Әһли Бејт -АБНА- хәбәр аҝентлији- Бу ҝеҹә мүбарәк Шәбан ајынын он бешинҹи ҝеҹәсидир. Ислам Пејғәнбәри Муһәммәд Ибн Әбдуллаһын (сәлләллаһу әлејһи вә алиһ) нәслиндән олан мәсум өвлады, Бәшәријјәтин Хиласкары он икинҹи Имам, Мәһәммәд ибн Һәсән Әскәринин (әлејһимәс сәлам) анадан олан ҝеҹәсидир.
Бу ҝеҹә вә сабаһысы ҝүн, бәшәријјәтин ән севинҹли ҝүнләриндән бири сајылыр. Бу анлар Алаһ Тәалаја едилән дуаларын гәбул олан анларыдыр. Биз АБНА олараг дүнја халгларынын бу севинҹинә гошулур вә мисилсиз бајрам мүнасибәти илә башда Имам Заман (Аллаһ Тәала онун шәрәфли ҝәлишини тезләшдирсин) Һәзрәтләринин өзүнү вә онун һагг наиби Имам Хаменеји ҹәнаблары олмагла бүтүн бәшәријјәти сәмими гәлбдән тәбрик едирик.
Имам Заман (әлејһис сәлам) барәдә гыса мәлумат.
Мәһди ибн Һәсән Әскәри (әлејһимәс сәлам) һиҹрәтин 255-ҹи или шабан ајынын 15-дә Самирра шәһәриндә анадан олмушдур.
Онун ады Ислам Пејғәмбәринин адындан, јәни, М.У.Һ.Ә.М.М.Ә.Д, күнјәси дә Пејғәмбәрин күнјәсиндәндир, јә᾽ни, Әбүлгасимдир. Ән мәшһур ләгәби Мәһдидир. Атасы он биринҹи Имам Һәсән Әскәри , анасы исә чох һөрмәтли Нәрҹис (Нәрҝиз) ханым олмушдур. Анасы, Рејһанә, Сүсән вә Сәгил адлары илә дә танынмышдыр. Нәрҹис ханымын фәзиләт вә мәнәвијјаты о дәрәҹәдә чох олмушдур ки,аиләсинин фәзиләтли гадынларындан бири олан Әлијјән-Нәгинин баҹысы Һәкимә ханым ону (Нәрҹиси) өз нәслинин ән фәзиләтли ханымы, өзүнү исә онун хадимәси адландырмышдыр.
Ислам пејғәмбәри һәзрәт Мүһәммәд сәлләллаһу әлејһи вә Алиһи вә сәлләмин он икинҹи ҹанишини мүәјјән сәбәбләр үзүндән гејбә чәкилмиш вә Аллаһын иҹазәси илә зүһур едиб дүнјада олан зүлмкарлығы арадан апараҹаг, һәмчинин дүнјада әдаләти бәргәрар едәҹәкдир.
Һал-һазырда (јәни 2012-ҹи илдә) һәзрәт Мәһди әлејһиссаламын 1178 јашы вардыр вә Аллаһ тааланын истәдији вахт зүһур едәҹәкдир.
Лакин бәзи шәхсләр о һәзрәтин (ә) индијә гәдәр сағ гала билмәси барәсиндә шүбһә едирләр. Аллаһ таала Гур'ани кәримдә бујурур:
(Онлар) дүнјанын заһириндән башга бир шеј билмир вә онлар ахирәт (әбәди) һәјатдан гафилдирләр.[Рум сурәси, ајә 7]
Һәзрәт Мәһди (әлејһис-саламын) индијәдәк сағ галмасыны инкар едәнләр дә јалныз дүнјанын заһириндән хәбәрдар оланлардыр. Онлар Аллаһын гүдрәтини унудараг инсанларын јалныз 60-70 ил јашадығыны ҝүман едир вә о һәзрәтин бу гәдәр узун мүддәтли һәјатыны дәрк едә билмирләр.
Гурани-кәримә нәзәр салдыгда, Имам Заман әлејһиссаламын бу гәдәр өмүр сүрмәсини Аллаһын гүдрәтиндә ади бир иш олдуғуну ҝөрүрүк. Белә ки, Аллаһ таала Нуһ пејғәмбәри 950 ил өз гөвму арасында јашатмыш, Әсһаби-кәһфи 300 илдән артыг мағарада јуху һалында сахламыш, Иса әлејһиссаламы нечә әср бундан габаг ҝөјләрә апармыш вә һәлә дә јерә гајтармамышдыр.
Аллаһ-таала каинаты, ҝүнәш системини, планетләри, мүхтәлиф галагтикалары вә саир варлыг аләмләрини Өз түкәнмәз гүдрәти илә јаратмышдыр.
