Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Фәләстин Азадлыг Тәшкилатынын (ФАТ) Абдуллаһ Һурани адына Тәдгигат вә Сәнәдли Ишләр Мәркәзинин һесабламасына ҝөрә, бу илин әввәлиндән етибарән ишғалчы Исраил режим гүввәләри 54 фәләстинли ушағы гәтлә јетириб.
Мәлумата ҝөрә, мәркәзин һесабатына әсасән, Исраил режими фәләстинли ушаглара гаршы һәр нөв зоракылыға јол вериб. Ушагларын 44-ү Гәззада Бөјүк Гајыдыш јүрүшләри заманы өлдүрүлүб, 3 гәззалы ушаг исә Исраил зинданларында сахланылыр.
Һесабатда хүсуси олараг вурғуланыр ки, бу ушаглар Исраил режиминә гаршы һеч бир тәһлүкә төрәтмәдикләри һалда ишғалчы әсҝәрләр онлары гәсдән һәдәфә алараг гәтлә јетирибләр.
Һурани мәркәзинин һесабатында, һәмчинин о да гејд олунур ки, Исраил режими ил әрзиндә Иордан чајынын гәрб саһили вә Гүдсдән олан 900-дән чох ушағы һәбсә атыб, онларын 230 нәфәри һәлә дә ағыр вә гејри-инсани шәртләр алтында зинданларда сахланылыр.
Һесабат ону да вурғулајыб ки, Исраил режими һеч бир инсани вә психоложи аспектләри нәзәрә алмадан систематик олараг фәләстинли ушаглара гаршы зоракылыг вә ишҝәнҹә һалларына јол верир. Мәсәлән, бу јахынларда Офер һәрби мәһкәмәси 17 јашлы фәләстинли јенијетмә Ајһан Сабаһы 35 ил мүддәтә азадлыгдан мәһрум едиб. Јенијетмә 3 ил бундан әввәл - 14 јашында исраилли әсҝәрләрә гаршы бычаглы һүҹум төрәтмәкдә иттиһам едилиб. Јетҝинлик јашына чатмамыш шәхсә белә бир ағыр ҹәзанын верилмәси исә ушаг һүгуглары үзрә вә ишҝәнҹә әлејһинә бејнәлхалаг конвенсијалара тамамилә зиддир. Һалбуки Исраил режими бу конвенсијалары һәлә 1991-ҹи илдә имзалајыб.
Бејнәхалг-Фәләстин Ушагларын Мүдафиәси (БФУМ) тәшкилатынын һесабатында исә дејилир ки, Исраил режиминин мәгсәди бүтүн фәләстинли ушаглары шикәст бир синифә чевирмәкдир вә бу сәбәбдән ишғалчы орду мәгсәдли шәкилдә ушаглары һәгиги дөјүш ҝүлләләри вә парчалајыҹы ҝүлләләрлә һәдәфә алыр.
БФУМ Гәззада хејли сајда ушаг вә јенијетмәләрин снајперләр тәрәфиндән шикәст едилдијини әсас ҝәтириб. Тәшкилат Исраилин бу әмәлләринин бејнәлхалг һуманитар һүгуга, дөрдүнҹү Ҹеневрә конвенсијасына вә ушаг һүгуглары үзрә конвенсијаја зидд олдуғуну да билдириб.
Диггәт: Хәбәрдән истифадә етдикдә мәнбәјә истинад лазымдыр
