Әһли Бејт -АБНА- хәбәр аҝентлијинин вердији хәбәрә әсасән Јени гурулмуш тәшкилат – Азәрбајҹан Дөвләтчилији Наминә Демократик Талыш Бирлији әтрафында полемикалар давам едир. Гурумун мәрамнамәсиндә дејилир ки, мәгсәд “Азәрбајҹан Республикасында јашајан инсанларын һәмрәјлији, о ҹүмләдән өлкәнин бәрабәрһүгуглу вәтәндашларындан олан Талыш Халгынын һәјатында сон заманлар ҹидди вүсәт алмыш сүни ассимилјасија просесинин вә милли өзүнүдәрк һармонијасынын позулмасынын гаршысыны алмаг, лајигли вәтәндаш – шәхсијјәт характеринин формалашмасы наминә онун дилини, әдәбијјатыны, тарихини, етнографијасыны, фолклоруну, адәт-әнәнәләрини вә диҝәр мадди-мәдәни дәјәрләрини өјрәниб тәдгиг етмәк, еләҹә дә бу халгын етнокултуролоҝија јаддашыны јенидән өзүнә гајтармаг”дыр.
74 сајлы Ләнкәран сечки даирәсиндән депутат, Милли Мәҹлисин сосиал сијасәт комитәсинин сәдри Һади Рәҹәбли “Медиа форум” сајтына ачыгламасында Азәрбајҹан Дөвләтчилији Наминә Демократик Талыш Бирлијинин јарадылмасыны писләјиб: “Бу ҝүн Азәрбајҹанда бүтүн етник груплара һөрмәт, хош мүнасибәт вар. Етник групларын һүгуглары горунур, онлара һәр ҹүр шәраит јарадылыб, нүмајәндәләри һакимијјәтдә тәмсил олунурлар, нормал фәалијјәт ҝөстәрирләр... Талышлара һеч бир тәзјиг јохдур. Мән буна бариз нүмунәјәм, Милли Мәҹлисдә отурмушам”.
Азәрбајҹан Зијалылар Бирлијинин сәдри, јени јарадылан Азәрбајҹан Дөвләтчилији Наминә Демократик Талыш Бирлијинин тәсисчиләриндән олан Елдәниз Гулијев нојабрын 22-дә “Медиа форум” сајты илә әлагә гурараг Һади Рәҹәблијә ҹаваб вериб: “Һади Рәҹәбли өзүнү талыш халгынын бариз нүмунәси ҝөстәрәрәк өз тимсалында талышларын һамысынын онун кими јашадығыны гејд едиб. Әлбәттә, онун јахшы јашамағы илә һеч бир ишимиз јохдур. Амма суал вермәк истәјирик: Азәрбајҹанда јүз минләрлә талыш вар, онларын һамысымы Һади Рәҹәбли кими јашајыр? Һамысынынмы Ләнкәранда истираһәт мәркәзи вар? Һамысынынмы Ләнкәранда мебел мағазалары шәбәкәси вар? Ҝөрәсән, талышларын һамысынын јанаҹагдолдурма стансијасы вар ки, ондан газанҹ әлдә едиб јахшы јашасынлар? Һамысынын Лерикдә истираһәт мәркәзи вар? Ҝөрәсән, талышларын һамысынынмы һектарларла торпаг саһәси вар? Белә дејил ахы. Тохун аҹдан хәбәри олмаз.
Инсанларын јаратдығы сахта паралар гәдәр параларын јапдығы сахта инсанлар да вар. Буну һәр кәс билмәлидир.
Мән ону да дәрк едирәм ки, ҝаһ бәј, ҝаһ ҹәнаб, ҝаһ мүәллим олан Һади Рәҹәбли кими адамлара дүз сөз демәк кора ҝүзҝү вермәк кими бир шејдир, һеч заман адама сағ ол демәз. Биз бурада ҹәмијјәт јарадыб проблемләри һәлл етмәк, Азәрбајҹан дөвләтинә дајаг олмаг истәјирик, о исә һәгигәтләри инкар етмәк јолуну тутуб, демәли, дөвләтчилик марагларына да зидд олан бир јолу тутуб.
Ону да гејд етмәк истәјирәм ки, суал ишарәси дә нә вахтса нида олуб, садәҹә, әјилә-әјилә суала чеврилиб. Биз исә дүз дајанмышыг вә көлҝәмизин әјри дүшмәсиндән горхмуруг. Әслиндә Һади Рәҹәбли кими инсанларын һаггымызда тәнгид сәсләндирмәси бизим дүз јолда олмағымыздан хәбәр верир”.
Диггәт: Хәбәрдән истифадә етдикдә мәнбәјә истинад лазымдыр
