Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Иран Ислам Республикасынын Хариҹи Ишләр Назирлиjинин сөзчүсү Мәрзиjә Әфхәм журналистләрә ачыглама верәрәк билдириб: “Иран Ислам Республикасы илә Русиjа Федерасиjасы арасында С-300 ПМУ-1 зенит-ракет комплексинин тәһвил верилмәси мәсәләсиндә jаранмыш проблемин jолуна гоjулмасы үчүн данышыглар давам едир”.
Ханым Әфхәмин сөзләринә ҝөрә, тәрәфләр арасында данышыглар там нәтиҹә әлдә олунҹаjадәк апарылаҹаг: “Данышыглар Иран Ислам Республикасы илә Русиjа арасында jахшы әлагәләр фонунда ики өлкә мүтәхәссисләри арасында С-300 ПМУ-1 зенит-ракет комплексинин тәһвили мөвзусунда мөвҹуд олан беjнәлхалг өһдәликләрин jеринә jетирилмәси истигамәтиндә давам етдирилир”.
Геjд едәк ки, Иран Ислам Республикасы илә Русиjа Федерасиjасы арасында 2007-ҹи илдә С-300 ПМУ-1 зенит-ракет комплексинин сатышына даир мүгавилә имзаланыб. Мүгавиләjә әсасән, Русиjа Иран Ислам Республикасына 800 милjон доллар гаршылығында 5 әдәд С-300 ПМУ-1 зенит-ракет комплекси сатмалы иди. Анҹаг 2010-ҹу илин иjунунда БМТ Тәһлүкәсизлик Шурасынын Иран Ислам Республикасына гаршы дөрдүнҹү санксиjа пакетини гәбул етмәсиндән сонра Русиjа Федерасиjасы мүгавиләнин иҹрасыны ганунсуз олараг даjандырыб вә ноjабрын 7-дә сатышы тамамилә ләғв едиб. Бу сәбәбдән Иран Ислам Республикасы Русиjаны беjнәлхалг мәһкәмәjә верәрәк 4 милjард доллара jахын тәзминат истәjир.
Диггәт: Хәбәрдән истифадә етдикдә мәнбәjә истинад лазымдыр
