Әмир Абдуллаһиан Ирагын јүксәк сәвијјәли рәсмиләри илә икитәрәфли, реҝионал вә бејнәлхалг мәсәләләри мүзакирә етмәк үчүн бир нүмајәндә һејәтинин башында чәршәнбә ҝүнү Ирагын пајтахты Бағдада сәфәр едиб.
Ики ҝүнлүк сәфәри чәрчивәсиндә Әмир Абдуллаһианын Ирагын јүксәк вәзифәли сијаси, парламент, тәһлүкәсизлик вә мәһкәмә рәсмиләри илә ҝөрүшләри нәзәрдә тутулуб.
Иранын хариҹи ишләр назири Бағдад Һава Лиманында медиа мәнсубларына вердији гыса ачыгламада Ирагын бөлҝәдәки тәбии вә актив ролуну бәрпа етмәсинин Ираны гане етдијини билдириб вә әлавә едиб ки, Бағдада сәфәринин мәгсәди икитәрәфли мәсәләләри изләмәк вә мүһүм реҝионал вә бејнәлхалг мәсәләләрлә бағлы Бағдадла мәсләһәтләшмәләри давам етдирмәкдир.
Әмир Абдуллаһиан гејд едиб ки, Бағдадла әла мүнасибәтләримизи нәзәрә алараг, гардаш Ирагын бөлҝәдәки нормал ролуна гајытмасы мәмнунлуг доғурур вә бу сәфәрин ҝүндәлијиндә мүхтәлиф мәсәләләр вар.
Әмир Абдуллаһиан Бағдад Һава Лиманынын чыхышында Гүдс Гүввәләринин кечмиш команданы ҝенерал-лејтенант Һаҹы Гасим Сүлејмани вә Ираг Халг Сәфәрбәр Гүввәләринин командир әвәзи Әбу Меһди Әл-Мүһәндисин АБШ террорчу гүввәләри тәрәфиндән шәһид едилдији нөгтәјә ҝедиб вә бу мүгавимәт ҹәбһәси шәһидләринин хатирәсини еһтирамла јад едиб.
342/
