Әһли Бејт -АБНА- хәбәр аҝентлијинин вердији хәбәрә әсасән: Сәрбәст топлашмаг азадлығы һүгугунун позулмасындан шикајәтчи олан Азәрбајҹан Ислам Партијасы (АИП) Бакы Шәһәр Иҹра Һакимијјәтини мәһкәмәјә вериб. Партијанын мәтбуат хидмәтинин рәһбәри Ҹавид Ҹаббарлы ачыгламасында дејиб ки, етираз аксијасыны санксијалашдырмасы үчүн меријаја мүраҹиәт едән тәшкилат комитәсинин үзвләри - партијанын сәдр әвәзи Елчин Манафов, сәдрин биринҹи мүавини Ингилаб Әһәдли, сәдр мүавини Рөвшән Әһмәдов адындан шикајәт әризәси октјабрын 26-да 1 сајлы Бакы Инзибати-Игтисади Мәһкәмәсинә тәгдим едилиб.
Иддиа әризәсиндә Бакы Шәһәр Иҹра Һакимијјәтинин сәрбәст топлашмаг азадлығы һүгугуну поздуғу вурғуланыр, бу гурумдан партијаја 5000 манат тәзминат тутулмасы вә меријанын үзәринә аксија үчүн мүнасиб јерин ајрылмасы өһдәлији гојулмасы истәнилир.
Өтән һәфтә Бакы Шәһәр Иҹра Һакимијјәти АИП-ин пајтахтда кечирмәк истәдији митингә јер ајырмагдан имтина едиб. АИП аксијаны октјабрын 22-дә кечирмәк истәјирди. Митингдә Дағлыг Гарабағ мүнагишәсинин һәлл олунмамасындан наразылыг ифадә етмәк, өлкәдә исламофобија һалларынын гаршысы алынмасы, мәһбус партија рәһбәрләри вә руһаниләрин азадлыға бурахылмасы тәләбләрини сәсләндирмәк нәзәрдә тутулурду.
Диггәт: Хәбәрдән истифадә етдикдә мәнбәјә истинад лазымдыр
