Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Јени Азәрбаjҹан Партиjасы (ЈАП) иҹра катибинин мүавини, Милли Мәҹлисин депутаты Мүбариз Гурбанлы партиjанын рәсми саjтына мүсаһибәсиндә Азәрбаjҹанын мүхалифәт партиjаларынын Крыма сәфәр етмәк ҹәһдинә мүнасибәт билдирәркән деjиб: “Һансыса партиjа нүмаjәндәләринин Крыма ҝетмәк ҹәһди садәҹә пиар кампаниjасындан башга бир шеj деjил.”
М.Гурбанлы геjд едиб ки, һәмин бөлҝәдә вәзиjjәт һәр кәсә бәллидир: "Әҝәр Крыма АТӘТ-ин нүмаjәндәләри бурахылмырса, ҝедиш-ҝәлиш там нәзарәтә ҝөтүрүлүбсә вә буну билә-билә кимләрсә Крыма ҝетмәjә ҹәһд ҝөстәрирләрсә, тәбии ки, бурада пиар кампаниjасынын елементләри ҝөрүнмәкдәдир. Јәгин ки, Мүсават Партиjасындан олан һәмин адамлар jола чыханда онларын һәмин әразиjә бурахылмаjаҹағыны дәгиг билирдиләр. Чүнки геjд етдиjим кими, Крыма һәтта Гәрби Украjнадан ҝәлән адамлары бурахмырлар".
Онун сөзләринә ҝөрә, НАТО-нун үзвү вә Русиjа илә jахшы мүнасибәтләри олан Түркиjәнин бу мәсәләдә мөвгеjи дә аjдындыр: "Белә олан шәраитдә, Азәрбаjҹанын өзүнүн әрази бүтөвлүjү илә бағлы проблеми олдуғу бир вахтда, һәмчинин ермәниләрин бизим Русиjа илә мүнасибәтләримизи позмаға чалышдығы бир шәраитдә бу ҹүр аддымларын атылмасы гаршы тәрәфә тәблиғат үчүн дәставүз вермиш олар. Мүхалифәт нүмаjәндәләринин Крыма сәфәр етмәк ҹәһдләри илә бағлы Русиjа саjтларында да мәлуматлар верилиб. Һәмин мәлуматлара верилән шәрһләрдә Азәрбаjҹанда бәзи гүввәләрин Крым татарларыны гызышдырмаг үчүн фәалиjjәтә кечдиjи һаггында jанлыш фикирләр jаjылыр. Бу фикирләрин jаjылмасында ермәни изи вар вә онлар Русиjада анти-түрк, анти-Азәрбаjҹан тәблиғат машыныны ишә салмаг истәjирләр. Онлар һәтта Түркиjәнин Крым татарлары илә бағлы jеритдиjи сиjасәт һаггында шиширдилмиш, jалан мәлуматлар jаjырлар. Тәбии ки, бу просесдән суи-истифадә едәрәк бизим өлкәмизин дә адынын бу мәсәләләрдә һалланмасына ҹәһд ҝөстәрирләр".
Милләт вәкили һесаб едир ки, белә бир шәраитдә бу ҹүр аддымларын атылмасы милли марагларымыз бахымындан хеjир верән мәсәлә деjил: "Нәһәнҝ ҝүҹләрин тоггушдуғу бир мәканда вә мәгамда өзүнү горума инстинкти jүксәк олмалыдыр. Милли мараглардан чыхыш едәрәк бизим бу мәсәләләрә мүдахилә етмәjимизә еһтиjаҹ jохдур. Дөвләтимизин Украjнада баш верән һадисәләрлә әлагәдар мөвгеjини Хариҹи Ишләр Назирлиjи ифадә едиб. Она ҝөрә дә бу мәсәләләрдә һәр кәс һәссас, диггәтли олмалы вә милли марагларымыза зиjан вураҹаг аддымлар атмамалыдыр".
Диггәт: Хәбәрдән истифадә етдикдә мәнбәjә истинад лазымдыр
