АБНА24 Хәбәр Верир, дөвләт катибинин Авропа вә Аврасија мәсәләләри үзрә көмәкчисинин биринҹи мүавини Дерек Һоҝан вә Милли Тәһлүкәсизлик Шурасынын Авропа үзрә баш директору Аманда Слоте сентјабрын 27-дә АТӘТ-ин Минск Групунун һәмсәдрләри вә АТӘТ -ин һазыркы сәдринин шәхси нүмајәндәси Анжеј Каспршиклә ҝөрүшүбләр.
Америкалы рәсмиләр бу ҝөрүшдә дејибләр ки, Америка Ермәнистан вә Азәрбајҹана Дағлыг Гарабағ мүнагишәси илә бағлы бүтүн һәлл олунмамыш проблемләри һәлл етмәјә көмәк етмәјә һазырдыр. Бура Гарабағ мүнагишәсинин һәлл олунмасы, Иткин дүшәнләр вә миналардан тәмизләмә дахилдир.
Гејд олунуб ки, јалныз һәлл едилмәмиш бүтүн проблемләри һәлл едән һәртәрәфли һәлл ики өлкә арасындакы мүнасибәтләри нормаллашдыра биләр вә халгларын бөлҝәдә бирликдә сүлһ ичиндә јашамасына имкан верә биләр.
Дөвләт Департаментинин бәјанатында билдирилир ки, Һоҝан вә Слоте һәмсәдрләрин сәјләрини вә Ермәнистан вә Азәрбајҹанын диалог јолу илә сүлһ просесини бәрпа етмәк гәрарыны алгышлајыблар.
Башга бир мәлумата ҝөрә исә, Нју-Јоркда кечирилән ҝөрүшдә АТӘТ-ин Минск Групунун һәмсәдрләри Дағлыг Гарабағ реҝионуна ишҝүзар сәфәрләрин бәрпасыны Бакы вә Ирәванла разылашдырыблар. Дејилдијинә ҝөрә, Ханкәндидә дә ајрыҹа ҝөрүш планлашдырылыр.
Бу ачыгламада сепаратчы режимин нәзарәт етдији әразијә һәмсәдрләрин сәфәринин планлашдырылмасы Азәрбајҹан тәрәфиндә даһа бөјүк нараһатчылыг јарадыбдыр.
Азәрбајҹан мүһарибә битәндән ән јүксәк сәвијјәдә елан едиб ки, Дағлыг Гарабағ адында бир субјект јохдур. Она ҝөрә дә һәмсәдрләрин Бакыдан иҹазәсиз Ханкәндинә сәфәрә ҹан атмалары Азәрбајҹан Республикасынын милли һакимијјәтинә мејдан охумагдан башга бир шеј дејилдир. Башга сөзлә һәмсәдр дөвләтләрин һеч бири рәсми Бакынын Гарабағ мүнагишәсинин битдијини елан етмәси илә барышмадыгларыны нүмајиш етдирмәк истәјирләр.
Азәрбајҹандакы експертләр бунунла бағлы дејирләр ки, белә бир сәфәрин тәшкил олунмасы Гарабағ сепаратчыларына гол-ганад вермәк демәкдир, онлар статус мәсәләсинин баш тутаҹағына әмин олаҹаглар, инанаҹаглар ки, артыг һәмсәдрләр статус мәсәләсини һәлл едәҹәкләр.
Хатырладаг ки, статус мәсәләсинин һәлл олунмадығыны вә онун ачыг галдығыны һәмсәдр дөвләтләр артыг Азәрбајҹанын диггәтинә чатдырыблар.
342/
