Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Наркотик иттиһамы илә һәбсдә оланҝәнҹ фәал Гијас Ибраһимов сентјабрын 20-дә өз иши үзрә мәһкәмәнин һазырлыг иҹласында дејиб: “Наркотикә һеч бир аидијјәтим јохдур. Һејдәр Әлијевин һејкәлинин постаментинә шүар јаздығыма ҝөрә полисләр евимә наркотик атыблар”.
Ҝәнҹ фәалын вәкили Елчин Садыгов Г. Ибраһимовун ишинә хитам верилмәси барәдә вәсатәт галдырыб. Әнвәр Сејидовун сәдрлик етдији һакимләр коллеҝијасы вәсатәти тәмин етмәјиб.
Вәкил Гијасын әмәлиндә ҹинајәт тәркиби олмадығыны, наркотикин онун олмасы барәдә етираф характерли әризәни ишҝәнҹә алтында јазмаға мәҹбур едилдијини дејиб.
Е.Садыгов мүвафиг органлардан бәзи сүбутларын алынмасы вә мүәјјән шәхсләрин әлавә шаһид гисминдә диндирилмәси һагда да вәсатәт галдырыб. Е. Садыгов һәмчинин даһа бир вәсатәт галдырараг, Гијасҝилин евиндәки ахтарышла бағлы онун анасы Шура Ибраһимованын да әлавә шаһид гисминдә диндирилмәсини истәјиб. О, 5 сајлы һүгуг мәсләһәтханасындан вәкил Огтај Әлијевин мај ајында чыхдығы ишләрин сијаһысынын да ҝәтирилмәсини тәләб едиб. Г. Ибраһимов һәбс олунаркән вә илкин диндирмә заманы һәмин вәкил она дөвләт һесабына тәјин едилмиш мүдафиәчи олуб: “Гијас бу вәкили ҝөрмәдијини билдирир. Диндирилсин, ҝөрәк, иштирак етмәдији һалда евдә ахтарыш протоколуна неҹә имза атыб?”.
“Гијас Ибраһимов ишҝәнҹәјә мәруз галыб вә нәтиҹәдә төрәтмәдији ҹинајәти етираф етмәјә мәҹбур едилиб. О ҝөрүнтүләрә бахыш кечирилсә, һәмин вахт Гијасын ишҝәнҹәјә уғрадығы ҝөрүнәҹәк. Әмәлијјат китабына ҝәлинҹә, иш материалларына ҝөрә, Гијас Ибраһимовун Әкрәм адлы Иран вәтәндашындан 1 кг 012 грам һероин алыб евләриндә сахламасы барәдә әмәлијјат мәлуматы дахил олуб вә бунун әсасында әмәлијјат кечирилиб. Наркотикин һәтта грамынадәк өнҹәдән бәлли олмасы ҝөстәрир ки, ону әввәлҹәдән чәкәрәк, ҝәтириб евә јерләшдирибләр”- дејә Е. Садыгов билдириб.
Вәкилин һазырлыг иҹласында сонунҹу вәсатәти ҝәнҹ фәал һаггында һәбс-гәтимкан тәдбиринин дәјишдирилиб ев дустаглығы илә әвәзләнмәси барәдә олуб.
Һакимләр гыса мүшавирәдән сонра һазырлыг иҹласынын гәрарыны ачыглајыблар. Мәлум олуб ки, мәһкәмә јалныз Шура Ибраһимованын диндирилмәси вә Нәриманов РПИ-дән камера ҝөрүнтүләринин алынмасы барәдә вәсатәтләри тәмин едиб, диҝәр вәсатәтләрсә рәдд едилиб.
Иш мәһкәмә бахышына верилиб. Мәһкәмә сентјабрын 27-нә тәјин олунуб.
Гијас Ибраһимов башга бир ҝәнҹ фәал Бајрам Мәммәдовла бирҝә мајын 10-да сахланыб. Мајын 12-дә Хәтаи Рајон Мәһкәмәси һәр ики ҝәнҹ һаггында 4 ајлыг һәбс-гәтимкан тәдбири сечиб. Онлар Ҹинајәт Мәҹәлләсинин 234-ҹү (ганунсуз олараг наркотик васитәләри, психотроп маддәләри һазырлама, истеһсал вә әлдәетмә, сахлама, дашыма, ҝөндәрмә вә ја сатма) маддәси илә иттиһам едилирләр. Иттиһамлар тәсдигләнәрсә, ҝәнҹләри 5 илдән 12 иләдәк һәбс ҹәзасы ҝөзләјир. Диҝәр ҝәнҹин – Бајрам Мәммәдовун иши үзрә истинтаг һәлә битмәјиб. Һәр ики ҝәнҹ иттиһамла разылашмыр вә ишҝәнҹә алтында ифадә вермәјә мәҹбур едилдикләрини билдирир.
Дахили Ишләр Назирлији вә Омбудсман Апараты ҝәнҹләрә ишҝәнҹә верилмәсини тәкзиб едиб.
Ҝәнҹләрин кечмиш президент Һејдәр Әлијевин абидәсинә шүар јаздыгларына ҝөрә һәбс едилдији билдирилир.
Диггәт: Хәбәрдән истифадә етдикдә мәнбәјә истинад лазымдыр
