Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Јанварын 27-дә Бакы Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын сәдр мүавини Елчин Гасымов вә даһа 11 нәфәр - Наһид Гәһрәманов, Аға-Әли Јәһјајев, Сејфәддин Ширванов, Фәрһад Мурадов, Рамил Әлијев, Елҝүн Ахундов, Вүсал Алыш, Иса Ибраһимов, Сејмур Асланов, Әли Шаһбазов вә Әмирли Әлијевин гондарма мәһкәмә просеси давам едиб.
Иттиһама јатыб јухуда ҝөрдүкләрини јазыблар
Мәлумата ҝөрә, әдаләтсиз һаким Мајыл Бајрамовун сәдрлик етдији просесдә тәгсирләндирилән шәхсләрдән Елчин Гасымов ифадә вериб. О, һеч бир ҹинајәт төрәтмәдикләрини дејиб. Онлара верилән иттиһамлары шәр-бөһтан адландырыб:
""Мүсәлман Бирлији" Һәрәкаты јарадылдыгдан сонра дөвләт гејдијјатына алынмасы үчүн Әдлијјә Назирлијинә мүраҹиәт етдик. Һарда ҝөрүнүб ки, мүтәшәккил ҹинајәткар бирлик јарадасан, сонра да ону рәсми дөвләт гејдијјатындан кечирмәк үчүн мүраҹиәт едәсән. Иттиһама јатыб јухуда ҝөрдүкләрини јазыблар".
Сиз кимсиз ки, әдаләтли ҹәмијјәтдән данышырсыз?
Елчин Гасымов даһа сонра неҹә һәбс едилдијиндән данышыб:
"2015-ҹи ил нојабрын 5-дә ахшам 19-20 радәләриндә мәсҹиддән евә ҝәлирдим. Евимин гаршысында мүлки ҝејимли үч полис әмәкдашы дајанмышды. Онлардан бирини таныјырдым. Һәмин таныдығым полис нормал шәкилдә, һеч бир кобудлуг еләмәдән "рәис сәни ҝөрмәк истәјир", - деди. Сакитҹә машына отурдум. Мәни бөлмәјә јох, Сабунчу Рајон Полис Идарәсинә апардылар. Идарәјә чатан кими 12-14 нәфәр үстүмә төкүлүшүб, дөјмәјә башладылар. Ҝүнаһымын нә олдуғуну сорушдум. Дедиләр, "бизә мане олурсан, башламысыныз ки, әдаләтли ҹәмијјәт истәјирик, әдаләтли ҹәмијјәт гурмаға чалышырыг, сиз кимсиз ки, әдаләтли ҹәмијјәтдән данышырсыз?""
Әлимлә үзүмү тутдум ки, һеч олмаса ҝөзүмү чыхартмасынлар
Елчин Гасымов онунла бөлмәдә дүшмән кими рәфтар едилдијини сөјләјиб:
"Дедим мәҝәр әдаләтли ҹәмијјәт истәмәк, зүлмә гаршы мүбаризә апармаг ҹинајәтдир? Һансы ганунда јазылыб бу? Әдаләтли ҹәмијјәт арзусу анҹаг зүлмкарлары нараһат едә биләр. Инсанын гәлбиндә иман нуру варса, әксинә, о, зүлмә гаршы дөзүмсүз олаҹаг. Тәхминән јарым саат әрзиндә мәнә ағласығмаз ишҝәнҹәләр вердиләр. Әлимлә үзүмү тутдум ки, һеч олмаса ҝөзүмү чыхартмасынлар. Биз өләрик, амма әгидәмизи сатмарыг. Һәмин ҝүн полисләрдән ешитдијим тәһгирләри бурада демәк истәмирәм. Бир мүстәнтиг варды, һәтта Мирмөвсүм ағаны да тәһгир етди".
Лерикдә истираһәтдән јох, һәбсимдән вә бунун сәбәбләриндән данышырам
Бу заман һаким Мајыл Бајрамов Елчин Гасымовун чыхышыны дајандырыб. Ондан маһијјәти үзрә ифадә вермәсини истәјиб. Е. Гасымов исә һакимә "Мән Лерикдә истираһәтдән јох, һәбсимдән вә бунун сәбәбләриндән данышырам" дејиб.
