Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, вәкил Јалчын Иманов 27 март тарихиндә 12 сајлы Ҹәза Чәкмә Мүәссисәсиндә Азәрбајҹан Ислам Партијасынын лидери Доктор Мөвсүм Сәмәдовла ҝөрүшүб.
Бу барәдә Јалчын Имановун өзү мәлумат вериб. Мүвәккилинин сәһһәтинин јахшы олмадығыны, әһвал руһијјәсинин исә нормал олдуғуну сөјләјән Јалчын Иманов, Мөвсүм Сәмәдовун аиләси илә телефон әлагәси јаратмаг вә ҝөрүшмәклә бағлы проблем јашадығыны билдирди.
Јалчын Иманов Мөвсүм Сәмәдовун март ајынын 18-и 3 ҝүнлүк карса салындығыны билдириб: “Карсерә салынма сәбәби исә баракда намаз гылмасы бәһанә едилиб. Март ајынын 20-си ҝеҹә саатларында карсердә оларкән гоншу карс отағына һәбсхана ишчиләри мәһбуслардан бирини ҝәтирәрәк дөјмәјә башлајыблар. Мөвсүм Сәмәдов билдирир ки, мәһбусу елә бир формада дөјүрдүләр ки, сәси бүтүн тәҹридхананы бүрүмүшдү. Доктор Сәмәдов буна етираз олараг гапыны дөјәрәк мәһбусун дөјүлмәсинин дајандырмасыны истәјиб. Март ајынын 21-и сәһәр тездән Мөвсүм Сәмәдов һәбсхана рәһбәри Рауф Мәммәдовун јанына апарылыб вә барәсиндә 2 ајлыг камера типли отаг ҹәзасы чыхарылыб. Камера типли отаг карсдан бир гәдәр фәргләнир, мүәјјән бир ҹәза нөвүдүр вә 2 ајдан 6 аја гәдәр мәһбуслар барәсиндә верилә билир.“
Мөвсүм Сәмдовун сәһһәтиндә проблемләрин олдуғуну сөјләјән Јалчын Иманов, АИП лидеринин ајаг дамарларындакы варикоз хәстәлијиндән әзијјәт чәкдијини билдирди: “Белә хәстәләрин даима һәрәкәтдә олмасы зәруридир ки, Мөвсүм Сәмәдова бунун үчүн шәраит јарадылмыр. Имкан вермирләр ки, зона чыхараг һәрәкәтдә олсун.”
12 сајлы ҸЧМ-нин рәиси Рауф Мәммәдовла ҝөрүшдүјүнү билдирән Јалчын Иманов бунлары сөјләди:
“Рауф Мәммәдовдан Мөвсүм Сәмәдова гаршы бу ҹүр гәддар мүнасибәт сәрҝиләнмәсинин сәбәбини сорушдум. О, Мөвсүм Сәмәдовун јенидән Гобустан Һәбсханасына ҝөндәрмәк үчүн јени әсасларын јарадылмасыны инкар еләмәди вә тәсдигләди. Рауф Мәммәдов һәмчинин нә гәдәр ҝүлмәли олса да баш верәнләри онунла әсасландырды ки, Мөвсүм Сәмәдов ҝуја Азәрбајҹан дөвләтини севмир. Онун дедикләриндән белә чыхыр ки, Мөвсүм Сәмәдов Азәрбајҹан Дөвләтини севмәдији үчүн ардыҹыл олараг карса салыныр.”
Вәкил сонда мәтбуат васитәсилә Гырмызы Хач Комитәсинин Бакы нүмајәндәлијинә, Омбудсман Апаратына, Әдлијјә Назирлији јанында Ҹәза Чәкмә Мүәссисәләринә Нәзарәт Комиссијасына вә һүгуг мүдафиәчиләринә мүраҹиәт едәрәк, Мөвсүм Сәмәдова гаршы баш галдырмыш ганунсузлугларын арашдырылмасы вә онун сәһһәтинин нәзарәтиндә сахланмасы үчүн 12 сајлы ҸЧМ-нә баш чәкмәләрини истәди.
Карса салынма сәбәбинин намаз гылмасы илә бағлы олдуғуну сөјләјән вәкил, “бәһанәләри дә бу олуб ки, “барак”да намаз гылмагла ҝуја дахили интизам гајдаларыны позуб вә антисанитарија шәраити јарадыб. Һалбуки дахили низамнамәдә белә бир шејә ҝөрә, һәр һансы бир ҹәза нәзәрдә тутулмур” – дејә билдириб:
Вәкили ону да гејд етди ки, Мөвсүм Сәмәдов танынмыш руһани алим, Азәрбајҹан Руһаниләр Мәҹлисинин үзвү Шејх Сәрдар Һаҹыһәсәнлинин һәбсинә мүнасибәт билдирәрәк онунла бағлы баш верәнләри писләјиб: “Мөвсүм Сәмәдов билдирди ки, Шејх Сәрдарын һәбси бүтүн азадлыгсевәр вә инанҹлы инсанларын һаглы етиразына вә һиддәтинә сәбәб олуб. Руһани алимләрин фәалијјәтинә гојулмуш мәһдудијјәтләр вә јарадылмыш манеәләр ҹәмијјәтин тәрәггисинә һәмишә мәнфи тәсир ҝөстәрир. Буну биз кечмиш совет режиминин симасында чох ашкар формада мүшаһидә еләдик. Үмид едирәм ки, мүбариз гардашымыз Шејх Сәрдарын ганунсуз һәбси иҹтимаијјәтин бир даһа етиразына сәбәб олаҹаг. Бизләр дә өз нөвбәмиздә ҝүнаһсыз инсанларын һәбсинә сон гојулмасыны истәјирик.”
Хатырладаг ки, М. Сәмәдов 2011-ҹи илин јанвар ајында партијанын баш мәҹлисиндә һакимијјәт әлејһинә сәрт чыхыш етдикдән сонра һәбс олунуб. О, бир нечә ағыр ҹинајәт маддәләри илә иттиһам едиләрәк 12 ил мүддәтинә азадлыгдан мәһрум едилиб. Мөвсүм Сәмәдов танынмыш јерли вә хариҹи Һүгуг Мүдафиә Тәшкилатлары вә һүгуг мүдафиәчиләри тәрәфиндән сијаси мәһбус кими таныныр.
Диггәт: Хәбәрдән истифадә етдикдә мәнбәјә истинад лазымдыр
