Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, мәнәвијјатсызлығын аҹы һәгигәтләри Азәрбајҹанда өзүнү ҝүнү-ҝүндән бүрузә вермәкдәдир... Белә ки, Бакынын Низами рајону әразисиндә төрәдилмиш ағыр ҹинајәтин үстү ачылыб.
Дахили Ишләр Назирлијинин верији мәлумата ҝөрә апрелин 17-дә сәһәр саатларында рајонунун Азәр Манафов күчәси ев 15/21 үнванында јанғын һадисәси баш вермәси барәдә Низами Рајон Полис Идарәси 25-ҹи Полис Шөбәсинә мәлумат дахил олуб.
Һадисә јеринә бахыш заманы мәнзилин саһиби вә һәмин үнванда тәк јашајан 1946-ҹы ил тәвәллүдлү Валидә Ибраһимованын јанмыш мејити ашкар олунуб. Даһа сонра мејит дахили вә хариҹи мүајинәдән кечирилмәси үчүн мәһкәмә тибби експертизасына ҝөндәрилиб. Експертиза заманы мүәјјән едилиб ки, һәмин шәхс јанғындан әввәл боғулараг гәтлә јетирилиб.
Әмәлијјат-ахтарыш тәдбирләри нәтиҹәсиндә баш вермиш һадисәни төрәтмәкдә шүбһәли билинән Бакы шәһәр сакини, әввәлләр мәһкум олунмуш Зија Дадашов вә Фүзули рајон сакини Амил Пиријев полис тәрәфиндән сахланылыблар.
Онлар ифадәләриндә һадисә ҝүнү “Лејла” кими таныдыглары шәхсин сифариши илә В.Ибраһимованын мәнзилинә тамаһ мәгсәдилә дахил олдугларыны, ону гәтлә јетирәндән сонра исә изи итирмәк мәгсәди илә мәнзили вә мејити јандырдыгларыны билдирибләр.
Һадисәдән сонра һәмин шәхсләр В.Ибраһимованын гызыл-зинәт әшјаларыны, мобил телефонуну вә 120 манатыны әлә кечирибләр. Гејд едәк ки. З.Дадашов вә А.Пиријев сахланылан заман гызыллар онлардан ашкар олунараг мадди сүбут кими ҝөтүрүлүб.
Гејд едилән ҹинајәтин сифаришчиси З.Дадашов вә А.Пиријевин “Лејла” кими таныдыглары пајтахт сакини әввәлләр мәһкум олунмуш Һәмидә Нәсибова да сахланылараг истинтага тәгдим едилиб. О, ифадәсиндә З.Дадашов вә А.Пиријевлә танышы В.Ибраһимованы гәтлә јетиртмәк үчүн әввәлҹәдән разылыға ҝәлдијини етираф едиб.
Диггәт: Хәбәрдән истифадә етдикдә мәнбәјә истинад лазымдыр
