Әһлибејт (ә) Хәбәр Аһентлији-"Авропа Азәрбајҹанлылары Интеграсија вә Инкишаф Мәркәзи", "Мусават-Авропа Координасија Мәркәзи", "Авропа Демократијаја Дәстәк Алјансы" вә "Иҹтимаи Гынаг Мәркәзи" Азәрбајҹанда баш верән һадисәләрлә бағлы бәјанат јајыб.
Азәрбајҹанда сон бир илдә баш верән һадисәләр, мүстәгил вә мүхалиф фикирли иҹтимаи-сијаси тәшкилат вә шәхсләрә гаршы репрессијаларын јени далғасынын башладығыны ҝөстәрир: “Вәтәндашларымызы һимајә вә мүдафиә етмәјә борҹлу олан һүгуг-мүһафизә органлары онлары оғурлајыр, дөјүр, ишҝәнҹәләр верир, ганунсуз сахлајыр вә ја һәбс едир, барәсиндә гануна вә әдаләтә сөјкәнмәјән мәһкәмә һөкмләри чыхарыр. Инсанлар ганунсуз силаһ сахлама, наркотик истифадә етмә, дөвләт чеврилишинә ҹәһд вә диҝәр ағласығмаз сахта иттиһамларла азадлыгдан мәһрум едилирләр”.
Бәјанатда билдирилир ки, бу ҹүр иттиһамларла һәбс едиләнләр арасында сијасәтчиләр, журналистләр, блоггерләр, ҝәнҹ иҹтимаи фәаллар, һакимијјәт тәмсилчиләринин ганунсуз ҝөстәришләрини иҹра етмәјән мүстәгил дүшүнҹә саһиби вә ја һакимијјәтә јахынлығы илә сечилмәјән шәхсләр вар:
“Неҹә ки, бу јахынларда һејкәлә јазылан "Гул бајрамыныз мүбарәк" ифадәсинә ҝөрә Гијас Ибраһимов вә Бајрам Мәммәдова һеч бир әсас олмадан 10 ил һәбс ҹәзасы верилди. Мүхтәлиф репрессив үсулларла һәбс олунумуш илаһијјатчы Талеһ Бағырзадә, АХҸП сәдринин мүавини Фуад Гәһрәманлы вә диҝәрләринин мәһкәмә просеси бу јахынларда баша чатды. Иттиһамчы ролунда чыхыш едән, әслиндә сијаси сифариш јеринә јетирән прокурор һәмин шәхсләрә чох ағыр ҹәза, һәтта бәзиләринә ән ағыр ҹәза - өмүрлүк һәбс истәди.
Фикримизҹә, Нардаран һадисәләри 2003-ҹү илин мәлум октјабр һадисәләриндән сонра өлкәдә баш верән ән гәддар репрессив һадисәләрдән биридир. Индијәдәк Нардаран һадисәләри илә бағлы 70 нәфәр шәрләнәрәк мүхтәлиф мүддәтләрә һәбс едилиб. Бу һадисәләрдә 6 вәтәндашымыз һәләк олуб. Мәһкәмә просесиндә баш верәнләр ајдын ҝөстәрди ки, һеч бир әсаслы сүбут вә факт олмадан әмәлијјат һазырланыб, гејри-пешәкар сәвијјәдә иҹра едилиб”. Бәјанат мүәллифләри мәһкәмәдә баш верәнләри диггәтлә изләдикләрини билдирирләр: “Бурада нараһатлыг доғуран даһа бир мәгамы өлкәни идарә едәнләрин вә вәтәндашларымызын диггәтинә чатдырмаг истәјирик. Мүһакимә едиләнләрин бөјүк әксәријјәти ҝәнҹләрди. Һесаб едирик ки, бу, чох ҹылыз, примитив бир гисасчылыг, ҹәмијјәтин актив кәсиминин ҝөзүнү бир нөв горхутмаг актыдыр. Бу, ҹәмијјәтдә гисасчылығы, дүшмәнчилији көрүкләјән бир актдыр. Бу дүшмәнчилик кимә вә нәјә лазымдыр? Сиз идарәчиләр, мәмурлар бу ҝүн вә ҝәләҹәк гаршысында мәсулијјәтинизи бәлкә бир даһа дүшүнәсиниз? Дәјәрли һәмвәтәнләр, шәрләниб нөвбәти һәбс олунан исә сән ола биләрсән, мән ола биләрәм, сәнин вә ја мәним өвладым, валидејним, гардашым, баҹым, достум вә с. ола биләр. Азәрбајҹанда бу ҹүр етираз аксијаларына башламаг дәрһал шәрләниб һәбс олунмаға бәрабәр олдуғундан инсанлар сусур, баш верәнләр ганунсузлуглара адекват етираз аксијалары кечирә билмирләр”.
Бәјанат мүәллифләри баш верәнләрлә бағлы аксија кечирмәјин ваҹиблијини вурғулајырлар: “Биз Авропадајыг, дөвләт иттиһамчысы тәрәфиндән истәнилән ҹәзанын адекват олмадығы тәһсилиндән, ихтисасындан вә пешәсиндән асылы олмајараг һәр кәсә бәллидир. Белә олан һалда Авропада јасајан, сијаси мәнсубијјәтиндән асылы олмајараг, һамымыз өлкәмиздә апарылан сијаси репрессијаны гынамаг үчүн 18 јанвар 2017-ҹи илдә Берлиндә Азәрбајҹан сәфирлијинин гаршысында топлашаг. Мүхтәлиф бәһанәләрлә һәбс олунан Нардаран иши дә дахил бүтүн сијаси мәһбусларын дәрһал һәбсдән азад олунмасыны бирликдә тәләб едәк. Азәрбајҹан һакимијјәти сијаси тәгибләрә, ганунсуз һәбсләрә сон гојмаса, Авропада олан бүтүн Азәрбајҹан сәфирликләринин гаршысында күтләви етираз аксијаларыны давам етдирәҹәјик”.
Диггәт! Хәбәрдән истифадә етдикдә мәнбәјә истинад лазымдыр!