Чыхышына давам едән Е. Гасымов тутуландан сонра барәсиндә инзибати протокол тәртиб едилдијини дејиб:
"Мәни о идарәјә нијә апармышдылар? Ертәси ҝүн инзибати протокол тәртиб етдиләр ки, ҝуја мән мәсҹиддән чыхыб сөјүш сөјмүшәм. Емин Бабајев вә Јусиф адлы полис дә мәни интизама дәвәт едиб. Табе олмамышам дејә, тутуб ҝәтирибләр бөлмәјә. Мәним һаггымда 30 сутка инзибати һәбс гәрары чыхарыланда, мәһкәмәдә һаким Емин Бабајевдән үч дәфә сорушду ки, "сәнә мүгавимәт ҝөстәрилиб?" Деди ки јох. Апелјасија Мәһкәмәси дә бу 30 сутка һәбс гәрарыны гүввәдә сахлады. Мәним һәбсимдән сонра телеканалларда бизә гаршы кампанија башлады. Бизи "террорчу" кими гәләмә верирдиләр. Јазмаға бир шеј тапмајыблар. Мән мәсҹиддә 500 нәфәрә намаз гылдырырам. Мәсҹиддән чыхыб сөјүш сөјмәјимә ким инанар?"
Истинтаг вә мәһкәмә просесләриндә ганунлар ајаг алтына атылыб
Елчин Гасымов Нардарандакы һадисәләрдән сонра прокурорлуғун онун һаггында 30 суткалыг һәбс гәрарындан протест вердикләрини билдириб:
"Тәсәввүр един, ајын 27-дә верилмиш протестдә һәлә нојабрын 28-дә диндириләҹәк полисин ифадәсинә истинад олунуб. Прокурорлуг јазыр ки, ҝуја мән нојабрын 5-дә ахшам саат 22.00 радәләриндә Сабунчу Рајон Полис Идарәсинин гаршысында полис әмәкдашларына силаһ вә ја силаһ гисминдә әшја илә хәсарәт јетирмишәм. Инзибати һәбс гәрарында јазылыб ки, мән 20 радәләриндә артыг полис идарәсинә ҝәтирилмишәм. О заман мән саат 22-дә идарәнин гаршысында неҹә ола биләрдим? Бу нә өлкәдир, ганунлара гаршы бу нә һөрмәтсизликди? Бизим ишимиз үзрә истинтаг вә мәһкәмә просесләриндә ганунлар ајаг алтына атылыб. Ҝедиб һара шикајәт едәк? Бир гурум ҝөстәрин ҝедәк дәрдимизи онлара дејәк".
Сиз ганунун тәрәфиндә олмалысыныз, тәрәф тутмалы дејилсиниз
Бу заман һаким М. Бајрамов онун чыхышыны дајандырыб вә јенә маһијјәти үзрә ифадә вермәсини истәјиб. Е. Гасымов исә һакимә "Сиз һансы партијанын үзвүсүнүз? Ахы сиз ганунун тәрәфиндә олмалысыныз, тәрәф тутмалы дејилсиниз" дејиб: "Азәрбајҹанда ганун ајаг алтына алыныб. Ким бу ганунсузлуғу һәлл едәҹәк?". Мајыл Бајрамов исә она һакимләрә суал вермәк олмаз дејиб.
Даһа сонра ифадәсинә давам едән Е. Гасымов билдириб ки, прокурорун протести әсасында инзибати һәбс гәрары ләғв олунуб вә Сабунчу прокурорлуғунда онун барәсиндә ҹинајәт иши башланыб:
"Барәмдә үч ај мүддәтинә һәбс-гәтимкан тәдбири сечилди. Мәни мәһкәмәдән Сабунчу Рајон Полис Идарәсинин мүвәггәти сахлама тәҹридханасына ҝәтирдиләр, орада полис мәнә деди ки, "ҝөзүн ајдын, Һаҹы Талеһи вә Һаҹы Зүлфүгары өлдүрмүшүк. Дедим ки, һамы өләҹәк, әсас оду, бу һәјаты шәрәфлә, ләјагәтлә баша вурасан". Орадан да мәни Күрдәханыдакы Бакы Истинтаг Тәҹридханасына ҝәтирдиләр. Бизи елә тәгдим етмишдиләр ки, санки тәҹридханаја Бен Ладени ҝәтирмишдиләр. Тәҹридханаја јени ҝәләнләр карантиндә сахланылыр. Карантинин дә ҝәзинти саһәси вар. Јери асфалтды, үстү дә ачыгды. Орада јерә отураҹаг бәркидилиб. Тәсәввүр един, декабрда әлләрими отураҹаға гандалладылар, ҝеҹәдән сәһәрә гәдәр о вәзијјәтдә сахладылар. Һәмин о ишҝәнҹәләр, сојуг нәтиҹәсиндә сәһһәтимдә хејли проблемләр јараныб".
