Әһли Бејт -АБНА- хәбәр аҝентлијинин вердији хәбәрә әсасән дүнән, 24 сентјабр 2012-ҹи ил тарихдә Азәрбајҹан Ислам Партијасынын идарә һејәтинин ҝениш топлантысы кечирилмишдир.
Партија функсионерләри өлкәдә иҹтимаи-сијаси вәзијјәти мүзакирә етмиш, сон дөврдә өлкә дахилиндә вә бејнәлхалг аләмдә баш верән һадисәләрә мөвге сәрҝиләмишләр.
Чыхышлар күтләви електрон информасија васитәләриндә АИП-ә, онун ајры-ајры функсионерләринә гаршы јазыланлары һеч бир әсасы олмајан гәрәзли фикирләр кими гијмәтләндирмиш вә бу тәхрибатларын гурумун сијаси фәалијјәтинә һеч бир мәнфи тәсир ҝөстәрә билмәјәҹәјини ачыгламышлар.
АИП рәһбәрлији өлкәнин ајры-ајры реҝионларында, хүсусән Масаллы вә Астара рајонларында ҝүнаһсыз инсанларын, һөрмәтли мөмин шәхсләрин тәгиб олунмасыны, һәбсләри һүгуг-мүһафизә, јерли иҹра һакимијјәти органларынын өзбашыналығы һесаб етмишләр.
Чыхыш едәнләр Астаранын Әрчиван кәндиндә баш верәнләри һүгуг-мүһафизә органлары әмәкдашларынын әһалини зорла тәхрибата ҹәлб етмәк һалларына мүнасибәт ҝөстәрмиш, онларын һәрәкәтини бурада икинҹи Губа һадисәләрини сүни шәкилдә тәшкил етмәклә, сонра да динҹ сакинләр арасында күтләви һәбсләр апармаға ҹәһд кими гијмәтләндирмиш вә һакимијјәти белә сенариләри һазырлајанларын тезликлә ашкарланараг ҹәзаландырылмасыны тәләб етмишләр.
Топланты иштиракчылары Гәрб өлкәләриндә, хүсусән АБШ вә Франсада әзиз Пејғәмбәримизә (с) гаршы тәһгиредиҹи һәрәкәтләри бејнәлхалг сионизмин Ислам дининә гаршы чиркин әмәлләринин нәтиҹәси һесаб едәрәк бүтүн дүнјада олдуғу кими, мүсәлман өлкәси Азәрбајҹанда да бу вәһшилијә, гејри-инсани, ејни заманда анти-бәшәри әмәлләрә халг күтләләринин етиразыны тәбии һесаб етмишләр. Истәр АБШ-ын, истәрсә дә Франсанын Бакыдакы сәфирликләри гаршысында етиразлары зәрури аддымлар кими алгышлајан Исламчылар, ејни заманда, динимизә севҝидән, диҝәр динләрә һөрмәт вә еһтирамдан ирәли ҝәләрәк инсанларын килсә вә синагоглар гаршысында дејил, мәһз Пејғәмбәрин (с) тәһгир олундуғу өлкә тәмсилчиләринә етираз сәсләрини чатдыраркән инҹидилиб, сахланмаларыны ,һәбс олунмаларыны кәскин писләмишләр.
АИП функсионерләри бу мәгсәдлә етираз аксијасы кечирмәк үчүн Бакы Шәһәр Иҹра Һакимијјәтинә рәсми мүраҹиәт етмәји гәрара алмышлар.
Диггәт: Хәбәрдән истифадә етдикдә мәнбәјә истинад лазымдыр
