Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Ливан Мүгавимәт Һәракатынын Лидери Сејјид Һәсән Нәсруллаһ, өтән ҝүн телевизија каналында јајымланан чыхышында АБШ-ын алдадыҹы сијасәтләринә тохунараг Америка Бирләшмиш Штатларынын Суријада һәрби әмәлијјатлар кечирмәсини писләјиб.
Һизбуллаһ Мүгавимәт Һәракатынын Баш Катиби Американын јаратдығы коалисијаја гаршы олдуғуну гејд едәрәк билдириб: “Һәр кәс бизим, бөлҝә халгларыны тәһдид едән вә онлара гаршы мүхтәлиф ҹинајәт вә террор актларыны һәјата кечирдән “ИШИД” вә диҝәр тәкфирчи тәшкилатлара гаршы олдуғумузу ҝөзәл билир анҹаг биз, принсипиал олараг Суријада истәр мөвҹуд һакимијјәтә гаршы истәрсә дә тәкфирчи тәшкилатлара гаршы хариҹи мүдахиләнин әлејһинәјик”.
Һөҹҹәтүл Ислам вәл Мүслимин Сејјид Һәсән Нәсруллаһ даһа сонра, "Бу ҝүнки дүнјамызда терроризмин әсас мәнбәји вә мәншәси АБШ-дыр. АБШ, сионист террорчу режиминин дә ән бөјүк дәстәкчисидир" дејәрәк, "Бу сәбәбдән дә АБШ-ын терроризимә гаршы јаранмыш бир коалисијаја лидерлик етмәси әхлагдан кәнардыр. Биз дә белә бир коалисијада јер алмаг фикриндә дејилик"- дејә билдириб.
Һизбулла Лидери, гејд олунан ганунсуз коалисијада иштирак едән вә террорчу груплара силаһ вә тәлимләр кечән өлкәләрин дә бундан имтина етмәләрини истәјәрәк, Ливан- Сурија сәрһәдиндәки Арсал гәсәбәсиндә “Нусра Ҹәбһәси” јараглылары тәрәфиндән ҝиров тутулан ливанлы әсҝәрләрин вәзијјәти илә бағлы һөкумәтдән дәстәк истәјиб.
"Пәнаһәндәләри биз горујуруг"
Тәкфирчиләрин әлләриндән гачараг Ливандакы суријалы пәнаһәндәләр һаггда данышан Сејјид Һәсән Нәсруллаһ билдириб: "Террористләрин төрәтдији ҹинајәтләр уҹбатындан Ливана пәнаһәндә олмуш ҝүнаһсыз Суријалы гачгынлар үчүн әлимиздән ҝәлән һәр ҹүр сәји ҝөстәририк, гачгынлары биз горујуруг кимсә јох”.
Сејјид Һәсән Нәсруллаһ даһа сонра, Мүгавимәт Һәрәкатларынын Гәззәдә нүмајиш етдирдији мүгавимәтини вә гејрилегал исраил режимилә анлашылан атәшкәси "сионист режимин ачыг вә ҝизли бүтүн планларыны боша чыхаран бир гәләбә" шәклиндә характеризә едәрәк, Фәләстин халгыны тәбрик едиб.
Јәмәндә Һуси Әнсаруллаһ Шиә Һәрәкәтијлә һөкумәт арасында разылашманын бәргәрар олмасына да тохунан Баш Катиб Сејјид Һәсән Нәсруллаһ билдириб: “Јәмәндә проблемләрин һәллинә јөнәлмиш бөјүк бир фүрсәт кәсб едән разылашмадан өтәри тәбрикләримизи тәгдим едирик. Биз, бир халгын сијаси һәллә говушдуғу заман севинирик”.
Диггәт: Хәбәрдән истифадә етдикдә мәнбәјә истинад лазымдыр
