Кәмал-Рөвнәг-Назим триосунун “јашыл сојгырымы” Азәрбајҹанда нөвбәти Фаһишәханалар тикилир .

Әһл Бејт – АБНА – хәбәр аҝентлијинә верилән хәбәрә әсасән Азәрбајҹанда мешә еһтијаты ҝүнбәҝүн азалыр. 2010-ҹу ил “Еколоҝија” или елан олунса да, бунун дејәсән назир-олигархларымыза һеч бир аидијјәти јохдур. Онлар һәлә ки, һеч нәјә мәһәл гојмадан Азәрбајҹанын истәнилән сәфалы ҝушәсини өзләринин шәхси ҝәлир мәканына чевирә билирләр. Дөвләт гуллуғунда олан вәзифәли шәхсләрин борҹу һәм дә мешә өртүјүнү горумагдыр. Садә вәтәндашлар мешәдә ағаҹы доғрамаз, буну ҝүнаһ сајар. Үстәлик, буна ҝөрә онлар дәрһал мәсулијјәтә ҹәлб едиләрләр. Мәмурлар исә әксинә, кимсәдән чәкиниб-еләмәдән мешә золагларымызы да асанҹа өз бизнес марагларына гурбан вермәкдәдиләр. Тәбии ки, “јухарыларын” рүсхәти олмадан буна онлар ҹүрәт едә билмәзләр. Алдығымыз мәлумата ҝөрә, фөвгәладә һаллар назири Кәмаләддин Һејдәров өлкәнин ики сәфалы дағлыг бөлҝәсиндә - Шамахы вә Лерикдә 810 һектар әразини зәбт едиб. Назирин бу јашыл сојгырымы олигарх һәмкарларынын әли илә һәјата кечирдији билдирилир. “Фөвгәлназир”ин ҝөстәриши әсасында һәмин әразидә истираһәт зоналарынын салынаҹағы дејилир. Өзү дә сөһбәт 20-30 вилланын, маликанәнин, һотелләрин иншасындан ҝедир. Хидмәт дә јүксәк сәвијјәдә нәзәрдә тутулур. Лајиһәнин тикинтисиндә хариҹдән ҝәтирилән ишчиләр чалышаҹаг. Редаксијамыза мөтәбәр мәнбәдән дахил олан хәбәрә ҝөрә, артыг адычәкилән рајонларда мешәләр сүрәтлә гырылыр. Мәнбә гејд едир ки, һәр ики рајонда тикиләҹәк һотел, виллалар 2-3 илә һазыр олмалыдыр. Мешәләрин гырылмасы илә бағлы кәнд сакинләри дәфәләрлә аидијјәти гурумлара шикајәт етсәләр дә, фајда вермәјиб. Шамахы вә Лерикин иҹра һакимијјәтләриндән сакинләрә билдирилиб ки, шикајәт етмәк әбәсдир. Чүнки ишин архасында бөјүк гүввәләр дајаныр. Бу мәмурлар Диаспор Мәсәләләри үзрә Дөвләт Комитәсинин сәдри Назим Ибраһимов вә Дөвләт Нефт Ширкәтинин президенти Рөвнәг Абдуллајевдир. К.Һејдәровун тикинти ишләрини мәһз онлара тапшырдығы сөјләнилир. Хатырладаг ки, Лерик Рөвнәг Абдуллајевин, гоншу Ләнкәран исә Кәмаләддин Һејдәровун курасијасында олан бөлҝәләрдир. Шамахыда исә диаспор назиринин сөзү кечәрлидир. Н.Ибраһимовун адамлары Шамахыда артыг 400 һектар мешәни һасара алараг ағаҹлары мәһв етдирибләр. Ағаҹларын сојгырымы әсасән Сис, Талышнуру, Сагијан, Дәдәҝүнәш, Нағарахана кәндләриндә апарылыр. Мәнбәмизин башга иддиасына ҝөрә, кәндләрдә бәзи виллалар артыг тикилиб. Анҹаг ишләр там јекунлашмајыб. Ҝәләҹәкдә ҝөрүләҹәк хејли иш вар. Бир сөзлә, Шамахы да Н.Ибраһимовун васитәсилә К.Һејдәров тәрәфиндән ишғал олунуб. Аналожи дурум Лерикин кәндләриндә јашаныр. Рөвнәг Абдуллајевин адамлары һектарларла мешә массивинин ахырына чыхыблар. Әһали исә јахына бурахылмыр. Тәкҹә 2008-ҹи илдә әразидән 640,56 кубметр одун, 81,8 кубметр чырпы, 88,36 кубметр ишлик мешә материалы вә 7476 кг көмүрүн ганунсуз тәдарүк едилдији вә дашындығы мүәјјән едилиб. Һазырда мешәләрин гырылмасы Лерикин Шыхәкәран, Күсәкәран, Монидиҝаһ, Јухары Билнә, Јухары Вери, Һамармешә вә башга кәндләриндә һәјата кечирилир. Хатырладаг ки, өлкә президенти бу ил мај ајынын 7-дә кечирдији мүшавирәдә јашыллыглары мәһв едән шәхсләр барәсиндә прокурорлуғун ҹинајәт иши башламасы барәдә гәти ҝөстәриш вериб. Ганунла һазырда Кәмаләддин Һејдәров, Рөвнәг Абдуллајев вә Назим Ибраһимов һагда Баш Прокурорлуг ҹинајәт иши башлатмалыдыр. Ҝөрүнүр јүксәк рүтбәли мәмурлар үчүн дөвләтин биринҹи шәхсинин сөзү кечәрли дејил. Мөвзуну давам етдирәҹәјик.