Аллаһ сизин дүшүндүјүнүздән дә бөјүкдүр
Даһа сонра "Бандотдел"ә апарылдығыны дејән Елчин Гасымов декабрын 14-дән 24-нә кими орада һәр ҝүн ишҝәнҹәјә мәруз галдығыны билдириб:
"Мәндән Талеһин силаһ пајладығыны демәјими истәјирдиләр. Дедим, бу гәдәр инсафсыз олмајын. Билдирдиләр ки, "балаҹа ушагларына јазығын ҝәлсин вә дедијимизи јаз". Дедим, Талеһин дә ушаглары вар, едә билмәрәм. Ишҝәнҹә алтында мәндән ифадә алырдылар. Ону да дејим ки, Аллаһ сизин дүшүндүјүнүздән дә бөјүкдүр. Чүнки мәндән Талеһин әлејһинә ифадә ала билмәдиләр. Тәкҹә евимдән силаһ чыхмасы барәдә дедикләрини етдим. Бунлар ҝедиб бизим евдә ҝуја ахтарыш апарыблар. Атама бир сәнәд ҝөстәриб дејибләр ки, ахтарыш апармалары барәдә иҹазә сәнәдидир. Атам да орта тәһсилли адамдыр. Һәмин сәнәди имзалајыб. Сән демә атама ахтарышдан әввәл евдән силаһ чыхмасы һаггында сәнәдә имза етдирибләр. Мәнә дедиләр "биз сәни бу гәдәр дөјүрүк, ишҝәнҹә веририк, сән бизим әлимиздә өләҹәксән. Иттиһамы да бојнуна алмырсан. Әҝәр беләдирсә, о заман биз сәнин атаны һәбс едәрик вә дејәрик ки, силаһлар ондан тапылыб". Бундан сонра мәҹбур олуб силаһларла бағлы иттиһамы гәбул етдим. Даһа сонра дедиләр ки, сизи Әли Кәримли һәбс етдириб. Мәндән Әли Кәримли, Милли Шура, Талеһин әлејһинә ифадә алмаг истәјирдиләр. Лакин разы олмадым. "Бандотдел"дә мәнә "алты нәфәри өлдүрмүшүк, сәни дә өлдүрәрик", - дедиләр. Дедим неҹә өлдүрәҹәксиниз? Орада әмәлијјат олуб, дејирсиниз атышма иди. Мәни неҹә өлдүрә биләрсиниз ки? Дедиләр өлдүрәрик вә дејәрик ки, мәһкәмәјә апаранда гачмаг истәди биз дә ҝүлләләдик".
Бизим һакимијјәт иддиамыз олмајыб
Даһа сонра Елчин Гасымов билдириб ки, башларына бир иш ҝәлсә һакимијјәтдән билсинләр:
"Биз истәјирик Азәрбајҹан инкишаф етсин, ганунлар ишләсин. Ганунвериҹилијә гаршы нәсә етмәмишик. Етмишиксә ҝәтирин гојун ортаја. Бу полисләри јығмысыныз бура. Валлаһ онлар да хәҹаләт чәкирләр. Онлара да әзијјәт етмәјин. Биз олмајан шеји демәмишик. Биз демишик ганунун дәјәри јохдур, рүшвәтхорлуг вар. Бизим һакимијјәт иддиамыз олмајыб".
Палтарларымызы ҹырыб бизи лүт шәкилдә полис идарәсинә апардылар
Даһа сонра ифадә верән тәгсирләндирилән шәхс Аға-Әли Јәһјајев билдириб ки, тутуландан ишҝәнҹәјә мәруз галыб вә тәзјиг алтында ифадә вериб: "Нојабрын 5-дә һәбс олундум. Бундан сонра ишҝәнҹәјә мәруз галдыг. Палтарларымызы ҹырыб бизи лүт шәкилдә полис идарәсинә апардылар. Азәрбајҹанда ҝөрүнмәмиш һагсызлығы бизә етдиләр. Сабунчу рајон Полис Идарәсиндә бүтүн јери бизим бәдәнимизлә силдиләр. Ләјагәти алчалдан, тәрбијәсиз һәрәкәтләр етдиләр. Бәдәнимдә елә јер јох иди ки, ток вермәсинләр. Кишилији олмајан инсанлар бизим кишилијимизә тохунмаг истәдиләр. Бизә дејирдиләр сизи ахталајаҹағыг. Ермәнидән бетәр алчаглыг етдиләр".
