Әһли Бејт -АБНА- хәбәр аҝентлијинин вердији хәбәрә әсасән бир ҝүн бундан өнҹә “ислам-азери.аз” сајтында “Ләнкәранда әслиндә нә баш верир?” адлы видео материал јајымланыб. Видео тәһлилдә билдирилир ки, Ашура ҝүнү бәзи гурумларын гејри-рәсми олса да гадаға гојмасына бахмајараг Ләнкәранда минләрлә инанҹлынын, јүрүш кечирмәси, аидијјәти органлары нараһат едиб: “Ашура ҝүнүндән сонра Ләнкәранын Кичик Базар мәһәлләсиндә јерләшән “Һүсејнијјә” мәсҹидиндә диндарларын башына ојун ачмаг һәдјанларынын ишартысы ҝөрүнмәјә башлајыб. Белә ки, данышығы вә һәрәкәтини билмәјән Һәмдулла адлы бир нәфәр һәр ҝүн мәсҹидә ҝәләрәк орада ибадәт едән инанҹлылара гаршы һәгарәт мотивли һәрәкәтләр едир. Һәмдулланын бу һәрәкәтләринин архасында һансы нијјәтләрин вә мәгсәдләрин дурдуғуну билән диндарлар һәмин шәхсә гаршылыг вермирләр. Һадисәләрин арды олараг ады чәкилән мәсҹиддә ҹинајәт тәркибли инсидент јашаныр. Белә ки, Һәмдулла Әлијевин диндарлара гаршы һәгарәтинин давам етдији бир заманда онун оғлу әлиндә бычагла мәсҹидә ҝирәрәк орада аранын сакитләшмәсини ҝөзләјән Ибраһим Азадов адлы инанҹлыја хәсарәт јетирир. Јараланан шәхс әтрафдакыларын көмәклији илә хәстәханаја јерләшдирилиб вә онун үзәриндә ҹәрраһијјә әмәлијјат апарылыб. Лакин видео ҝөрүнтүләрдә јајымлананларын әксинә олараг Һәмдулла Әлијев дејиләнләрин һамысыны инкар едиб. Мараглы олан будур ки, бычагланма һадисәсиндән сонра хәсарәт алан Ибраһим Азадов барәсиндә Ләнкәран Рајон Полис Шөбәсиндә ҹинајәт иши ачылыб. Бычагла она хәсарәт јетирән шәхслә бағлы исә һәр һансы бир тәдбирин ҝөрүлмәдији билдирилир”, - дејә видео тәһлилдә гејд едилир.
Баш верәнләрлә бағлы Дахили Ишләр Назирлији Мәтбуат Хидмәтинин шөбә рәиси Орхан Мансурзадә илә әлагә сахладыг. ФактХебер.ҹом-а ачыглама верән ДИН рәсмиси билдирди ки, Ләнкәранын Кичик Базар әразисиндә јерләшән “Һүсејнијјә” мәсҹидиндә фәалијјәт ҝөстәрән дини иҹманын рәһбәри Һәмдулла Әлијев 5 декабр тарихиндә рајон полис шөбәсинә әризә илә мүраҹиәт едиб ки, бир груп шәхс она гаршы хулиганлыг һәрәкәтләринә јол верәрәк, мәсҹиддә иҹтимаи асајиши позублар: “Әризәдә билдирилир ки, мәсҹиддә олан бир груп шәхс Һәмдулла Әлијеви дөјәрәк тәһгир едибләр. Һәмдулла Әлијевин мүраҹиәти әсасында Ләнкәран Рајон Полис Идарәсиндә истинтаг групу јарадылыб вә Ҹинајәт Мәҹәлләсинин 221.2.1 маддәси илә (бир груп шәхс тәрәфиндән хулиганлыг) илә ҹинајәт иши ачылыб. Бундан сонра дәрһал тәхирә салынмаз истинтаг һәрәкәтләри һәјата кечирилиб вә мүәјјән едилиб ки, Һәмдулла Әлијевә гаршы дејилән һәрәкәтләр төрәдилиб. Һадисәдән сонра рајон мәһкәмәси Илкин Әсәдов адлы шәхс барәсиндә һәбс гәти имкан тәдбири, Ибраһим Азадовла бағлы исә полис нәзарәтиндә сахланылма гәрары чыхарыб. Һазырда фактла бағлы истинтаг ишләри апарылыр вә кимләрин тәгсиркар олдуғу бундан сонра арашдырылаҹаг. ”
Ибраһим Азадов адлы шәхсин бычагланма һадисәсинә дә ајдынлыг ҝәтирән Орхан Мансурзадә, “Ибраһим Азадов иддиа едир ки, она декабрын 5-и хәсарәт јетирилиб. Бу мәсәлә дә истинтаг тәрәфиндән өјрәниләҹәк”, - дејә билдирди: “Ибраһим Азадовун ким тәрәфиндән вурулмасына истинтаг ајдынлыг ҝәтирәҹәк. Хәсарәт алынмасы о демәк дејил ки, Ибраһим Азадов зәрәрчәкән шәхсдир. Истинтаг һал-һазырда онун барәсиндә тәгсирләндирилән шәхс кими полис нәзарәтинә ҝөтүрүлмәси гәрары чыхарыб. Истинтагын сонракы ҝедишаты ҝөстәрәҹәк ки, кимләр тәгсиркардыр.”
Диггәт: Хәбәрдән истифадә етдикдә мәнбәјә истинад лазымдыр
