Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, 25 Октјабр, 2014-ҹү илдә Азәрбајҹан Республикасынын Президенти јанында Дөвләт Идарәчилик Академијасынын (ДИА) 15 иллик јубилеји мүнасибәтилә академијанын елми шурасынын иҹласы кечирилиб.
Азәрбајҹан президентинин иҹра апаратынын рәһбәри Рамиз Меһдијев Дөвләт Идарәчилик Академијасында бу али мәктәбин 15 иллик јубилеји мүнасибәтилә кечирилән иҹласда Азәрбајҹанда “зијалы” анлајышынын неҹә деградасијаја уғрамасынын вә бир зијалынын (мисал олараг Доктор Мөвсүм Сәмәдов) өлкәдәки проблемләри дилә ҝәтирсә, дәрһал “арзуолунмаз шәхс” елан едиләрәк һакимијјәтин дүшмәнинә чеврилдији мәсәлә үзәриндән ваз кечәрәк диндар тәбәгәјә һүҹум чәкәрәк дејиб: «Мән биләрәкдән мәсәләни белә кәскин гојурам ки, гадынлары вә үмумән ҹәмијјәтимизи тәзәдән ҹәһаләтә, мөвһумата, агрессив диндарлыға сүрүкләмә просесләринин нә дәрәҹәдә тәһлүкәли олдуғуна диггәтинизи ҹәлб едим».
«Һиҹабла тәһсил мүәссисәләринә, о ҹүмләдән али мәктәбләрә ҝетмәк истәјәнләрин сајы да ҝүндән-ҝүнә артыр».
Онун АзәрТАҹ-да дәрҹ едилән Һиҹабла бағлы анти-Ислам чыхышынын әсас һиссәси:
Биз һәмишә фәхр етмишик ки, өлкәмиздә гадынлар чох јүксәк мөвге тутараг, демәк олар, сијаси, игтисади вә сосиал һәјатымызын бүтүн саһәләриндә лајигинҹә тәмсил олунублар. Лакин ҹәми ики рәгәми сәсләндирмәк истәрдим. Бу ил али мәктәбләрә гәбул имтаһанлары заманы Јардымлы вә Лерик рајонларындан сәнәд верәнләр арасында гызлар мүвафиг олараг 16 вә 21 фаиз тәшкил едиб. Бир сыра рајонларда, мисал үчүн, Масаллы, Ҹәлилабад, Гобустан, Ағсу вә Сабирабадда сәнәд верән гызларын сајы 40 фаиздән аздыр:
“Бунунла јанашы, мәсәлән, Загатала рајонунда оғланларын сајы 40 фаиздән аздыр. Бу, ону ҝөстәрир ки, ады чәкилән бөлҝәләрдә кифајәт гәдәр мүрәккәб, ҝизли вә латент просесләр ҝедир. Мән биләрәкдән мәсәләни белә кәскин гојурам ки, гадынлары вә үмумән ҹәмијјәтимизи тәзәдән ҹәһаләтә, мөвһумата, агрессив диндарлыға сүрүкләмә просесләринин нә дәрәҹәдә тәһлүкәли олдуғуна диггәтинизи ҹәлб едим. 1990-ҹы илләрдә Азәрбајҹана ҝәлән хариҹи туристләр тәәҹҹүблә гејд едирдиләр ки, бура мүсәлман өлкәсидир, лакин биз, демәк олар, бир нәфәр дә һиҹаблы гадына раст ҝәлмәдик.
Бу ҝүн онлар да, сиз дә, елә мән дә ҝөрүрүк ки, белә ханымларын сајы кәскин сурәтдә артмагдадыр. Һиҹабла тәһсил мүәссисәләринә, о ҹүмләдән али мәктәбләрә ҝетмәк истәјәнләрин сајы да ҝүндән-ҝүнә артыр. Мән әмин дејиләм ки, бу, ҝәнҹ ханымларын өзләринин дахили мәнәви тәләбатыдыр. Тәһлил ҝөстәрир ки, бу, әксәрән аиләдахили мүһитин тәләбидир вә ҝәнҹ гызлар да буна табе олурлар. Бир чох реҝионларда, хүсусилә дә ҹәнуб бөлҝәсиндә азјашлы гызларын тәһсилдән јајынараг гејри-рәсми аилә гурмасы артыг ади һала чеврилир. Онлар нә физики, нә дә мәнәви ҹәһәтдән һазыр олмадыглары һалда еркән јашда ана олурлар. Бу мәсәлә һәм сәһијјә, һәм тәһсил, һәм дә һүгуг мүһафизә органларынын диггәтиндән неҹә јајыныр?”
Диггәт: Хәбәрдән истифадә етдикдә мәнбәјә истинад лазымдыр
