Сон ҝүнләр сәбәби ачыгланмаса да бәзи һиҹаб мәһбуслары азад едилиб. Һакимијјәт дини кәсимә гаршы о гәдәр гәддардыр ки, нәсә јахшы шеј ҝөзләмәк олмур. Бу “әфв”ләрин архасында нә дајаныр?
-Вурғуладығыныз кими, һакимијјәтин гәддарлығы бир һәддә чатыб ки, онлардан һеч бир јахшы иш ҝөзләнилмир. Бу режимин нөвбәти бир сијаси ҝедишидир. Биз билирик ки, Авропа шурасы вә дүнјанын инсан һаглары конвенсијасы Азәрбајҹанда ганунсуз олараг һәбс олунмуш вәтәндашларын талејиндән хәбәрдардыр. Бу тәшкилатлар сөзсүз ки, режим тәрәфиндән атылан хошаҝәлмәз аддымлары өз нөвбәләриндә ифша едирләр. Азәрбајҹан да бир дөвләт олараг сәј едир ки, хүсусән Авропа вә Америка тәшкилатларында өз нүмајәндәләрини јерләшдирсин вә өлкәнин дахилиндә ҝедән сијаси ҹәрәјанларын әсил симасынын рәнҝини бу нүмајәндәләрин васитәсилә дәјишсин. Бу әфв протокол характери дашыјан бир аддымдыр. Бизим үчүн өз халгынын азадлығы уғрунда (мәнәви вә милли дәјәрләр) зиндана дүшән һәр бир кәс әзиздир вә биз дә өз нөвбәмиздә Азәрбајҹан халгынын гејрәт, намусу олан илаһи һиҹаб әмринин горунмасына ҝөрә зиндандан азад олан вә зинданда иззәтә чатан гардашларымыза һамылыгла миннәтдарлығымызы билдирир вә бу јолда онлара вә өзүмүзә улу Танрыдан сабитгәдәмлик тәмәнна едирик. Амма әҝәр биз мәһбусларымызы нәзәрдән кечирсәк, ҝөрәрик ки, танынмыш шәхсијјәтләримизин һеч бири әфв олунмамышдыр. Режим, неҹә дејәрләр һәм Азәрбајҹанын дахилиндә, һәм хариҹдә ҝөздән пәрдә асмаг үчүн әфв фәрманы вермишдир. Чүнки сабаһ хариҹи дөвләтләр тәрәфиндән сорғу-суал олунанда отраја гојмаға мүнасиб бир ҹаваб лазымдыр.
Губа һадисәләри илә бағлы бүтүн республикада ҝәрҝинлик јашаныр. Бу садәҹә сосиал партлајышдыр, јохса сөз, виҹдан азадлыглары илә бағлы проблем дә јашаныб орада?
-Губа мәсәләси илә бағлы данышмаг садә вә асан дејил. Чүнки бурда пешәкар експерт олмаг лазымдыр. Мән јенә Азәрбајҹанда сон илләр әрзиндә баш верән етираз аксијаларына, митингләрә тохунмаг истәјәрдим. Бу митинг истәр мүхалифәт тәрәфиндән олсун, истәрсә дә диндарлар тәрәфиндән, Азәрбајҹанда игтирарда олан режим етираз аксијаларынын кечирилмәсинин гаршысыны ганунсуз јолларла алыр вә бу аксијаларын һәр бәһанә илә олмамасына чалышыр. Мартын 1-дә Губа рајонунун әһалиси өз етираз аксијаларыны кечирәҹәкләрини габагҹадан хәбәрдарлыг етдиләр вә нәһајәтдә аксија баш верди. Иҹра һакими мәнтәгәдән гачды. Мәндә јаранан шүбһә будур ки, Азәрбајҹанын башга бөлҝәләриндә баш вермәјән етираз аксијалары Губа рајонунда бу садәликлә баш верир. Еһтималлар бундан ибарәтдир: 1.Ја Губа халгынын бу һәддә шүҹаәтли олмасы режим тәрәфиндән нәзәрдә тутулмајыб. (Тәсәввүролунмаз һалдадыр). 2.Ја гачан иҹра башчысынын јеринә диҝәр кланлардан олан намизәдләр вар. 3.Ја да јерли һакимијјәт тәрәфиндән күллү мигдарда халг әмлакынын мәнимсәнилмәсинин изини итирмәк истәјирләр. О ки галды һадисәнин сосиал партлајыш, јохса вә виҹдан азадлыглары илә бағлы проблем олуб-олмамасына, әһали өз иҹра башчысына, һакимијјәтин јерли органларына реаксијасыны ҝөстәрди. Республикаја ҝәлдикдә исә мүшаһидәләрдән мәлум олур ки, сабитсизлик тәкҹә Губа һадисәләри илә бағлы дејил. Бәлкә һәр ҝүн ҝәрҝинлик јашаныр.
Бәзиләри белә дүшүнүр ки, һакимијјәт Еуровисион габағы халгы јухуја вермәк үчүн нечә иш ҝөрүр, бири дә сијаси мәһбусларын азад едилмәсидир. Доғруданмы азадлыға чыхан инсан сусмагла бағлы өһдәлик ҝөтүрүр?
