Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, “Хәзәрин һүгуги статусу илә бағлы өлкәләр арасындакы данышыгларда ирәлиләјишләр вар. Һәштәрханда дөвләт башчыларынын дөрдүнҹү саммити сәмәрәли кечди вә дүшүнүрәм ки, өтән ҝөрүшләрдән ән сәмәрәлиси иди.”
Бу сөзләри Тренд-ә ексклүзив ачыгламасында Президент Һәсән Руһанинин Азәрбајҹана ҝөзләнилән сәфәри илә бағлы һазырда Бакыда олан Иран Ислам Республикасынын хариҹи ишләр назиринин Асија вә Океанија өлкәләри үзрә мүавини вә бу өлкәнин Хәзәр мәсәләләри үзрә хүсуси нүмајәндәси Ибраһим Рәһимпур дејиб.
И.Рәһимпур билдириб ки, Хәзәрин һүгуги статусу илә бағлы өлкәләр арасында јахынлашма вар вә мүзакирәләрдә ирәлиләјиш мүшаһидә олунур: "Беш Хәзәрјаны өлкә арасында бахышлар бир-биринә јахынлашса да, һәләлик бәзи мәсәләләр вар ки, һәлл олунмамыш галыр. Хәзәрјаны өлкәләр бир әлин беш бармағы кимидирләр вә бу ағыр јүкү бирләшәрәк галдырмалыдырлар".
Иранлы дипломат гејд едиб ки, һәләлик өлкәләр арасында Хәзәрдә 5 өлкәнин иштиракы илә бирҝә һәрби тәлимләрлә бағлы һансыса разылыг әлдә олунмајыб: “Әлбәттә, өлкәләр арасында икитәрәфли әмәкдашлыглар вар, амма һәләлик һәрби мәсәләләрлә бағлы бештәрәфли разылыг програмлашдырылмајыб. Тәһлүкәсизлик саһәсиндә сәнәд имзаланыб. Парламентләр дә тәсдиг едиб вә тезликлә иҹрасына башланаҹаг. Амма һәрби саһә өнәмли мәсәлә олдуғу үчүн бир гәдәр вахта вә данышыглара еһтијаҹ вар”.
О әлавә едиб ки, Хәзәрјаны өлкәләр өз тәһлүкәсизлијини тәмин едә билирләр, һеч бир хариҹи өлкә вә ја гүввәнин бу дәнизә ҝирмәсинә иҹазә вермирләр вә бу, өнәмли мәсәләдир.
Диггәт: Хәбәрдән истифадә етдикдә мәнбәјә истинад лазымдыр
