Әһли Бејт -АБНА- хәбәр аҝентлијинин вердији хәбәрә әсасән:Сон ҝүнләр тәһсил системинин биабырчы дуруму там чылпаглығы илә ортаја чыхмагдадыр. Артыг Тәләбә Гәбулу үзрә Дөвләт Комиссијасы али мәктәбләрә гәбул имтаһанларында кечид балларыны ашағы салмагдан белә усаныб. Амма дејәсән, тәһсил назири Мисир Мәрданов евини јыхдығы Азәрбајҹан тәһсили илә бағлы һансыса етирафда булунмаг нијјәтиндә дејил.
Бу мәсәлә илә бағлы ПИА.АЗ-ы билҝиләндирән мөтәбәр гајнағын сөзләриндән белә мәлум олур ки, артыг јаранмыш вәзијјәтин ҝәрҝинлији һакимијјәтин јухары даирәләри тәрәфиндән дә нараһатлыгла гаршыланмагдадыр.
Хатырладаг ки, ТГДК тәрәфиндән сон олараг Бәдән Тәрбијәси вә Идман Академијасына гәбулда кечид балы 50-јә ендирилди ки, буну да експертләр фаҹиәли дурум кими дәјәрләндирирләр.
Назирләр Кабинетиндәки мөтәбәр мәнбәнин сөзләринә ҝөрә, сөзүҝедән вәзијјәтлә әлагәдар һөкумәтин һәтта фөвгәладә топлантысынын кечирилмәсини тәләб едәнләр вар: «Дурум чох аҹынаҹаглыдыр. Мисир Мәрданов бир тәһсил назири олараг өзүнү нәинки доғрултмады, һәтта курасијасы алтына алдығы Бакы орта мәктәбләрини елә бир һала салды ки, бу ҝүн елмә, тәһсилә олан мараг азалмагла јанашы, Азәрбајҹанын ҝәләҹәји шүбһә алтына дүшүб».
Мәнбә билдирир ки, ола билсин ки, тәһсилдә јашанылан проблемләрлә әлагәдар президент администрасијасында фөвгәладә топланты кечирилсин вә һәмин топлантыдаҹа Мисир Мәрдановун истефасы гәбул олунсун: «Доғрудур, Мәрдановун мүдафиәчиләри бу топлантынын гаршысыны алмаға чалышырлар. Амма јаранмыш вәзијәт артыг президенти белә нараһат етмәкдәдир».
Диггәт: Хәбәрдән истифадә етдикдә мәнбәјә истинад лазымдыр
