Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасынын рәсми хәбәр аҝентлији – ИРНА-да Азәрбајҹанын Республикасынын дөвләт мүстәгиллијинин бәрпасынын ијирминҹи илдөнүмү мүнасибәтилә “дәјирми маса” тәшкил олунмушдур.
“Дәјирми маса”да Азәрбајҹанын Иран Ислам Республикасындакы сәфири Ҹаваншир Ахундов, Иран Хариҹи Ишләр Назирлијинин МДБ өлкәләри үзрә икинҹи идарәси рәисинин мүавини Рза Кондори, Теһран Университетинин профессору Афшир Зәрҝәри вә диҝәр рәсми шәхсләр иштирак етмишләр.
Тәдбир иштиракчылары Азәрбајҹанын дөвләт мүстәгиллијинин горунмасы вә мөһкәмләндирилмәсиндә үмуммилли лидер Һејдәр Әлијевин ролу, Президент Илһам Әлијевин рәһбәрлији алтында сон илләрдә өлкәмизин әлдә етдији наилијјәтләр, дөвләтимизин һәјата кечирдији таразлашдырылмыш хариҹи сијасәтин уғурлу нәтиҹәләри барәдә ҝениш фикир мүбадиләси апармышлар.
Һәмчинин Хәзәрин Азәрбајҹан секторунун карбоһидроҝен еһтијатларынын истисмары вә нефтин нәглиндә чохшахәлијин тәмин едилмәси, әһалинин рифаһынын јүксәлмәси вә сосиал-игтисади инкишафа даир дөвләт програмларынын иҹрасы, Ермәнистан-Азәрбајҹан, Дағлыг Гарабағ мүнагишәсинин реҝионал тәһлүкә мәнбәји олмасы мәсәләләри илә бағлы сәмәрәли мүзакирәләр олмушдур.
Гејд едилмишдир ки, тәҹавүзкар Ермәнистан тәрәфиндән өлкәмизин әрази бүтөвлүјүнә гаршы гәсд едилмәсинә бахмајараг Азәрбајҹан Республикасы һәртәрәфли инкишаф мәрһәләсини уғурла кечмәкдәдир. Азәрбајҹанын һәјата кечирдији меһрибан гоншулуг вә сәмими достлуг сијасәти реҝион үчүн әһәмијјәтли нәтиҹәләр вермишдир. Бу сијасәт, ејни заманда, Азәрбајҹан-Иран мүнасибәтләринин давамлы инкишафыны тәмин етмишдир.
Сонда “дәјирми маса”нын иштиракчылары ИРНА аҝентлији әмәкдашларынын суалларыны ҹавабландырмышлар.
Диггәт: Хәбәрдән истифадә етдикдә мәнбәјә истинад лазымдыр