Өмүрлүк һәбс дә версәләр јолумуздан дөнән дејилик
Аға-Әли Јәһјајев полис бөлмәсиндә ҝөрдүјү ишҝәнҹәләрдән данышаркән суал едир: Мәним һөрмәт етдијим шәхсә ишҝәнҹә верәндә мән нә етмәлијдим? Дуруб бахмалыјдым? Елчини тутмушдулар, биз дә она ҝөрә бөлмәјә ҝетмишдик. Өмүрлүк һәбс дә версәләр јолумуздан дөнән дејилик:
"Биз шәһидләримизлә фәхр едирик. Алчаглар ишҝәнҹә вермәклә биздә нифрәт һисси јаратмаг истәјирдиләр. Лакин биз һеч кимә нифрәт етмирик, һәтта прокурора да. Билирик ки, прокурор јахшы иш тутмур. Биз онлара команда верәнләрә нифрәт едирик. Бизим иш иҹрачыларына нифрәтимиз ола билмәз. Һакимијјәт халгла диндарлар арасында учурум јаратмаг истәјир. Биз әзилмәјә адәт етмишик, чәтинлик ҝөрмүшүк. Бу алимләр бурада отурмамалы идиләр. Биз һеч бир ҹинајәт төрәтмәмишик. Биздә силаһ олмајыб. Одлу олан бизим данышыгларымыздыр. Талеһ Бағырзадәнин мүраҹиәт китабчасы олмајыб. Буну мүстәнтиг Пәрвиз Ибајев дә билир. Бу, онларын бејинләринин мәһсулудур. Биз һеч бир заман дөвләтчилијә гаршы чыхмамышыг. Бизә "Бандотдел"дә ағ кағызлара гол чәкдирдиләр. 5 нојабрда Сабунчу Полис Идарәсинин гаршысында полисләр инсанлары дәјәнәклә вурурдулар. Адамлар һеч нә етмирдиләр. Полисләр онлара һүҹум едирдиләр. "
Мәһкәмә просеси февралын 3-дә давам едәҹәк.
Хатырладаг ки, адлары чәкилән шәхсләрин бир гисми "Мүсәлман Бирлији" Һәрәкатынын үзвүдүр. Тәшкилатын сәдри, илаһијјатчы Талеһ Бағырзадә 2015-ҹи ил нојабрын 26-да Нардаранда кечирилмиш әмәлијјат заманы һәбс олунуб. О, Бакы Ағыр Ҹинајәтләр Мәһкәмәсинин һөкмү илә 20 ил мүддәтинә азадлыгдан мәһрум едилиб.
Елчин Гасымов исә Нардаран һадисәләриндән өнҹә - нојабрын 5-дә тутулуб. О, Инзибати Хәталар Мәҹәлләсинин 310-ҹу (полис ишчисинин гануни тәләбинә гәсдән табе олмама) маддәси илә ҝүнаһландырылыб вә 30 сутка инзибати һәбс ҹәзасы алыб. Даһа сонра барәсиндә ҹинајәт иши башланыб, Нәсими Рајон Мәһкәмәсинин гәрары илә барәсиндә һәбс-гәтимкан тәдбири сечилиб. Гасымов Елчин Камал оғлу Ҹинајәт Мәҹәлләсинин 28, 214.2.1, 28, 214.2.3, 214-2, 220.2, 228.3, 228.4, 278, 279.1, 281.2, 283.2.3, 320.1, 320.2, 221.2.2 ве 315.1-ҹи маддәләри, Јәһјајев Ағаәли Елдар оғлу 28, 214.2.1, 28, 214.2.3, 214-2, 220.2, 228.3, 228.4, 233, 278, 279.1, 281.2, 283.2.3 вә 315.2-ҹи маддәләри илә, Гәһрәманов Наһид Нәсиб оғлу, Ширванов Сејфәддин Нурулла оғлу, Мурадов Фәрһад Мирзәһәсән оғлу, Әлијев Рамил Забил оғлу, Ахундов Елҝүн Әнвәр оғлу, Алыш Вүсал Надир оғлу, Ибраһимов Иса Тофиг оғлу, Асланов Сејмур Тәрлан оғлу, Шаһбазов Әли Атабала оғлу вә Әлијев Әмирәли Исмајыл оғлу Ҹинајәт Мәҹәлләсинин 28, 214.2.1, 28, 214.2.3, 214-2, 220.2, 228.3, 228.4, 278, 279.1, 281.2, 283.2.3-ҹү маддәләри илә ШӘРЛӘНИЛИРЛӘР.
Диггәт: Хәбәрдән истифадә етдикдә мәнбәјә истинад лазымдыр
