Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Јанварын 28-дә Азәрбајҹан Республикасы фөвгәладә һаллар назири Кәмаләддин Һејдәров вә Азәрбајҹанын Игтисадијјат вә сәнаје назири Шаһин Мустафајев өлкәмиздә сәфәрдә олан Иран Ислам Республикасынын игтисади мәсәләләр вә малијјә назири Әли Тајебниа илә ајры ајрылыгда ҝөрүшүбләр.
Гонаглары сәмими саламлајан Кәмаләддин Һејдәров билдириб ки, ики өлкә президентләринин сәјләри нәтиҹәсиндә интенсив инкишаф едән икитәрәфли әлагәләр јени вүсәт алыб. О, Азәрбајҹан Республикасы Фөвгәладә Һаллар Назирлијинин фәалијјәти, һәмчинин, өлкәмиздә фөвгәладә һалларын гаршысынын алынмасы вә нәтиҹәләринин арадан галдырылмасы саһәсиндә ҝөрүлән ишләр һаггында гонаглара әтрафлы мәлумат вериб.
Иран Ислам Республикасынын назир сәмими гәбула ҝөрә тәшәккүрүнү билдириб, рәһбәрлик етдији назирлијин Азәрбајҹанын мүвафиг гурумлары илә әмәкдашлығындан бәһс едиб. О, ики өлкәнин ујғун гурумлары арасында фөвгәладә һалларын идарә олунмасы саһәсиндә дә әмәкдашлығын ҝениш перспективләри олдуғуну билдириб.
Ҝөрүшдә гаршылыглы мараг доғуран бир сыра мәсәләләрә даир әтрафлы фикир мүбадиләси апарылыб.
Даһа сонра олан Иран Ислам Республикасынын игтисади мәсәләләр вә малијјә назири Азәрбајҹан Рспубликасынын Игтисадијјат вә сәнаје назири Шаһин Мустафајев илә ҝөрүшүб.
Ҝөрүшдә Шаһин Мустафајев Азәрбајҹан вә ИИР арасында сијаси, игтисади вә һуманитар әлагәләрин инкишаф етдијини, әмәкдашлығын ҝенишләнмәсиндә дөвләт башчыларынын сәфәрләринин хүсуси әһәмијјәтини вурғулајыб. Өтән ил Азәрбајҹан вә Иран Ислам Республикасы президентләринин гаршылыглы рәсми сәфәрләри, кечирилән ҝөрүшләр, мүхтәлиф саһәләрдә имзаланмыш сәнәдләр өлкәләримиз арасында әлагәләрин инкишафына бөјүк төһфә вериб. Азәрбајҹан вә ИИР арасында сијаси әлагәләрин јүксәк сәвијјәси игтисади мүнасибәтләрин инкишафына бөјүк имканлар јарадыр. Индијәдәк ики өлкә арасында 108 сәнәд, о ҹүмләдән игтисади саһәдә 30-дан чох сәнәд имзаланыб. Азәрбајҹан Республикасы илә Иран Ислам Республикасы арасында игтисади, тиҹарәт вә һуманитар саһәләр үзрә Дөвләт Комиссијанын фәалијјәти өлкәләримиз арасында әлагәләрин инкишафына өз төһфәсини верир. Һазырда Азәрбајҹанда игтисадијјатын мүхтәлиф саһәләриндә 447 ИИР инвестисијалы ширкәт фәалијјәт ҝөстәрир. Назир Шаһин Мустафајев Азәрбајҹан вә Иран Ислам Республикасы арасында игтисади әлагәләрин ҝенишләнмәси, јени әмәкдашлығын гурулмасы бахымдан бизнес форум, ишҝүзар ҝөрүш вә сәрҝиләрин кечирилмәсинин әһәмијјәтини вурғулајыб.
Ҝөрүшдә Азәрбајҹан вә Иран Ислам Республикасы арасында игтисади әлагәләрин ҝенишләндирилмәсинә, сәнаје, кәнд тәсәррүфаты, енерҝетика, алтернатив енержи, нәглијјат вә с. саһәләрдә әмәкдашлығын инкишафына даир мүзакирәләр апарылыб.
Ҝөрүш чәрчивәсиндә “Азәрбајҹанда Ихраҹын вә Инвестисијаларын Тәшвиги Фонду (АЗПРОМО) вә Иран Ислам Республикасынын Инвестисија, Игтисадијјат вә Техники Јардым Тәшкилаты (ОИЕТАИ) арасында инвестисија саһәсиндә әмәкдашлыға даир Ишчи Групунун јарадылмасы һаггында” Анлашма Меморандуму имзаланыб.
Диггәт: Хәбәрдән истифадә етдикдә мәнбәјә истинад лазымдыр
