Ҹорҹ Соросун Бакы планлары ифласа уғрады – онлар мәғлуб олду

Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Дүнјада “ингилаб ихраҹатчысы” кими танынан Ҹорҹ Соросун рәһбәрлик етдији “Сорос” фондунун Бакы нүмајәндәлијинин офиси ләғв едилиб.

Вәкил Елчин Садыгов вердији ачыгламасында билдириб ки, АҸИЈФ-ин (Ачыг Ҹәмијјәт Институтуна Јардым Ҹәмијјәти – Сорос Фонду - ред) Азәрбајҹан нүмајәндәлијинин ләғв едилмәси илә бағлы ишләрә башланылыб: “Ләғветмә ишләрини апармаг АҸИЈФ-ин етибарнамә әсасында нүмајәндәси кими мәнә һәвалә едилиб. Фонд Азәрбајҹанын һәмишә дост өлкә олдуғуну, бу мүддәт әрзиндә өлкәдә тәһсилин, медианын вә һүгугун алилијинин тәмини үчүн чалышдығыны бәјан едир. АҸИЈФ-нин мәгсәди Азәрбајҹан дөвләтинин вә ҹәмијјәтинин рифаһы олуб. Бу мәгсәдлә мүхтәлиф дөвләт гурумлары, коммерсија вә гејри-коммерсија тәшкилатлары илә әмәкдашлыг едиб. АҸИЈФ Азәрбајҹан нүмајәндәлијинин ишчиләри вә офиси јохдур, офис бошалдылыб. Үмид едирик ки, сон ҝүнләр мәтбуатда АҸИЈФ-ин Азәрбајҹандакы нүмајәндәлији илә бағлы әсассыз фикирләр вә мәлуматлар ҹидди гәбул едилмәјәҹәк, башладылан просесләр һүгугун алилији чәрчивәсиндә һәлл едиләҹәк”.

Вәкил фондун Азәрбајҹандакы нүмајәндәлијинин 2010-ҹу илдән фәалијјәтини дајандырдығыны билдириб. Онун сөзләринә ҝөрә, индики проседур там һүгуги проседурдур вә сөһбәт гејдијјатын, јәни һүгуги шәхсин ләғвиндән ҝедир.

“Әмлакла бағлы мәсәлә барәдә мәнә етибарнамә верилмәјиб. Фондун Азәрбајҹанда дашынмаз әмлакы олмалыдыр. Лакин бу һагда дәгиг билмирәм. Һазырда бејнәлхалг тәшкилатларын Азәрбајҹандакы нүмајәндәликләри, о ҹүмләдән фондла бағлы да истинтаг апарылыр. Ачыг Ҹәмијјәт Институту Јардым Фондунун Баш Офиси дүшүнүр ки, мәсәлә һүгугун алилији чәрчивәсиндә һәлл олунаҹаг”, - дејә о билдириб.

2010-ҹу илә гәдәр фондун Идарә Һејәтинин рәһбәри олмуш политолог Зәрдүшт Әлизадә вердији ачыгламасында Бакы офисинин 2011-ҹи илдә бағландығыны билдириб. Онун сөзләринә ҝөрә, нүмајәндәлик “Туран” Информасија Аҝентлијинин рәһбәри Меһман Әлијевин сәдрлији дөврүндә гапаныб: “Мән 2005-ҹи илдән 2009-ҹу илә гәдәр Идарә Һејәтинин сәдри олмушам. 2011-ҹи илдә фонду тәдриҹән бағладылар. Әввәлҹә бирҹә сәһијјә програмынын иши давам етдирилди. Баша чатмајан лајиһәләрлә әлагәдар бир нечә нәфәр ишдә сахланылмышды. Һәмин програм сона чатандан сонра “Сорос” тамамилә бағланды вә бүтүн ишчиләр азад едилди. 2010-ҹи илдән сонра бинада бир мүсаһиб, бир мүһафизәчи галмышды. Фактики олараг ишләмирди. Мәндә олан мәлумата ҝөрә, онун бинасыны сөкүб јериндә јенисини тикибләр. Фондун Азәрбајҹандакы ишләри кәнардан идарә олунурду вә Ишчи Групу сәвијјәсиндә иш ҝөрүлүрдү. Ола билсин, инди һүгуги бахымдан ләғв едилиб”.

З. Әлизадә фондун бағланма сәбәбинин она бәлли олмадығыны дејиб.

“Бу, Ҹорҹ Соросун шәхси офиси иди. Кефи белә истәди вә етди. 2011-ҹи илдә фондун реҝионал координатору Бакыја ҝәлмишди вә бизимлә ҝөрүшүб вәзијјәти өјрәнмәк истәди. Биз дә һеч нәјин дәјишмәдијини дедик. Мәсәлә белә дә галды”, - дејә о билдириб.

Хатырладаг ки, “Сорос” Фонду Азәрбајҹанда 2011-ҹи илдә бағланыб вә буна сәбәб кими фонддакы коррупсија фактлары ҝөстәрилиб.

Лакин бунунла јанашы, фондун Азәрбајҹанда әсас фәалијјәти һагда бир чох иддиалар вар иди. Иддиалара ҝөрә, фонд өлкәдә “ингилабчылар”ын јетишдирилмәси илә мәшғул олуб. Фондун 2002-ҹи илдән 2014-ҹү илә гәдәр мүхалифәтјөнүмлү ГҺТ-ләрә 25 милјон доллардан чох пул ајырдығы дејилир. Ҹорҹ Соросун Ҝүрҹүстан, Украјна вә бир чох ингилабларда иштиракы һагда ҹидди фактлар вар.

Јашыллар Партијасынын сәдри Мајис Ҝүләлијев ведији ачыгламасында исә, “Сорос” фондунун Азәрбајҹан мүхалифәтинә ҹидди дәстәк вердијини билдириб.

“Үмумијјәтлә, бу фонда пост-совет мәканында “гызыл ҝүл”, “мәхмәри”, “нарынҹы” ингилабларда иштирак едиб. Һәтта “Сорос” фондунун глобаллашма илә бағлы һесабатында ачыг шәкилдә јазылыб ки, “әҝәр һөкумәт бизимлә әмәкдашлыг етмәк истәмирсә, мүхалифәт гүввәләрини малијјәләшдирмәклә онлардан тәзјиг васитәси кими истифадә олунмалыдыр”. Ашкар шәкилдә гејд олунуб. Бу, фондун әсл мәгсәдиндән хәбәр верир”, - дејә о билдириб.


Диггәт: Хәбәрдән истифадә етдикдә мәнбәјә истинад лазымдыр