Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын һәбсдә олан сәдри Мөвсүм Сәмәдовун вәкили Анар Гасымлы вердији ачыгламасында дејиб: “Чох тәәссүф ки, өлкәдә сијаси мәһбусларла бағлы фикирләр мүхтәлифдир вә ортада бир нечә сијаһы вар. Дәрд ондадыр ки, бу мәсәләдә һүгуг мүдафиәчиләринин ваһид мөвгеји јохдур”.
Вәкил сон заманлар һүгуг мүдафиәси саһәсиндә чалышан Ејнулла Фәтуллајевин М.Сәмәдову вә диҝәр исламчылары сијаси мәһбус һесаб етмәсиндән данышыб: “Буну о, мәтбуата ачыгламасында дејиб. Билирәм ки, һүгуг мүдафиәчиләриндән јалныз Лејла Јунус мүтәмади исламчыларла марагланыр, онларла бағлы ачыгламалар верир. Диҝәр һүгуг мүдафиәчиләри, еләҹә дә бејнәлхалг һүгуг мүдафиә тәшкилатлары бу мәсәләдә биртәрәфли мөвге сәрҝиләјир. Мисал үчүн, “Амнестј Интернатионал” тәшкилаты 2 апрел аксијасы илә бағлы һәбс олунан мүсаватчы Турал Аббаслы, јахуд ондан әввәл тутулмуш ҹәбһәчи Ҹаббар Саваланлы барәсиндә мәндән мәлуматлар алыр, мүтәмади әлагә сахлајыр, амма исламчыларла марагланмыр. Елә онларын сонунҹу һесабатында да исламчыларла бағлы һеч бир фикир јох иди. Билирәм ки, белә тәшкилатлар әсасән јерли һүгуг мүдафиәчиләринин фикирләринә әсасланырлар. Ҝөрүнүр, бурада ислам фактору мүһүм әһәмијјәт кәсб едир”.
Авропa Инсан Һүгуглары Мәһкәмәсиндә бахылан “Лејла Шаһин Түркијәјә гаршы” ишини нүмунә ҝәтирән вәкил А.Гасымлы вурғулајыб ки, бу ҝүн Авропада да ислам дәјәрләринә мүнасибәт бирмәналы дејил: “Һәмин иш һиҹаб вә тәһсиллә бағлы иди. Иш Түркијә һөкумәтинин леһинә јекунлашды. Гәрарда мүәјјән сијаси чаларларын, исламла бағлы мәгамларын олдуғу ајдын һисс едилирди. Сөзсүз ки, биз Авропа Инсан Һүгуглары Мәһкәмәсинә һиҹабла бағлы иш апармајаҹағыг. Исламчыларла бағлы мәсәләләрин көкүндә о дајаныр ки, бу инсанлар нәјәсә етираз етдикләринә ҝөрә һәбс олунублар, онларын мүдафиә һүгугу позулуб вә саирә.
Хатырладым ки, о вахт журналист Ејнулла Фәтуллајевин ишиндә онун тәгсирсизлик презумпсијасынын позулмасы танынды. Абҝүл Сүлејманов вә диҝәр ики нәфәрин иши илә бағлы да Авропа Инсан Һүгуглары Мәһкәмәсиндә перспектив ҝөрүрәм. Чүнки онлар һәбс едилән ҝүнләрдә рәсми ачыглама верилди ки, радикал дини груп зәрәрсизләшдирилиб. Амма онлара гаршы ирәли сүрүлән иттиһамлар бу рәсми мөвге илә үст-үстә дүшмүр. Һәрчәнд Лејла Шаһинин иши ҝөстәрир ки, бәзи мәгамларда Авропа Инсан Һүгуглары Мәһкәмәсиндән нәсә ҝөзләмәјә дәјмәз. Она ҝөрә дә биз Авропа Инсан Һүгуглары Мәһкәмәсинә фикир вә сөз азадлығы, сәрбәст топлашмаг азадлығы вә башга бу кими һүгугларын позулмасы илә бағлы иддиалары дашыјаҹајыг”.
А.Гасымлынын фикринҹә, тәгсирләндирилән шәхс террорчу, гатил оланда да һүгуг мүһафизә органлары онун һүгугларыны танымалыдыр: “Дәфәләрлә олуб ки, шәхсин ганун чәрчивәсиндә мүһакимә олунмаг һүгугу таныныб. Шәхси неҹә ҝәлди мүһакимә етмәк олмаз. Һесаб едирик ки, бу ишләрин нәтиҹәси Авропа Инсан Һүгуглары Мәһкәмәсиндә мүсбәт олаҹаг. Амма һеч истәмәздик ки, исламчыларын иши о гәдәр узаға ҝетсин. Арзу едәрдик ки, мәсәлә Азәрбајҹан мәһкәмәләри сәвијјәсиндә һәллини тапсын”.
2011-ҹи илдә азадлыгдан мәһруметмә ҹәзасына мәһкум олунан 36 иҹтимаи-сијаси фәалын 16-сы исламчы кәсими тәмсил едир.
Һазырда 6 һиҹаб мәһбусунун мәһкәмәси ҝедир. Август ајында тутулан “Исламазери.аз” сајтынын баш редактору Рамин Бајрамов, руһаниләр Абҝүл Сүлејманов вә Ариф Гәнијев исә истинтаг алтындадырлар.
Исламчы кәсимин һәбси бу ил јанварын 2-дә АИП Баш Мәҹлисиндә партија лидери Мөвсүм Сәмәдовун чыхышындан сонра башлајыб. Һәмин чыхышында Мөвсүм Сәмәдов мәктәбләрдә һиҹаба гадаға гојулмасыны кәскин писләјиб вә Азәрбајҹан халгыны “ајаға галхмаға, залым режимә сон гојмаға” чағырыб.
Диггәт: Хәбәрдән истифадә етдикдә мәнбәјә истинад лазымдыр
