2022-ҹи илдә бөлҝәдә сүлһүн бәргәрары просеси сүрәтләнәҹәк

АБНА24 Хәбәр Верир, өтән ил Азәрбајҹан, Русија вә Ермәнистан рәһбәрләри арасында Гарабағ мүһарибәсинин баша чатмасына даир 2020-ҹи ил нојабрын 10-да әлдә едилмиш разылашманын иҹра вәзијјәтинин мүзакирәси мәгсәди илә 2 ҝөрүш олуб. Тәрәфләр 2021-ҹи илин әввәлиндә Москвада, илин сонуна јахын исә Сочидә ҝөрүшүб. Данышыглар заманы Азәрбајҹан вә Ермәнистан арасында сәрһәдин демаркасијасы, еләҹә дә реҝионда коммуникасијаларын ачылмасы үшүн үчтәрәфли ишчи групунун јарадылмасы һаггында разылыг әлдә олунуб. Даһа сонра Москвада үч өлкәнин баш назир мүавинләри сәвијјәсиндә јарадылмыш ишчи групун бир нечә ҝөрүшү дә кечирилиб.

Бакы постмүнагишә дөврүндә Азәрбајҹан, Русија президентләри вә Ермәнистанын баш назири арасында имзаланмыш үчтәрәфли сәнәдләрин там шәкилдә һәјата кечирилмәсини, реҝионда бүтүн коммуникасијаларын ачылмасыны, Азәрбајҹанла Ермәнистан арасында сәрһәдләрин мүәјјән едилмәсини, бејнәлхалг һүгуг нормаларына ујғун олараг мүнасибәтләрин нормаллашдырылмасыны ваҹиб сајыр.

Гејд олунур ки, реҝионда коммуникасијаларын ачылмасы, Ермәнистан-Азәрбајҹан сәрһәдләринин делимитасијасы вә демаркасијасы кими мәсәләләр Азәрбајҹан вә Ермәнистан лидерләринин декабрын 15-дә Брүсселдә Авропа Иттифагы Шурасынын президенти Шарл Мишелин иштиракы илә кечирилмиш ҝөрүшүндә дә әсас мөвзулардан олуб.

Бакы хүсусилә Азәрбајҹан Республикасынын гәрб рајонлары илә Нахчываны Ермәнистан васитәси илә бирләшдирәҹәк Зәнҝәзур дәһлизи дә дахил олмагла, реҝионда бүтүн коммуникасијаларын ачылмалы олдуғуну билдирир. Өтән ил кечирилмиш ҝөрүшләрдә бу һагда ҝениш мүзакирәләр апарылса да, разылашмалар әлдә олунса да, һәлә дә ҹидди практик аддымлар атылмајыб. Бунунла белә, Азәрбајҹан ишғалдан азад едилмиш әразиләрдә бир сыра инфраструктур лајиһәләринин иҹрасына старт вериб вә онлары ҝәләҹәк коммуникасија маршрутларынын тәркиб һиссәси кими характеризә едир.

Јери ҝәлмишкән, өтән ил Азәрбајҹанла Ермәнистан арасында сәрһәд мүбаһисәләри силаһлы тоггушмалара да јол ачыб вә нәтиҹәдә һәр ики тәрәф итки вериб.

Бу хошаҝәлмәз һалларын баш вермәсинә рәғмән, 2022-ҹи илдә ики гоншу дөвләт арасында әлагәләрин нормаллашмаға доғру истигамәт алаҹағыны ҝөзләмәк лазымдыр. Хүсусилә дә реҝионун Иран, Түркијә вә Русија кими апарыҹы дөвләтләри Ҹәнуби Гафгазда сүлһ вә сабитлијинин бәргәрарында исрарлыдыр вә аидијјәти тәрәфләри бу саһәдә конструктив аддымлар атмаға тәшвиг едирләр.

342/