Әһли Бејт (әлејһимус сәлам) -АБНА- Хәбәр Аҝентлији- Ҹаван вә сағлам олмаг һәр бир инсанын арзусудур. Дүздүр, ҹаван галмаг заманын ихтијарындадыр, амма өзүнү һәмишә ҹаванлыгда олдуғу кими сағлам һисс етмәк инсанын өз әлиндәдир. Бунун үчүн һеч дә бүтүн вар-дөвләтини сәрф етмәјә еһтијаҹ јохдур. Садәҹә илләрин сынағындан чыхмыш ҹаванлыг ҹөвһәри олан јулаф һәлиминдән истифадә етмәк лазымдыр.
Һәлә Һиппократ өз дөврүндә бу һәлимин гејри-ади ҝүҹүнә инанараг инсанлара ону һеч бир һәким ҝөстәриши олмадан истифадә етмәји мәсләһәт билиб. Һиппократдан чох-чох сонралар франсыз Жан де Катерин јулаф һәлиминдән мүнтәзәм истифадә едәрәк 120 ил өмүр сүрүб вә бунунла да бу ҹаванлыг ҹөвһәринин мөҹүзәсини нүмајиш етдириб. Һәмчинин гәдим Тибет тәбабәтиндә дә бу һәлимдән узунөмүрлүлүк үчүн ҝениш истифадә олунуб.
Јулаф биткиси һаггда гыса мәлумат
Тарихи
Бу битки буғда вә арпа илә мүгајисәдә даһа ҝәнҹдир. Ону бизим ерамыздан әввәл 2-ҹи минилликдә беҹәрмәјә башламышлар. Узун илләр әрзиндә јулаф алаг оту сајылырды, јалныз шимал бөлҝәләрдә даһа давамлы олараг һәмин әкин саһәләриндә беҹәрилмәјә башламышдыр.
Характеристикасы
Јулаф дәјәрли әрзаг вә јем биткисидир. Онун гида вә јем кејфијјәти дәнин јүксәк биоложидәјәрилә мүәјјәнләшдирилир. Јулафын зүлалында буғданын зүлалындан 10 фаиз артыг әвәзедилмәз амин туршусу олан лизин (384 мг/100 г) мөвҹуддур. Јулафын дәниндә јағын мигдары 6,2 фаизә бәрабәрдир, бу да диҝәр дәнли биткиләрдәки јағын мигдарындан артыгдыр (човдар – 2,2 фаиз, буғда – 2,5 фаиз). Истифадә истигамәтләринә ујғун олараг јулафын дәнинә спесифик техноложи тәләбләр ирәли сүрүлүр. Белә ки, ушаг гида мәһсулларынын истеһсалына јөнәлдилмиш дәнин туршулуғу 5 граддан артыг олмамалыдыр. Јармаја емал заманы әһәмијјәтли тәләбләр ирәли сүрүлүр: өзәјин чәки пајы (63 фаиздән аз), диҝәр мәдәни биткиләрин дәнләринин тәркиби вә хырда дәнләрин пајы (5 фаиздән артыг) олмамалыдыр. Спирт истеһсалында јулафын мајаја емал заманы әсас ҝөстәриҹиләр кими дәнин натурасы вә онун 5-ҹи ҝүнүндә ҹүҹәрмә габилијјәти (90 фаиздән аз олмајараг) нәзәрә алыныр. Јемлик тахыла натура үзрә јүксәк тәләбләр ирәли сүрүлүр.
Јулаф һәлими неҹә һазырланыр?
3 стәкан јулафын үзәринә 3 литр су әлавә едилиб гајнадылыр. Гајнадыгдан сонра 20 дәгигә зәиф одун үзәриндә сахланылыр. Бундан сонра ону јахшыҹа бүкмәк лазымдыр. Бир сутка бу вәзијјәтдә сахладыгдан сонра тәнзифдән кечирәрәк сүзүлүр, үзәринә 100 грам бал әлавә едилир вә јенидән гајнадылыр. Анҹаг бу дәфә одун үстүндә чох сахланылмамалыдыр. Гајнара дүшән кими ҝөтүрүлмәлидир. Ҝөтүрдүкдән сонра сојудуб, шүшә габа бошалдыб сојудуҹунун алт ҝөзүндә вә ја сәрин јердә сахланылмалыдыр. Алынмыш һәлими һәр јемәкдән 30 дәгигә әввәл 100 грам кичик гуртумларла ичмәк лазымдыр. Истифадәдән габаг һәлимин үзәринә бир нечә дамҹы лимон ширәси дә әлавә етмәк олар. Бир курс гәбул үчүн јулаф һәлимини јухарыда ҝөстәрилдији кими үч дәфә һазырламаг лазымдыр. Јаз вә пајыз ајларында јулаф һәлиминин тәсири даһа ҝүҹлү олур.
Организминизи ҹаванлашдырмаг вә сағлам олмаг истәјирсинизсә, тәнбәллик етмәјин. Сиз дә илләрин сынағындан кечмиш ҹаванлыг ҹөвһәриндән бәһрәләнин.
Диггәт: Хәбәрдән истифадә етдикдә мәнбәјә истинад лазымдыр
