Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Иран Ислам Республикасы Гурулушунун Мәсләһәти Шурасынын катиби вә Ислам Ингилабы Кешикчиләри Корпусу Сепаһ-ын кечмиш команданы Мөһсүн Рзајинин Гарабағ мүһарибәси заманы Иранын Азәрбајҹана олан јардымлары вә Гарабағ мүһарибәси заманы онларла иранлынын шәһид олмасы һагдакы ачыгламалары Азәрбајҹан Республикасында мүхтәлиф реаксијалара сәбәб олуб.
Бејнәлхалг Террорчулуг вә Коррупсија илә Мүбаризә Мәркәзинин (БТ КГММ) директору Рөвшән Новрузоғлу Гарабағ мүһарибәси заманы онларла иранлынын азәрбајҹанлыларын кәнарында дөјүшдүјүнү вә шәһид олдугларыны тәсдиг едиб.
О әлавә едиб: “Онлар мүһарибәнин мәнасыны билирдиләр. Ираг илә мүһарибәдә иштирак едән онларла иранлы Гарабағ мүһарибәсиндә дә иштирак едирди. Онлар арасында бүтүн иранлы етнослар, о ҹүмләдән фарслар, азәриләр вә күрдләр вар иди”. Рөвшән Новрузоғлу дејиб: “Биз арашдырмышыг ки, 1992-ҹи илин февралында Хоҹалыда баш верән фаҹиә заманы ермәни сепаратчыларына гаршы дөјүшдә азәрбајҹанлыларын кәнарында иранлылар да олублар. Онлардан 11 нәфәринин гәбрини биз ашкар етмишик. Онларын бәзиләринин гәбирләри Хоҹалыда, Лачында, Кәлбәҹәрдә, Губадлыда вә Шушададыр”
Новрузоғлу иранлы дөјүшчүләрин дәстә һалында Азәрбајҹана ҝәлдикләрини вә Гарабағ мүһарибәси заманы мүхтәлиф ҹәбһә бөлҝәләриндә вурушдугларыны дејәрәк, онларын мәгсәдинин Азәрбајҹана, мүсәлман бир өлкәјә көмәк етмәк олдуғуну билдириб.
Бејнәлхалг Террорчулуға вә Коррупсијаја Гаршы Мүбаризә Мәркәзинин директору Иран вәтәндашларынын Гарабағ мүһарибәсиндәки иштиракыны Иран Ислам Республикасынын исламчы сијасәтләри чәрчивәсиндә баш тутдуғуну дејәрәк, әлавә едиб: “Иранлылар шәһадәт ешги илә Гарабағ мүһарибәсиндә иштирак едирдиләр. Чүнки, билирдиләр ки, ҝери дөнүш имканлары сыфыра бәрабәрдир”.
О сонда Азәрбајҹан медиаларынын бу барәдә бир кәлмә дә олсун белә сөһбәт ачмамагларындан вә бунунла бағлы арашдырмаларын апарылмамасындан тәәссүфләндијини билдириб.
Хатырладаг ки, Иран Ислам Республикасы Гурулушунун Мәсләһәт Шурасынын катиби вә Иран Ислам Ингилабы Кешикчиләри Корпусунун сабиг команданы Мөһүсүн Рзаји Бејнәлхалг Сәһәр каналынын Әрдәбил мүхбири илә мүсаһибәси заманы дејиб: "Шәхсән ҝөстәриш вермишдим ки, Гарабағ мәнтәгәсинин вәзијјәтинә ајдынлыг ҝәтирилсин вә Азәрбајҹан Республикасы ордусу мүнасиб һәрби тәҹһизат илә тәҹһиз едилсин вә лазыми һәрби тәлимләр кечилсин".
Диггәт: Хәбәрдән истифадә етдикдә мәнбәјә истинад лазымдыр
