдир. Гәлбиндә Аллаһа иманы олан һәр бир кәсин өз халгына вә вәтәнинә дә севҝиси олаҹагдыр. Һәдисләрин бириндә вәтәни горумағын әһәмијјәтини билдирән әзиз Ислам Пејғәмбәри (с) белә бујурмушдур: “Сәрһәд бојунҹа вәтәни горујан ҝөзләр ҹәһәннәм атәшиндән аманда галар вә Аллаһын разылығы үчүн вәтән сәрһәдләрини горујанлара даим саваб јазылар.”
Диггәт: Хәбәрдән истифадә етдикдә мәнбәјә истинад лазымдыр
