АБНА24 Хәбәр Верир , Азәрбајҹан баш назиринин мүавини Шаһин Мустафајев илә Иран Ислам Республикасынын хариҹи ишләр назири Һүсејн Әмир-Абдуллаһијанын арасында кечирилән ҝөрүшдә икитәрәфли мүнасибәтләрин јүксәк сәвијјәдә инкишафындан, ики өлкә арасында тиҹарәт дөвријјәсиндә мүшаһидә олунан артымдан мәмнунлуг ифадә едилиб. Тәрәфләр Азәрбајҹан илә Иран арасында игтисади, тиҹарәт вә һуманитар саһәләр үзрә Дөвләт Комиссијасынын 15-ҹи иҹласында әлдә олунан разылыгларын, һәмчинин Иран әразисиндән кечмәклә Азәрбајҹанын Шәрги Зәнҝәзур игтисади рајону илә Нахчыван Мухтар Республикасы арасында јени коммуникасија бағлантыларынын јарадылмасы һаггында Анлашма Меморандумунун иҹрасына тезликлә башланмасынын өнәмини вурғулајыблар.
Азәрбајҹан Баш назиринин мүавини Шаһин Мустафајев бу һагда дејиб ки, Иран әразисиндән кечмәклә Азәрбајҹан Республикасынын Шәрги Зәнҝәзур игтисади рајону илә Нахчыван Мухтар Республикасы арасында автомобил көрпүләрини 1 илә тикиб истифадәјә вермәк һаггында разылыға ҝәлиниб.
О хатырладыб ки, бунунла бағлы ики өлкә арасында бир мүддәт әввәл мүвафиг Анлашма Меморандуму имзаланыб.
"Биз бу ҝүн Иранын јол вә шәһәрсалма назири илә автомобил јолу көрпүләринин тикинтисини вә малијјәләшдирилмәси мәсәләсини, ејни заманда, лајиһәләрин техники деталларынын лајиһәләндирилмәсинин баша чатдырылмасыны мүзакирә етдик. Дүшүнүрүк ки, бир ил әрзиндә автомобил көрпүләрини тикиб истифадәјә верә биләрик", - дејә о диггәтә чатдырыб.
Шаһин Мустафајев гејд едиб ки, дәмир јолу саһәсиндә дә Ишчи групу тәшкил едилиб вә артыг техники деталларын мүзакирәләринә башлајыблар: "Ејни заманда, електрик хәтләринин тикинтиси үчүн дә мүзакирәләр апарылыр. Бу лајиһәләр Иран вә Азәрбајҹан үчүн бөјүк фајдалар ҝәтирәҹәк, фајдалы транзит бағлантылары олаҹаг вә халгларымыз бундан фајдаланаҹаг".
Баш назирин мүавини Астарачај үзәриндә дә автомобил көрпүсүнүн тикинти лајиһәсинин 6 ај әрзиндә баша чатдырылмасынын нәзәрдә тутулдуғуну гејд едиб вә дејиб: "Астарада дәмир јол јүк терминалынын бу илин сонунадәк баша чатдырмаг нијјәтиндәјик. Дүшүнүрүк ки, бу ики лајиһә дә Шимал-Ҹәнуб дәһлизинин ән ваҹиб компонентләриндән бири олараг бу дәһлизин ҝүҹүнү артыраҹаг".
Хатырладаг ки, Азәрбајҹан Һөкумәти илә Иран Һөкумәти арасында Иранын әразисиндән кечмәклә Азәрбајҹанын Шәрги Зәнҝәзур игтисади рајону илә Нахчыван арасында јени коммуникасија бағлантыларынын јарадылмасы һаггында Анлашма Меморандуму тәсдиг едилиб.
342/
20 may 2022 - 13:38
Xəbər kodu: 1259169
Азәрбајҹан Республикасы баш назиринин мүавини Теһранда Иран Ислам Республикасынын хариҹи ишләр назири илә ҝөрүшүб.