Имам Заман әлејһиссаламын да бу гәдәр өмүр сүрмәси һеч дә Аллаһ үчүн чәтин бир мәсәлә дејилдир.
Он икинҹи имам һәзрәт Мәһди әлејһиссалам беш јашында икән гејб олмушдур ки, О, Һәзрәтин ики нөв гејби олмушдур.
1-Гыса мүддәтли гејб, (Гејбәти-сүғра);
2-Узун мүддәтли гејб, (Гејбәти-кубра);
О һәзрәтин гыса мүддәтли гејби, гәмәри тарихи илә 260-329-ҹу илләрдә баш вермиш вә бу гејб 69 ил давам етмишдир. Бу мүддәт әрзиндә о һәзрәтлә (ә) халг арасында олан рабитә ашағыдакы дөрд нәфәр васитәси илә олмушдур:
1-Осман ибни Сәид Әмри, (5ил);
2-Мүһәммәд ибни Осман ибни Сәид Әмри, (40 ил);
3-Әбул-Гасим Һүсејн ибни Руһ Нубәхти (21 ил);
4-Әбул-Һәсән Әлијјибни Мүһәммәд Сәмәри, (3 ил);
Һәзрәт Мәһди әлејһиссаламын узун мүддәтли гејби исә Әлијјибни Мүһәммәд Сәмәринин вәфатындан сонра башламыш вә бу ҝүнәдәк давам етмәкдәдир. [Тарихи әсре гејбәт, сәһ.164-166]
Шиә вә сүннү алимләринин әгидәсинә ҝөрә дүнјанын ахырларында Һәзрәт Мәһди әлејһиссалам зүһур едиб, әдаләт вә Исламы бүтүн дүнјада һаким едәҹәкдир.
Нәгл олунмуш рәвајәтләрә әсасән, о Һәзрәт зүһур етдикдән сонра ҝөјләрә апарылмыш Иса пејғәмбәр дә јерә енәҹәк вә имам Мәһди әлејһиссаламын ән јахын көмәкчиләриндән бири олаҹагдыр.
Дүнјада әдаләти бәрпа едән имам Заман әлејһиссалама тәкҹә мүсәлманлар дејил, һәм дә гејри-мүсәлманлар инанырлар.
Мәсәлән; милади тарихи илә 1000-ҹи илләр әрәфәсиндә дүнјада бөјүк бир дәјишиклијин интизарыны чәкиб, руһи һәјәҹанлара дүшмүш јәһуди вә мәсиһиләр 2000-ҹи илин әрәфәсиндә бир даһа һәјәҹанланмыш вә бу илдән сонра нә исә бөјүк бир һадисәнин баш верәҹәјини ҝөзләјирләр.
Һәзрәт Мәһди әлејһиссаламын зүһуру Гурани-кәримдә вә Әһли-бејтин рәвајәтләриндә дә ҝәлмишдир.
Гурани-кәримдә охујуруг:
Аллаһ тәала сизләрдән иман ҝәтириб салеһ әмәлләр верәнләри онлардан габагкылар (пејғәмбәрләр) кими јер үзәриндә һакимијјәтә чатдырмағы вәдә вермишдир. [Нур сурәси, ајә 55 Бу һагда Әл-мизан, Мәҹмәул-бәјан, Нурус-сәгәлејн, Әл- бурһан вә с... тәфсирләрә баха биләрсиниз]
Бир чох тәфсирләрдә бу ајәнин Мәһди һаггында назил олмасы гејд олунур вә бу һагда чохлу рәвајәтләр нәгл олунмушдур.
Әјјаши өз тәфсириндә бу ајәнин изаһында һәзрәт Пејғәмбәрин бу һәдисини нәгл' етмишдир:
"Дүнјанын ахырына бирҹә ҝүн галса белә Аллаһ тәала о ҝүнү о гәдәр узадаҹаг ки, ады мәним адым вә өзү Әһли-бејтимдән олан бир нәфәр ҝәләрәк јер үзүнү зүлм вә һагсызлыгла долдуғу кими, әдаләт вә инсафла долдураҹагдыр."
Гејд етмәк лазымдыр ки, бу һәдис, әһли сүннәтин Сәһиһи-Термези, Муснәд, ибни Әһмәд, Јәнабиул- мәвәддәт китаблары вә бир чох һәдис вә тәфсирләриндә дә нәгл олунмушдур.
