Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасы бәјанат јајыб.
Партијанын мәтбуат хидмәтиндән верилән мәлумата ҝөрә, бәјанатда дејилир: “Сосиал шәбәкәдә јајымланан вә артыг өлкәнин бүтүн информасија ваистәләриндә әксини тапан Азәрбајҹан Милли Мәҹлисинин үзвү Ҝүләр Әһмәдованын рүшвәт вә коррупсија әмәлләри өлкә иҹтимаијјәтинин тәәссүф вә тәәҹҹүбүнә сәбәб олуб. Республиканын али ганунвериҹилик һакимијјәтинин рүшвәтә, коррупсијаја уғрамасыны Азәрбајҹан Ислам Партијасы дөвләтә, дөвләтчилијә хәјанәт кими гијмәтләндирилир. Ҝөрүнтүләрин етирафы, Ҝ.Әһмәдованын мандатындан имтина етмәси ону ҝөстәрир ки, истәр тәһсил системиндә, истәрсә дә һакимијјәт органларында рүшвәтхорлуг вә коррупсија һаллары јени дејил, һәм дә чохларыны бу чиркаба булашдырыб.
Биз Ҝүләр Әһмәдованын тимсалында әксәр депутатларын тәмсил етдикләри сечиҹиләрин етимадыны газанмаг, марагларыны јүксәк трибунадан ифадә етмәк әвәзинә, шәхси мәнафеләринә хидмәт етдикләринин, Милли Мәҹлисә өзләринин ҝәлир мәнбәји кими бахмаларынын шаһиди олмушуг. Сон һадисәләр бу еһтималы бир даһа сүбут етди, тәсдигләди. Узун илләр белә негатив һаллара гаршы мүбаризә апаран пак инсанлары сусдурмаға чалышмыш, зинданлара атылыблар. Беләләриндән бири дә мәһз тәһсилдә рүшвәт вә коррупсија һалларынын олдуғуну дилә ҝәтирән, бу негативликләрин диггәтдән јајынмасы үчүн орталыға сүни проблемләр атанлары, бүтөвликдә бунлара ҹавабдеһлик дашыјан индики һакимијјәти кәскин тәнгид едән АИП сәдри Һаҹы Мөвсүм Сәмәдовдур.
Мөвҹуд аҹынаҹаглы вәзијјәтдән чыхыш јолуну Азәрбајҹан Ислам Партијасы мөвҹуд Милли Мәҹлисин бурахылмасы вә президент сечкиләринә кими ганунвериҹи органын јенидән формалашдырылмасы үчүн сечкиләрин кечирилмәсиндә ҝөрүр. Јалныз објектив, демократик вә шәффаф сечкиләр халгымызы, дөвләтимизи бу бәлалардан гуртара биләр”.
Диггәт: Хәбәрдән истифадә етдикдә мәнбәјә истинад лазымдыр
