Әһли Бејт -АБНА- хәбәр аҝентлијинин вердији хәбәрә әсасән: Тәһсил Назирлији мәктәбләрин тикинтиси вә әсаслы тәмири заманы јол верилән нөгсанлары ачыглајыб. Назирликдән АПА-ја верилән мәлумата ҝөрә, Баш Прокурорлуғун мүвафиг дөвләт структурлары илә бирҝә Бакы шәһәринин 77 мәктәбиндә апардығы арашдырма нәтиҹәсиндә бәзи нөгсанлар ашкар олунуб. Нөгсанларла бағлы Баш Прокурорлуғун “Орта үмуми тәһсил мәктәбләринин тикинтиси вә әсаслы тәмири заманы ашкар едилмиш ганун позунтуларынын арадан галдырылмасы барәдә” тәгдиматы Тәһсил Назирлијинә дахил олуб.
Тәгдимат Баш Прокурорлуг јанында Коррупсијаја Гаршы Мүбаризә Идарәсинин рәһбәрлијинин вә Тәһсил Назирлијинин аидијјәти структур бөлмәләри нүмајәндәләринин иштиракы илә мүзакирә едилиб. Мүзакирә заманы Бакы шәһәринин 77 мәктәбиндә апарылан тикинти вә тәмир ишләриндә ашкар олунмуш бүтүн чатышмазлыгларын өтән мүддәт әрзиндә Тәһсил Назирлијинин Әсаслы Тикинти Идарәси тәрәфиндән арадан галдырылдығы барәдә мәлумат верилиб.
Баш Прокурорлуғун тәгдиматына әсасән мәктәб тикинтиси вә тәмири, онларын истисмара гәбул едилмәси саһәсиндә ганун позунтуларына јол вермиш бир сыра вәзифәли шәхсләр барәсиндә Тәһсил Назирлији тәрәфиндән ҹидди интизам тәнбеһи тәтбиг едилиб. Ишдә јол вердији нөгсанлара ҝөрә Тәһсил Назирлијинин Әсаслы Тикинти Идарәсинин рәиси вә бир нечә мәсул әмәкдашы тутдуглары вәзифәләрдән азад олунуб. Тәһсил Назирлијинин бу ишә мәсул олан бәзи әмәкдашларына, мүәссисә рәһбәрләринә исә ҹидди хәбәрдарлыг едилиб.
Мәктәб тикинтиси заманы ҹидди нөгсанлара јол верилдији, Республика Прокурорлуғунун баш верәнләрлә бағлы арашдырмалар апардығы барәдә илк мәлумат јајан КИВ-ләрдән бири дә “Азадлыг” гәзети олуб. Хатырладаг ки, һәлә бир мүддәт әввәл Әсаслы Тикинти Идарәсинин рәиси Аллаһверди Дәмировун һәбси барәдә мәлумат јајылмышды. Бу мәлумат нә тәсдиг, нә дә тәкзиб едилди. Бу хәбәрдән сонра мәтбуатда Әсаслы Тикинти Идарәсинин Бакы меријасына верилдији барәдә мәлумат јајылды, Аллаһверди Дәмировун ев дустағы едилдији билдирилди. Индисә онун ишдән чыхарылдығы рәсмән тәсдигләниб. Ону да гејд едәк ки, Аллаһверди Дәмиров Мисир Мәрдановун халасы оғлудур.
Диггәт: Хәбәрдән истифадә етдикдә мәнбәјә истинад лазымдыр