"Онлар сәндән әзабын тез ҝәлмәсини истәјирләр. Аллаһ Өз вәдинә әсла хилаф чыхмаз. Рәббинин јанында олан бир ҝүн сизин сајдығынызын мин или кимидир!" (Һәҹҹ, 47)
Онлар гәбул едирләр ки, бу "әзаб вәди" Һз Меһдинин зүһурудур. Чүнки һәдисләрә ҝөрә О зүһур едәндә әксәријјәт Ону инкар едәҹәк. Белә бир инкар исә бәндә үчүн әб бөјүк әзабдыр, һәм бу дүнјада, һәм дә ахирәтдә. Чүнки һәр дөврдә Аллаһын тәмсилчиси јер үзүндә ҝәлир, ону гәбул етмәјәнләр әзаба дүчар олурлар.
"Биз елчи ҝөндәрмәмиш (һеч кәсә) әзаб вермирдик." (Исра, 15)
Диҝәр тәрәфдән онлар дејирләр ки, бу вәд јалныз Гуранда дејил Инҹилдә дә вардыр:
"Өз ики шаһидими ҝөндәрәҹәјәм ки, чула бүрүнәрәк һәмин 1260 ҝүн әрзиндә пејғәмбәрлик етсинләр." (Инҹил, Вәһј, 11:3)
Библија мәтнинә ҝөрә, һәр ҝүн 1 ил кими һесабланыр (Језекиел,4:6, Сајлар, 14:34). Бурдан чыхыш едәрәк, бу 1260 ҝүн 1260 илә бәрабәр сајылыр.
Бурада диггәтинизи һәзрәт пејғәмбәрдән (с) нәгл олунмуш бир рәвајәтә ҹәлб едирик:
Һәзрәти Пејғәмбәр (сәлләллаһу әлејһи вә Алиһи вә сәлләм) бујурмушдур:
Үммәтимин ән фәзиләтли вә ән үстүн ҹиһады, (Һәзрәт Мәһди әлејһиссаламын зүһурунун) интизарыны чәкмәкдир. [Туһәфул-угул, сәһ-37, һәдис: 25]
Һәзрәт Мәһди әлејһиссаламын зүһурурнун интизарында олмаг, һазыркы мөвҹуд шәраит вә вәзијјәтә гане олмамаг вә о һәзрәтлә бирликдә дин јолунда фәдакарлыг үчүн өзүмүзү һазырламагдан вә зүлмә гаршы мүбаризә апармагдан ибарәтдир.
НИМЕЈИ-ШӘБАН ӘМӘЛЛӘРИ
Шәбан ајынын он бешинҹи ҝеҹәси. Бу ҝеҹә чох мүбарәк ҝеҹәдир.
Имам Багирдән (ә) бу ҝеҹәнин фәзиләти һаггында сорушдулар. Һәзрәт бујурду: «Гәдр ҝеҹәләриндән сонра ән фәзиләтли ҝеҹәдир. Аллаһ Тәала о ҝеҹә бәндәләринә фәзл (вә бәрәкәт) әта едир. Онларын ҝүнаһларыны өз кәрамәти илә бағышлајыр. Белә исә, Аллаһа тәгәррүб үчүн чалышын. Аллаһ Тәала өз мүгәддәс затына анд ичибдир ки, бу ҝеҹә, һеч бир әли, нәгәдәр ки, мәсијәт тәләб етмәјиб, өз дәрҹаһындан бош гајтармајаҹагдыр».
Бу ҝеҹәнин бәрәкәтләриндән бири дә Әсрин Султаны Имам Заман Һәзрәт Меһдинин (ә.ф.) бу ҝеҹәдә дүнјаја ҝәлмәсидир. Һәзрәт (ә.ф.) 255-ҹи һиҹри гәмәри илинин шәбан ајынын 15-ҹи ҝүнү, сәһәрә јахын Самирра (Ираг) шәһәриндә дүнјаја ҝөз ачмышдыр.
Бу ҝеҹәнин бир нечә әмәли вардыр:
1. Гүсл етмәк - бу ҝеҹә гүсл етмәк ҝүнаһларын јүнҝүлләшмәсинә сәбәб олар;
2. Бу ҝеҹәни дуа, намаз вә истиғфарла (Аллаһ Тәаладан ҝүнаһларын бағышланмасыны истәмәк - Дәјәрләр) әһја сахламаг (ҝеҹәни јатмамаг - Дәјәрләр). (Имам Зејнулабидин (ә) бу ҝеҹәни әһја сахлајармыш);
3. Имам Һүсејнин (ә) зијарәти - бу ҝеҹәнин әмәлләринин ичиндә ән фәзиләтли әмәл Имам Һүсејнин (ә) зијарәтидир. Бу ҝеҹә Имам Һүсејни (ә) 124 мин пејғәмбәрин руһу шад едәр.
