Әһли Бејт -АБНА- хәбәр аҝентлијинин вердији хәбәрә әсасән Түркијәнин Әрдоған һөкумәтинә јахынлығы илә танынан “Јени Шафак” гәзети сон вахтлар өлкәни бүрүјән ПКК партлајыш-террорларынын архасында Исраил хүсуси хидмәт органларынын дајандығыны, терактлар үчүн истифадә олунан техноложи аваданлыгларын исә Азәрбајҹанда гурулан ширкәт васитәсилә әлдә едилдијини јазыб. Јазыны Азәрбајҹан түркҹәсинә ујғунлашдырмагла диггәтинизә чатдырырыг:
***
Бинҝөлдә әввәлҹә 8 полиси, ардындан 10 әсҝәри шәһид едән һүҹумларда террорчуларын ваҹиб олан кәшфијјат мәлуматыны Фәләстин торпагларын ишғал етмиш сионист исраил режиминин истеһсалы јүксәк техноложи аваданлыгла – “ҹасус ҹиһазлар”ла әлдә етдикләри тәсбит олунуб. Полисләри дашыјан микроавтобусла силаһсыз әсҝәрләри дашыјан автобусларын һәрәкәт саатларыны террорчуларын неҹә тәсбит етдијини арашдыран тәһлүкәсизлик ҝүҹләри тәәҹҹүблү деталлара чыхыблар.
ПКК-чыларын һәм радио, һәм дә GSM хәттләрини динләмә хүсусијјәтинә малик ҹиһазларла һүҹумдан габаг кәшфијјат апардыглары, полис вә әсҝәрләри дашыјан нәглијјатын һәрәкәт саатларыны бу јолла өјрәндикләри бәлли олуб. Бунун үчүн ајларла әввәлдән фәалијјәтә башлајан террор тәшкилаты, Азәрбајҹанда гурдуғу ширкәт васитәсилә исраил режиминин Тадиран Телеком ширкәтинин истеһсал етдији ҹиһазлары сатын алыб. “Авијоник” системләрлә тәҹһиз едилмиш “ҹасус ҹиһазлар”, Азәрбајҹандан Шимали Ирагдакы Һынаре дүшәрҝәсинә чатдырылыб.
Ишғалчы исраил режиминдә олан Тадиран Телеком ширкәтинин АР-ҜЕ мәркәзиндә чыхарылан радио системләринин, террорчулара сахта ширкәт үзәриндән чатдырылдығы тәјин олунуб. Авропа Бирлији өлкәләриндә мәдәни фәалијјәтләр хариҹиндә һәрәкәт саһәләри мәһдудлашдырылан террор тәшкилаты, јени нәсил үнсијјәт васитәләрини Түркијәдәки ПКК-чылара чатдырмаг үчүн мараглы бир јола мүраҹиәт етди.
Ҹиһазларын алышы үчүн әввәл Азәрбајҹанда јаланчы, әслиндә мөвҹуд олмајан бир ширкәт гурулуб. Бу илин феврал ајында ишғалчы исраил режимин фирмасы илә ПКК үмумән 95 әдәд “ҹасус ҹиһаз”ын алышы үчүн сифариш вериб. Һәмин ајда башланан чатдырылма ијун ајына гәдәр давам едиб. Азәрбајҹандан ҝөндәрилән ҹиһазлар, Шимали Ирагда террорчуларын тәлим кечдији Һынаре дүшәрҝәсинә чатдырылыб. Ҹиһазларын истеһсалыны исә ишғалчы исраил режими тәрәфиндән Һиндистанда гурулан башга бир сахта ширкәт һәјата кечириб.
Террорчулар Фәләстин торпагларын ишғал етмиш сионист исраил режиминдән алдыглары јени нәсил телсизләрлә тәһлүкәсизлик ҝүҹләринин тезликләринә ҝириб конвојларын јолуну анбаан тәгиб едибләр. Февралдан ијуна гәдәр, 5 ај мүддәтиндә ПКК Исраилдән 41 әдәд “Авијоник”, 19 әдәд “Поинт-Поинт” адландырдыглары ҹиһаз вә 35 әдәд ВҺФ/УҺФ радио системини сатын алыб. Террорчулар чијиндә дашына билен бу “ҹасус ҹиһазлар”ла бөлҝәдә тәһлүкәсизлик ҝүҹләринин данышыгларыны динләјибләр.
Елазығдакы Гәбул-Топланыш Мәркәзиндән (КТМ) әсҝәрләрин күтләви һалда һансы саатда јола чыхаҹағы, мәһдуд сајдакы персоналдан башга һеч кимә дејилмәмишди. Елазығдан јола чыхан вә бир груп әсҝәри Бинҝөлдә бурахандан сонра Муша доғру давам едән конвој мешәлик саһәдә һүҹума уғрамыш, автобусларда олан 167 әсҝәрдән 10-у шәһид олмушду. Террор тәшкилатынын, һәрби конвојун нә јола чыхышмасы илә бағлы мәхфи мәлуматы неҹә әлдә етдији үзәринә фокуслашан тәһлүкәсизлик ҝүҹләри ПКК-чыларын Исраил истеһсалы ҹиһазларла бөлҝәдәки GSM хәттләрини вә телсизи динләдијини ашкарлајыб.
Ишғалчы исраилин әһәмијјәтли сәнаје шәһәрләриндән Петаһ Тиквада технолоҝија ширкәти "Тадиран Телеком", IP телефон, шәбәкә системләри, динләмә ҹиһазлары вә мобил програм истеһсал едир. Террорчулара Азәрбајҹан үзәриндән ҝөндәрилән “Авијоник” динләмә ҹиһазы илә “Поинт-Поинт” телсизләри тәһлүкәсизлик гүввәләринин истифадә етдији ҹиһазларын фрекансларына ҝирәрәк, онлары динләмәк имканы верир.
Диггәт: Хәбәрдән истифадә етдикдә мәнбәјә истинад лазымдыр
