Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, өтән ҝүн Азәрбајҹан Ислам Партијасы республиканын Әдлијјә Назирлији Пенитенсиар Хидмәтинин рәиси ҝенерал Мәдәт Гулијевә Һаҹы Мөвсүм Сәмдова гаршы һәјата кечирилән әдаләтсиз мүнасибәтә етираз едән мүраҹиәт үнванлајыб.
Мүраҹиәтдә дејилир:
Азәрбајҹан Республикасы Әдлијјә Назирлији Пенитенсиар Хидмәтинин рәиси ҹәнаб ҝенерал Мәдәт Гулијевә мүраҹиәт
Һөрмәтли ҝенерал,
Азәрбајҹанда ҹинајәткарлыға гаршы мүбаризә тәдбирләринин һәјата кечирилмәсиндә рәһбәрлик етдијиниз тәшкилатын мүстәсна ролу олдуғуну инкар етмәк олмаз. Инанырыг ки, ҹәзачәкмә мүәссисәләриндә мәһбусларын ислаһ олунмасы вә ҹәмијјәтә әсл јарарлы вәтәндаш кими тәгдим едилмәсини башлыҹа вәзифәниз һесаб едир вә бу мәсулијјәтин өһдәсиндән ҝәлмәјә чалышырсыныз. Хүсусилә, сон дөврләр апарылан ислаһатлар ҝәләҹәкдә ҹәзачәкмә мүәссисәләринин дүнја стандартларына ујғунлашдырылмасы истигамәтиндә мүһүм дәјишикликләрә апара биләр.
Һөрмәтли М. Гулијев!
Бизи вә Азәрбајҹан ҹәмијјәтини вә илк нөвбәдә инанҹлы тәбәгәни дүшүндүрән, ҹидди нараһат едән бир сыра мүһүм мәсәләләри нәзәринизә чатдырмаг истәрдик. Мәлумат үчүн билдирмәлијик ки, 2011-ҹи илдә Азәрбајҹан Ислам Партијасынын сәдри Һаҹы Мөвсүм Сәмәдов ағыр маддәләрлә иттиһам олунараг 12 ил һәбс ҹәзасына мәһкум едилиб. О, ҹәзасынын 3 ил 9 ајыны Пенитенсиар Хидмәтин 11 сајлы ҹәзачәкмә мүәссисәсиндә олуб. Бу илин сентјабр ајынын 18-дә М. Сәмәдов ҝөзләнилмәдән, һәм дә нә вәкилә, нә дә мәһкумун аиләсинә габагҹадан хәбәрдарлыг едилмәдән, Ҝүздәкдәки 12 сајлы ҹәзачәкмә мүәссисәсинә көчүрүлүб. Һәјата кечирилән дәјишиклијин әсас сәбәби һаггында мәһкума вә онун вәкилинә һеч бир ајдынлыг ҝәтирилмәјиб.
Даһа гәрибә вә анлашылмајан мәсәлә ондан ибарәтдир ки, мәһбус Һаҹы Мөвсүм Сәмәдов 12 сајлы һәбсханаја көчүрүлән кими она гаршы хүсуси ҹәза режими тәтбиг едилиб. Артыг 5 ҝүндүр ки, сәһһәти онсуз да ағыр олан М. Сәмәдов хүсуси ҹәза алтында сахланылыр. Алдығымыз мәлумата ҝөрә бу ҝүн, сентјабрын 24-дә онун хүсуси ҹәза мүддәти даһа 7 сутка артырылыб.
Нәзәринизә чатдырмаг истәјирик ки, Һаҹы Мөвсүм Сәмәдов ихтисасҹа һәким, һәм дә Ислам дининин билиҹиси, алимдир. О, галдығы һәр һансы бир мүһитдә һәмишә инсанлары мәнәви ҹәһәтдән зәнҝинләшдирмәјә, јахшылығы тәлгин едиб онлары писликдән чәкиндирмәјә чалышыб. Ҹәмијјәтдә һөрмәт саһиби олмагла, Вәтәнини, халгыны, торпағыны, динини севән вә бу дәјәрләрин јолунда ҹанындан кечмәјә һазыр олан бир шәхсијјәтдир. Дүшмәнчилик вә мүхтәлиф фитнә-фасадларда долу һазыркы дөврдә белә шәхсијјәтләрә халгымызын бөјүк еһтијаҹы вар.
Тәәссүфлә гејд етмәлијик ки, рәһбәрлик етдијиниз гурумда белә ишыглы инсанларын әсл гијмәти, јүксәк дәјәри нәзәрә алынмадан онлара гаршы һагсызлыға вә әдаләтсизлијә јол верилир ганунсузлугларда барышмаз олдуғуна ҝөрә она ачыг шәкилдә гәрәзли мүнасибәт ҝөстәрилир.
Һесаб едирик ки, Һаҹы Мөвсүм Сәмәдов ганунчулуғу, һаггы вә әдаләти севдијинә ҝөрә она гаршы атылан гејри-адекват, һагсыз мүнасибәтә лајиг дејил. Бу ҹүр мүнасибәт ҹәзачәкмә мүәссисәләриндә мәһкум һәјаты јашајан мәһбуслара икили, гәрәзли јанашманын нәтиҹәси кими баша дүшүлүр вә бу да рәһбәрлик етдијиниз органа гаршы ҹәмијјәт арасында ҹидди инамсызлыг тохуму сәпир.
Инанырыг ки, мүраҹиәтимизи Сизин үчүн әһәмијјәтли һал кими гијмәтләндирәҹәк, конкрет аддым атмаға сәј ҝөстәрәҹәк, һагсызлығы дәф етмәклә ҹәмијјәтдәки нараһатлығы арадан галдыраҹагсыныз.
Азәрбајҹан Ислам Партијасы 24.09.2014
Диггәт: Хәбәрдән истифадә етдикдә мәнбәјә истинад лазымдыр