Имам Һүсејни (ә) зијарәт етмәк үчүн дама чыхыб, саға вә сола бахыб, сонра башыны ҝөјә тәрәф тутуб, ашағыдакы дуа илә Һәзрәти зијарәт етмәк олар:
Әссаламу әлејкә ја Әба Әбдиллаһ, әссәламу әлејкә вә рәһмәтуллаһи вә бәракәтуһ.
Һәр кәс, һарада олмағындан асылы олмајараг, бу гајда илә Һәзрәти (ә) зијарәт етсә, һәҹҹ вә үмрәнин савабы онун үчүн јазылар.
Имам Һүсејнин (ә) бу ҝеҹә мәхсуси зијарәти вардыр ки, ону «Мәфатиһ-ул ҹинан» китабындан охумаг олар (2006-ҹы ил нәшри, сәһ. 951, «Имам Һүсејнин (ә) шәбан ајынын 15-дә зијарәти» бөлмәси).
4. Шејх вә Сејидин нәгл етдији дуаны охумаг (бах: елә орада, сәһ. 422);
5. Шејх Исмајыл ибн Фәзл Һашимидән белә рәвајәт етмишдир: «Имам Садиг (ә) шәбан ајынын 15-нә кечән ҝеҹәсиндә охумаг үчүн бу дуаны мәнә тәлим етди...» (бах: елә орада, сәһ. 424);
6. Ислам Пејғәмбәринин (с) охудуғу бу дуаны охумаг:
«Аллаһуммә игсим ләнә мин хәшјәтикә мә јәһулу бәјнәнә вә бәјнә мәсијәтикә, вә мин таәтикә мә тубәллиғунә биһи ризванәкә вә минәл-јәгини мә јәһунә әләјнә биһи мусибатуд-дунјә. Аллаһуммә әмтинә биәсмәинә вә әбсаринә, вә гуввәтинә мә әһјәјтәнә вәҹәлһул-варисә миннә вәҹәл сәрәнә әла мән заләмәнә вәнсурнә, әла мән әдәнә вә лә тәҹәл мусибәтәнә фи дининә, вә лә тәҹәлид-дунјә әкбәрә һәмминә, вә лә мәбләғә илминә, вә ла тусәллит әләјнә мән лә јәрһәмунә. Бираһмәтикә јә Әрһәмәр-Раһимин».
(бах: елә орада, сәһ. 425).
Пејғәмбәрин (с) бу дуасы ҹаме вә камил дуадыр. Бу ҝеҹәдән башга вахтларда да ону охумаг олар. Рәвајәт олунмушдур ки, Һәзрәт Рәсули Әкрәм (с) бу дуаны һәмишә охујарды;
7. Завал вахты охунан салаваты охумаг;
8. Кумејл дуасыны охумаг;
9. Ашағыдакы зикрләрин һәр бирини 100 дәфә демәк:
Сүбһәналлаһ, Әлһәмдулиллаһ, Аллаһу Әкбәр, Лә иләһә илләллаһ;
10. Шејх Мисбаһ, Әбу Јәһјадан белә нәгл едир: «Мөвлам Имам Садигдән (ә) шәбан ајынын 15-ҹи ҝеҹәсиндә һансы дуанын јахшы (даһа саваблы) олдуғуну сорушдум. Һәзрәт бујурду: «Иша намазы гылдыгдан сонра ики рәкәт намаз гыл. О намазын биринҹи рәкәтиндә «Һәмд»дән сонра «Ҹәһд» сурәсини, јәни «Гул, јә әјјуһәл кафирун»у, икинҹи рәкәтдә исә «Һәмд»дән сонра «Төвһид» сурәсини, јәни «Гул, һувәллуһу Әһәд»и» оху. Намазы саламла тамамладыгдан сонра, 33 дәфә сүбһаналлаһ, 33 дәфә әлһәмдулиллаһ, 34 дәфәАллаһу Әкбәр зикрләрини де. Даһа сонра бу дуаны оху (бах: елә орада, сәһ. 426)»;
11. Бу дуаны охумаг (бах: елә орада, сәһ. 425);
12. Ҹәфәри Тәјјарын намазыны гылмаг.
ШӘБАН АЈЫНЫН ОН БЕШИНҸИ ҜҮНҮ
Он икинҹи Имам - Һәзрәт Имам Саһиб-әз-Заманын (ә.ф.) мөвлуд ҝүнүдүр.
Имамы (ә.ф.) истәнилән мәкан вә заманда зијарәт етмәк, зүһуру үчүн дуа етмәк мүстәһәбдир. Имамы (ә.ф.) Самирра шәһәриндә сәрдабда зијарәт етмәк, тәкид олунмуш мүстәһәб әмәлләрдәндир.
Диггәт: Хәбәрдән истифадә етдикдә мәнбәјә истинад лазымдыр
