Әһли Бејт -АБНА- хәбәр аҝентлијинин вердији хәбәрә әсасән Иран Ислам Республикасынын Мүдафиә Назири, Ҝенерал-Мајор Әһмәд Ваһидинин иштиракы илә “Һүвејзе” адланан јүнҝүл зиреһли техника вә “Талаије” адланан һәрбчи дашыјан зиреһли нәглијјат васитәси иҹтимаијјәтә тәгдим олунуб.
Ә. Ваһиди билдириб ки, “Һүвејзе” зиреһли техникасы сон дәрәҹә јүнҝүл вә садә иш принсипинә маликдир: “Онун үзәриндә мүхтәлиф силаһ вә һәрби тәҹһизат јерләшдирмәк мүмкүндүр. Сон дәрәҹә чевик бир һәрби нәглијјат васитәсидир. Мүнасиб сүрәтә вә диггәтдән јајынмаг системинә маликдир. Бу да ҝеҹә әмәлијјатларында һәрбчиләрин сүрәтли вә асан јердәјишмәсинә имкан јарадыр. Һабелә јүнҝүл олмасына ҝөрә һава нәглијјаты васитәсилә бу зиреһли машынын дашынмасы әмәлијјаты да асанлашмыш олур. Бүтүн бу хүсусијјәтләри нәзәрә алараг, Иран Силаһлы Гүввәләринин мүхтәлиф әмәлијјатларында чох асанлыгла ондан истифадә етмәк мүмкүндүр. Үмумијјәтлә “Һүвејзә” зиреһли техникасындан сәрһәд заставаларында, наркотик гачагмалчылары, һабелә силаһлы гулдурлар вә јолкәсәнләрлә мүбаризәдә истифадә етмәк олар”.
Онун сөзләринә ҝөрә, “Һувејзә” зиреһли техникасы гејри-һәрби саһәләрдә дә истифадә олуна биләр: “Мәсәлән, тәбии фәлакәтләр вә фөвгәладә һаллар заманы, о сырадан сел, гар учгуну, мешә јанғыны, еколоҝијанын горунмасы, газма вә кәшфијјат әмәлијјатлары заманы ондан истифадә едилә биләр. Бу техникадан һабелә сүлһмәрамлы гүввәләр дә тәҹһиз олуна биләр”.
Ә. Ваһиди дејиб ки, “Тәлаије” һәрбчи дашыјан зиреһли нәглијјат васитәси исә чевик вә сүрәтли олмагла јанашы, садә дизајн вә идарәетмә системинә маликдир: “Бу техника һәрби дөјүш тәҹһизатларынын јерләшдирилмәси, һәр бир чарх үчүн мүстәгил фырланма охунун нәзәрдә тутулмасы, јан тәрәфләрдә атәш ачмаг үчүн хүсуси мазғалларын јерләшдирилмәси, мүнасиб сүрәт вә ҝүҹә малик олмасы бахымындан өлкә силаһлы гүввәләринин мобил фәалијјәтләри вә сүрәтли јердәјишмәләри заманы истифадә едилә биләр.
Гејд едәк ки, Иран јерли истеһсал олан “Рәд” (“Шимшәк”) ракет-зенит комплексинин дә сынағыны кечириб. Бу систем АБШ башда олмагла хариҹи гүввәләрин һәрби тәјјарәләринә гаршы һазырланыб. “Рәд” 75 мин фут јүксәкликдәки һәдәфләри мүвәффәгијјәтлә јох етмәк габилијјәтинә маликдир. Бундан әлавә, “Шаһид-129” пилотсуз тәјјарәсинин дә сынағы кечирилиб. 24 саат мүддәтиндә һавада галмаг хүсусијјәтинә малик тәјјарә ҝениш ҹоғрафијада сәрһәддә баш верәнләри дәрһал базаја өтүрмәклә террорчулуг вә гачагмалчылыгла мүбаризәдә өнәмли рол ојнајаҹаг. Ејни заманда бу тәјјарә 1700-2000 км узаглыгдакы һәдәфи вурмаг габилијјәтинә маликдир. “Шаһид 129”ун бомба вә ракет дашымагла јанашы, кәшф, идарәетмә вә һәдәфи јајындырмаг хүсусијјәтләри дә вар. “Рәд” вә “Шаһид-129”ун сынагдан кечирилмәси ҝөрүнтүләри Иран дөвләт телевизијасында нүмајиш етдирилиб.
Диггәт: Хәбәрдән истифадә етдикдә мәнбәјә истинад лазымдыр
