Әһл Бејт-АБНА-хәбәр аҝентлијинә верилән хәбәрә әсасән, С. Оһанјан журналистләрин суалларына ҹавабында дејиб ки, бу ил әрзиндә иткин дүшмүш һәрбчиләрдән һеч бири тапылмајыб: “Биз һәр ҝүн һеч олмаса бир нечә инсанын талеји һагда хәбәр тутмаг үчүн иш апарырыг”. Назир билдириб ки, Бејнәлхалг Гырмызы Хач Комитәсинин өтән илә олан мәлуматына әсасән Гарабағ мүһарибәси заманы иткин дүшмүш ермәни вә азәрбајҹанлыларын сајы 4-5 мин нәфәрдир. Ермәнистандакы “Һүгуги өзбашыналыға гаршы” адлы иҹтимаи тәшкилат иткин дүшмүш ермәниләрин сајынын 1000 нәфәр олдуғуну гејд едир. Мүһарибә иштиракчысы олан азәрбајҹанлы һәрбчиләр бунунла бағлы мараглы бир факты хатырладыблар.
1994-ҹү илин апрел ајынын сонунда Тәртәр истигамәтиндә ганлы дөјүшләр ҝедиб вә ҹидди иткиләр верән ермәни тәрәфи дөјүш мејданында чохлу сајда өлү вә јаралы гојараг ҝери чәкилиб. Торпагтәпә јүксәклијинә нөвбәти һүҹумдан сонра Ечмиадзин баталјонунун командири, “Камикадзе” ләгәбли капитан Ҝеворг Ајрапертјан ағ бајраг галдырараг Азәрбајҹан ордусунун мөвгеләринә јахынлашыб. О, һәрби һиссәнин гәрарҝаһына апарылыб вә диндирилиб. Мәлум олуб ки, Ҝ. Ајрапетјанын рәһбәрлик етдији, Ермәнистанда формалашдырылмыш 296 нәфәрдән ибарәт мотоатыҹы баталјон апрелин 21-дә Тәртәр истигамәтинә ҝөндәрилиб. Бир һәфтәлик фасиләсиз дөјүшләрдә баталјонун 200-ә јахын әсҝәри өлүб вә јараланыб. Торпагтәпәдәки сон дөјүшдә Ҝ. Ајрапетјанын јахын гоһумлары, еләҹә дә 83-ҹү мотоатыҹы бригаданын гәрарҝаһ рәиси, “Очкарик” ләгәбли мајор Гачик Оганесјанын мејити дөјүш мејданында галыб. Бригаданын командири, полковник Манвел Григорјан Ҝ. Ајрапетјана нә јолла олурса олсун хәбәр Ирәвана чатмадан мејитләри дәјишдирмәји әмр едиб. Ҝ. Ајрапетјанын сөзләринә ҝөрә, ҝери чәкилән әсҝәрләри шәхсән ҝүлләләјән М. Григорјан бу залымлығы илә әлагәдар “Мјасник” ләгәбини алыб. (О, даһа сонра Ермәнистан мүдафиә назиринин мүавини олуб вә “Јеркрапа” Бирлијинә рәһбәрлик едиб. 2007-ҹи илдә Тер-Петросјанын тәрәфинә кечдикдән сонра М. Григорјан ордудан хариҹ едилиб.)
Ҝ. Ајрапетјан билдирир ки, М. Григорјан вә о вахт Дағлыг Гарабағын “мүдафиә назири”нин мүавини, полковник Сејран Оһанјан өлән әсҝәрләри Талыш кәндиндә басдырмағы, сәнәдләрдә исә онлары иткин дүшмүш кими гејд етмәји тапшырыблар. Мәгсәд Ермәнистанда паника јаранмасынын гаршысыны алмаг олуб. Чүнки чохлу сајда мејит ҝөрән аиләләр өвладларыны Гарабаға ҝөндәрмәјә биләрдиләр. Ҝ. Ајрапетјан 1 һәфтә әрзиндә 1445 адлы јүксәклијә ҝедән јолун сағында 300-ә јахын ермәни әсҝәринин басдырылдығыны ачыглајыб. О диндирилмә заманы горху ичиндә бәјан едиб ки, Ермәнистана гајыдарса, һәлак олмуш әсҝәр вә забитләрин јахынлары ону өлдүрәр. Азәрбајҹан тәрәфи белә бир гәрар гәбул едиб ки, мејитләрин дәјишдирилмәси јалныз Ҝ. Ајрапетјанын ифадәләри тәсдигләндикдән сонра һәјата кечирилсин. Команданлыгла разылашдырылдыгдан сонра Ҝ. Ајрапетјан бурахылыб. Онун сонракы талеји һаггында һеч бир мәлумат јох иди. Лакин 2009-ҹу илдә Ермәнистан мәтбуаты белә бир хәбәр јајды ки, 2007-ҹи илдә интизамсызлыға ҝөрә Ермәнистан Силаһлы Гүввәләринин сыраларындан говулмуш подполковник Ҝ. Ајрапетјан һәбс едилиб.
Бу фактлар Ермәнистанын мүдафиә назири С. Оһанјанын иткин дүшмүш әсҝәр вә забитләрлә бағлы ачыгламаларынын јалан олдуғуну ортаја гојур. С. Оһанјан вә јахын әтрафы бу һәрбчиләрин мејитләрини Ермәнистандакы аиләләринә ҝөндәрмәдән онларын басдырылмасыны әмр едибләр. Бејнәлхалг Гырмызы Хач Комитәси Ҝ. Ајрапетјанын ҝөстәрдији јерләрдә мүтәхәссисләрин иштиракы илә мониторинг апармалы вә әсл һәгигәт үзә чыхмалыдыр.