-Биз доғма Азәрбајҹандан 20 илдир ки, ајры дүшмүшүк, амма буна бахмајараг һарда олурса олсун Азәрбајҹанымызын талејинә биҝанә галмамышыг. Һәр бир шејин һәгигәтини ҝөрмәк үчүн ону кәнардан мүшаһидә етмәк лазымдыр. Өзүнү демократик дөвләт адландыран доғма Азәрбајҹанда Сталин репрессијасы фәсли јашаныр. Буна сон илләр боју игтисади вә сијаси бөһранда јашамыш Азәрбајҹан халгы ҹанлы шаһиддир. Сон илләр Сталин заманында олдуғу кими ајаға галхыб өз һаггыны тәләб едән кәс мүхтәлиф бөһтанларла шәрләниб зиндан ҝушәләринә атылыр. Бу зиндан ҝушәләринә атылан Азәрбајҹан вәтәндашлары кимләрдир? Јалан вәдләрлә јухуја верилмиш вәтәндашлар. Еуровисион нөвбәти бир бәладыр. Бу әхлагсыз програмы бәргәрар етмәк үчүн јүзләрлә инсанлары евсиз-ешиксиз гојанлар өз намәлум һәдәфләринә чатмаг мәгсәди илә мираж вәдәләрлә халга лајлај охујаҹаглар. О ки галды Еуровисион габағы сијаси мәһбусларын азадлығы, биз бу бәрадә данышдыг. Ахы америкалы вә авропалы ағалара һесабат үчүн ҝөстәриҹи лазымдыр.
Дүјнјада һиҹаб гадағасы илә бағлы дурум неҹәдир? Авропа өлкәләриндә башланан анти-һиҹаб кампанијасы сәнҝијибми?
-Билдијимиз кими Авропадакы вәтәндашлар һүгуг бахымындан өз һагларыны горумагда даһа ҝүҹлүдүрләр. Чүнки гәрб дөвләтләри өз өлкәләринин дахилиндә галмагалдан горхурлар, мәһз буна ҝөрә дә Авропа кәнарда өз чиркин програмларыны иҹра етдирир вә диггәт мәркәзини өзүндән дәф едир. Авропанын бармагла сајыласы өлкәләриндә, јәни чох аз өлкәләриндә һиҹабла бағлы проблем јашаныр. Буна сүбут авропа ханымларынын Ислам динини гәбул етмәсидир. Бәли, сөзсүз, массон дөвләтләри истәмирләр ки, азсајлы өлкәләриндә һиҹабла бағлы проблем јашансын. Сөзсүз ки, массон дөвләтләри истәмирләр ки, бүтүн авропа ханымлары Ислам динини гәбул едиб һиҹаблы олсунлар. Күтләви исламлашманын гаршысыны алмаг үчүн һиҹабла бағлы сәс-күј салырлар.
Һиҹаб мәһбусларына мадди дәстәк үчүн фондун ишләри неҹә ҝедир?
-Һиҹаб мәһбусларына мадди дәстәк Аллаһын изни илә өз гајдасына дүшмәк үзрәдир. Ҝәләҹәкдә бу мәһбуслар үчүн ачылан тәзә банк һесабы интернет васитәсилә дүнјаја танытдырылаҹаг вә һесаба јығылан мәбләғ онларын аиләләринә јардым үнванында чатдырылаҹаг. Аллаһын һөкмләринин мүдафиәси уғрунда зиндана дүшәнләрин јардымчысы елә Аллаһ өзүдүр, сиз вә биз дејилик ки. Биз садәҹә олараг бу ишләрдә бир васитәјик. Аллаһ Гуранда белә бујуруб: “Әҝәр Аллаһа көмәк етсәниз, Аллаһ сизә көмәк олар.”
Бу фондун ишиндә шәффафлыг неҹә тәмин олунаҹаг? Фонд һесабат верәҹәкми?
- Һиҹаб Комитәси бу мәсәләни мүтләг мүзакирә едәҹәк. Даһа доғрусу, комитә өз узагҝөрәнлији илә бу мөвзуја ҹидди јанашыр вә хүсуси лаһијә һазырлајыб.
Сизҹә, Азәрбајҹанда һиҹабын тәблиғи үчүн һансы лајиһәләр һәјата кечирилмәлидир?
-Руһани тәләбә вә мөмин кәсимдән олан инсанлар һиҹабын фәлсәфәси, һикмәти һагда вә ән әсасы онун илаһи ганун олдуғуну имкан һәддиндә ҹәмијјәтә чатдырмалыдыр. Чүнки һиҹаб динин зәруријјәтидир вә Аллаһын һөкмүдүр. Аллаһын һөкмү заман вә мәкан бахымындан һеч вахт дәјишилмәздир.
Охуҹулара төвсијәниз...
-Охуҹулара төвсијәм будур ки, баш верән һадисәләрдән, хүсусән диндар тәбәгәдән олан баҹы вә гардашларым мәјус олмасынлар. Зиндан бу ҝүн мәғлубијјәт дејил, әксинә немәтдир. Нә үчүн немәтдир? Буна ҝөрә ки, сән Аллаһын гошунларындансан, Онун тәрәфиндәсән. Демәли, сән һагсан, гаршы тәрәф исә батил вә пуч. Бизим рәвајәтләримиздә дејилдији кими, бүтүн падшаһлар Аллаһын мүгабилиндә (индәллаһ) торпагдырлар. Торпаг исә ајаг алтында галыр. Биз һамымыз Әһли-бејт (ә) васитәсилә мөһкәм вә һеч вахт гырылмајан бир ипдән јапышмышыг.
hicab.org
Диггәт: Хәбәрдән истифадә етдикдә мәнбәјә истинад лазымдыр
