Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, “Мүсәлман Бирлији” Һәрәкатынын сәдри, илаһијјатчы Тале Бағыров-ун һәбсиндән сонра дүнјаја ҝәлмиш оғлуна доғум һаггында шәһадәтнамә верилмир. Кечән јај доғулан ушаг һәлә дә дөвләт гејдијјатына алынмајыб. Буна ҝөрә дә илаһијјатчынын һәјат јолдашы Лејла Исмајылзадә мәһкәмәјә мүраҹиәт едиб. Бу мәсәләјә 1 сајлы Бакы Инзибати-Игтисади Мәһкәмәсиндә бахылыр.
Лејла Исмајылзадә иддиа әризәсиндә ҝөстәриб ки, Талеһ Бағыровла бирҝә никаһдан олан үчүнҹү оғлу ијулун 25-дә дүнјаја ҝәлиб. Ушаға “Әбүлфәзлаббас” ады верилиб вә доғум һаггында шәһадәтнамә алмаг үчүн Јасамал рајон Гејдијјат Шөбәсинә мүраҹиәт едиб. Амма шөбәнин рәиси Илаһә Әләсҝәрованын имзасы илә имтина мәктубу алыб.
“СИЈАҺЫДА БУ АД ЈОХДУ”
“Азәрбајҹан Милли Елмләр Академијасынын Әдәбијјат Институту тәрәфиндән төвсијә олунан адлар сијаһысында “Әбүлфәзлаббас” ады мөвҹуд дејил. Ҝөстәриләнләрә әсасән, өвладыныза “Әбүлфәзлаббас” адынын верилмәси мүмкүн дејил”, – мәктубда белә јазылыб.
“Азәрбајҹан Конститусијасы вәтәндашын шәхси вә аилә һәјатына мүдахиләни гадаған едир. Ејни заманда, Авропа Конвенсијасы да шәхси вә аилә һәјатына сајгы нәзәрдә тутур. Аилә Мәҹәлләсинә ҝөрә, ушаға ад валидејнләринин разылығы илә верилир. Дөвләтин мүәјјәнләшдирдији гајдалара ҝөрә, ушағын мәнафејинә хәләл ҝәтирә билән, ҹинсинә ујғун ҝәлмәјән вә ја ҝүлүнҹ адларын гојулмасына јол верилмир. Бизим ушаға вердијимиз ад исә бу категоријаја аид едилә билмәз”, – Лејла Исмајылзадә билдириб.
Иддиа әризәсиндә мәһкәмәдән дә хаһиш едиб ки, Јасамал Рајон Гејдијјат Шөбәсинин үзәринә ушаға “Әбүлфәзлаббас” ады верилмәси вәзифәсинин гојулмасы һагда гәрар чыхарылсын.
Хатырладаг ки, Тале Бағыров 2015-ҹи ил нојабрын 26-да Илһам Әлијевин бирбаша нәзарәти алтына ДИН әмәкдашларынын Нардаран гәсәбәсиндә кечиртдикләри ганунсуз әмәлијјат заманы сахланылыб. Һәмин әмәлијјатда икиси полис олмагла, 6 мүлки вәтәндаш ДИН-ин әмәкдашлары тәрәфиндән Шәһид едилибләр. Рәсми билҝиләрә ҝөрә, 70-дән чох адам һәбс едилиб (һүгуг мүдафиәчиләринин сијаһысында бу рәгәм 87 ҝөстәрилир). Даһа јүнҝүл маддәләрлә иттиһам едиләнләрин мәһкәмәси баша чатыб. Һәмин шәхсләр 1 ил 6 ајдан 6 ил 6 ајадәк һәбс ҹәзасы алыблар.
Тале Бағыров вә даһа 17 нәфәрин мүһакимәси исә давам едир. Прокурор Талеһ Бағырова өмүрлүк, галанларына исә 10 илдән 20 илә гәдәр һәбс ҹәзасы истәјиб.
Тәгсирләндириләнләр иттиһамлары рәдд едир, һәбс олунаркән вә ондан сонра ДИН-ин Баш Мүтәшәккил Ҹинајәткарлыгла Мүбаризә Идарәсиндә ишҝәнҹәләрә мәруз галдыгларыны, бу јолла онлардан јалан ифадә алындығыны билдирирләр.
Диггәт: Хәбәрдән истифадә етдикдә мәнбәјә истинад лазымдыр
