Әһли Бејт -АБНА- хәбәр аҝентлијинин вердији хәбәрә әсасән Исламчыларын кассасија шикајәтинә Али Мәһкәмәдә бахылмасынын ҝеҹикмәси Сәмәдовлар аиләсиндә наразылыға сәбәб олуб.
Азәрбајҹан Ислам Партијасынын сәдри Мөвсүм Сәмәдовун һәјат јолдашы Меһпарә Сәмәдова дејиб ки, иши иҹраата ҝөтүрән Али Мәһкәмәнин һакими Фәрһад Кәримов мәзунијјәтә чыхыб: “Һесаб едирик ки, һаким гәсдән кассасија шикајәтинә бахыш ҝүнү тәјин етмәдән мәзунијјәтә чыхыб ки, мүддәт бир гәдәр дә узансын. Кассасија шикајәтинә бахылдыгдан сонра исламчыларын иши Авропа Инсан Һүгуглары Мәһкәмәсинә ҝөндәриләҹәк”.
Меһпарә Сәмәдова декабрын 19-да һәјат јолдашынын сахландығы 11 сајлы Ҹәзачәкмә Мүәссисәсинә баш чәкдијини дејиб: “Бу дәфә аиләви ҝетдик вә үч ҝүн галдыг. Мөвсүм бәј өзүнү јахшы һисс едир, о мөһкәм адамдыр. Чох ҹидди режимдә сахланыр. Гәзетләри охумагдан мәһрумдур. Нәинки тәзә гәзет вермир, һәтта мәним әрзаг, пал-палтар бүкдүјүм көһнә гәзетләри дә ичәри бурахмырлар. Мөвсүм бәј бир адамла дини, ислами сөһбәт апаран кими ону дустаглардан мүвәггәти тәҹид едирләр. Тез-тез ондан Иранла бағлы ифадә алырлар. Белә һисс олунур ки, Мөвсүм бәји Ирана бағламаг истәјирләр”.
Меһпарә Сәмәдова сонунҹу ҝөрүш заманы Мөвсүм Сәмәдовла һәр һансы әфв сөһбәтинин олмадығыны, белә бир мүзакирә апармадығыны вурғулајыб: “Амма һәр дәфә дејир ки, мән елә бир ҝүнаһ иш тутмамышам, ҹинајәт төрәтмәмишәм ки, әфв олунум”.
Мөвсүм Сәмәдовун һәбсиндән ики ил кечир. Меһпарә Сәмәдова бу мүддәтин асан кечмәдијини билдириб: “Аилә башчысынын һәбсиндән сонра ушагларын гајғысы башымы чох гарышдырыб. Мән билирәм ки, бу һадисәләрин өз сәбәби вар вә бунлары елә-белә, бош јердән јашамырыг. Ола билмәз ки, бу гәдәр һагсызлыг, әдаләтсизлик јердә галсын. Јәгин ки, Аллаһымыз бир ҝүн бунлара ајдынлыг ҝәтирәҹәк. Мөвсүм бәј нә етмишди? Һакимијјәти тәнгид еләмишди. Һакимијјәти тәнгид едән тәк одурму? Бәс диҝәр тәнгид едәнләри нә үчүн тутуб 12 ил ҹәза вермирләр?”
Доктор Мөвсүм Сәмәдов 2011-ҹи ил јанварын 2-дә Азәрбајҹан Ислам Партијасы Баш Мәҹлисинин иҹласында чыхыш едәрәк мәктәбләрдә һиҹаба гадаға гојулмасыны кәскин писләјиб вә һакимијјәтин үнванына иттиһамлар сәсләндириб. Мәһәммәд (сәлләлаһу әлејһи вә алиһ) Пејғәмбәрдән “динә тәрәф бәла ҝәлсә, ҹанынызы верин, дининизи гуртарын” дејә ситат ҝәтирән АИП лидери Азәрбајҹан халгыны “ајаға галхмаға вә залым режимә сон гојмаға” чағырыб. Һәмин ил јанварын 7-дә Азәрбајҹан Ислам Партијасы үзвләринин вә бәзи диндарларын һәбси башлајыб. Мөвсүм Сәмәдов јанварын 8-дә полисә табе олмамаг иттиһамы илә ШӘРЛӘНӘРӘК 13 сутка иш алыб. Јанварын 20-дә Мөвсүм Сәмәдова гондарма иттиһам ирәли сүрүлүб. О, әлијевләр һакимијјәтин зорла әлә кечирмә вә ја ону зорла сахлама вә башга ҹинајәтләрдә тәгсирли билинәрәк 12 ил мүддәтинә азадлыгдан мәһрум олунуб.
Диггәт: Хәбәрдән истифадә етдикдә мәнбәјә истинад лазымдыр
