Әһлибејт (ә) Хәбәр Аҝентлијинин вердији мәлумата ҝөрә-Өтән ил нојабрын 26-да Нардаранда әмәлијјат кечириләрәк еви ҝүлләбаран едилән, ики гардашы гәтлә јетирилән, өзү исә алдығы ҝүлләләрдән ифлиҹ олан вә буна бахмајараг, һәбс олунан Әбүлфәз Бүнјадов азадлыға бурахылыб.
Гејд едәк ки, Әбүлфәз Бүнјадов Нардаран әмәлијјатында ҝүлләләнәндән сонра јатаг хәстәси олдуғундан һәбс олунандан бәри Пенитенсиар Хидмәтин Мүалиҹә Мүәссисәсиндә сахланылырды. Бахмајараг ки, һәмин әмәлијјат нәтиҹәсиндә һәбс олунан Мүсәлман Бирлији Һәрәкатынын сәдри, илаһијјатчы Талеһ Бағырзадә вә диҝәрләри илә јанашы, она да ҹинајәт иши ачылмыш вә ағыр иттиһамлар верилмишди. Амма о, һәрәкәт едә билмәдијиндән барәсиндәки ҹинајәт иши ајрылды вә мәһкәмәјә ҝөндәрилмәди.
Гејд едәк ки, әмәлијјат заманы Әбүлфәз Бүнјадовун гардашы Рәфаел Бүнјадов да ҝүлләләнәрәк өлдүрүлүб. Талеһ Бағырзадә мәһкәмәдә ифадәсиндә билдирмишди ки, диҝәр гардашы Фәраил Бүнјадов онларла бирликдә һәбс олунмушду. Лакин онлары евдән Баш Мүтәшәккил Ҹинајәткарлыгла Мүбаризә Идарәсинә апараркән јолда полисләр автоматын гундағы илә башына вура-вура өлдүрүбләр.
Диггәт! Хәбәрдән истифадә етдикдә мәнбәјә истинад лазымдыр!
