Әһли Бејт -АБНА- хәбәр аҝентлијинин вердији хәбәрә әсасән Исламазери.аз интернет гәзети журналист Араз Гулијевин һәбс олунмасы илә бағлы медиа нүмајәндәләриндән мүнасибәт өјрәниб.
Әввәлҹә Араз Гулијевин кимлији барәдә гыса арашдырма апардыг
Гулијев Араз Фаиг оғлу 1979-ҹу ил Масаллы рајонунун М.Әзизбәјов күч.19 да анадан олуб 1985-ҹи ил Масаллы рајон Рафиг Әлиһәсәнов адына 1-ли орта мәктәбинә дахил олуб. 1996-ҹы илдә орта мәктәби битириб, Азәрбајҹан Нефт Академијасына али мәктәбә дахил олуб. 2 ил орада тәһсил алыб. Даһа сонра мүәјјән сәбәбләрә ҝөрә тәһсилини јарымчыг гојмаг мәҹбуријјәтиндә галыб. 1999-ҹу илдә һәгиги һәрби хидмәтә чағрылыб. 2001-ҹи илин јанвар ајында һәрби хидмәти баша вуруб. Араз Гулијев ушаг вахтларындан Аллаһа ибадәт едиб. Масаллы рајонунда Ислам динин тәблиғи илә дә мәшғул олуб. Масаллы рајонунда ишләдији фирмадан намаз вәрәгләри пајладығы үчүн чыхарылмышды. 2 илдир журналист фәалијјәти илә мәшғул олан Араз Гулијев бу ҝүнә гәдәр дәфәләрлә полис бөлмәсинә чағырылмыш, инзибати ҹәзалар да алмышды. Сон олараг Масаллыда милли фолклор фестивалы заманы кечирилән дискотекаја диндарлар етираз етмишдиләр. Мәсәләни ишыгландыран журналист Араз Гулијев вә етиразчылардан даһа 3 нәфәр сахланылмыш, барәләриндә хулиганлыг маддәси илә ҹинајәт иши ачылмышдыр. Журналист Араз Гулијев һазырда Күрдәханы Истинтаг Тәҹридханасында сахланылыр.
Исламчы журналист Араз Гулијевин һәбс олунмасы илә бағлы медиа нүмајәндәләринин мүнасибәтләри.
“Хебернаме.орҝ” интернет гәзетинин хүсуси мүхбири Илкин Мәммәдов Араз Гулијевин һәбсини гыныјараг дејиб: “Араз Гулијевин һәбси ҝөстәрир ки, һәлә дә Азәрбајҹанда азад мәтбуат анлајышы јохдур. Даһа доғрусу азад мәтбуатын сәсинин уҹалмасына сүни шәкилдә манеә төрәдилир. Гејд едим ки, Араз Гулијев һәбс олунан заман полис тәрәфиндән вәһшиҹәсинә дөјүлүб, һәтта алдығымыз мәлуматлара әсасән ҝеҹә Араз Гулијев вә онунла бирҝә һәбс олунанлар полисин ишҝәнҹәсиндән вәзијјәтләри ағырлашыб вә горхуја дүшән полис ишчиләри 2 дәфә тәҹили тибби јардым чағырыблар. Бу вәһшилијә илк өнҹә бир вәтәндаш кими тәссүфләнирәм вә бир журналист олараг билдирирәм ки, репрессија характерли һәбсләр Араз Гулијев вә онун кими журналистләри бу ҝүнә гәдәр горхузмајыб вә горхузада билмәз. Араз Гулијев вә онун кими тәзјиглә һәбс олунан бүтүн журналисләрин азадлыға чыхмасыны тәләб едирәм. Сонда гејд едим ки, бизим рәсмиләрдән ҝөзләнтимиз будур, журналистләрин һәбси дајандырылмалыдыр вә сөз азадлығынын позунтуларына јол верилмәмлидир.
“Исламазери.аз” интернет гәзетинин Баш редактору Рамин Бајрамовун Араз Гулијевин һәбсинә мүнасибәти: “Азәрбајҹанда бу илк һал дејил. Чох тәәссүфләр олсун ки, бәзи мәмурлар журналистләри даим ганунсуз олараг һәбсиндә мараглыдырлар. Араз Гулијевә ҝәлдикдә исә, о ҹәнуб бөлҝәсиндә танынмыш журналистләрдәндир. Дејә биләрәм,"онлајн" фәалијјәт ҝөстәрән 1-2 сајт варса бири дә онун рәһбәрлик етдији хебер44.ҹом сајтыдыр. О һиҹаб гадағасына етиразлары, рајонда баш верән негатив һаллары ишыгландырдығына ҝөрә һәбс едилиб. Аразын мәсәләсини дә ишыгландырмаг лазымдыр. Мән онун да, Ниҹат Әлијевин, һәмчинин диҝәр һәбс едән журналистләрин дә "Виҹдан мәһбусу" кими танынаҹағына инанырам. Бунун үчүн өлкәмиздә фәалијјәт ҝөстәрән журналистләрин һүгугларыны мүдафиә едән "РАТИ" вә онун кими тәшкилатлар, һәмчинин өлкә хариҹиндә фәалијјәт ҝөстәрән башда "Сәрһәдсиз Репортјорлар" олмагла бүтүн журналистләри мүдафиә едән тәшкилатлары бу һагда хәбәрдар етмәк лазымдыр. Әлбәттә ки, мәним ишыми ишыгландырдығына ҝөрә һәр бир тәшкилата вә нүмајәндәләринә дә фүрсәтдән истифадә едиб өз тәшәккүрүмү билдирирәм.
“Азадхебер.орҝ” интернет гәзетинин баш редактор әвәзи Пәрвин Зејналын мүнасибәти: “Әлбәттә ки, бир журналист олараг Араз Гулијевин һәбсини писләјирәм. Журналистин дөјүләрәк һәбс олунмасы бир адәт һалыны алыб. Бу ҹүр һадисәләрә исә иҹтимаи гынаг чох аздыр. Буна сәбәб, бәзи медиа гурумларынын бу ишдә мараглы олмамасыдыр. Һәбсханаларда журналистләрин сајынын артмасы ҝәләҹәкдә медиа үчүн фәлакәтә сәбәб ола биләр”.
“Фактхебер.ҹом” интернет гәзетинин јазары Орхан Һүсејн Араз Гулијевин һәбсинә мүнасибәти: “Билдијимә ҝөрә Араз Гулијев Масаллыда журналист фәалијјәти илә мәшғул олуб. Истәнилән тәгсири олмајан инсанын һәбс едилмәси онун дининдән, миллијәтиндән вә пешәсиндән асылы олмајараг ганунсуздур. Әләхсус да журналистләрин һәбс едилмәси дөзүлмәз вә гәбуледилмәздир. Бу кими һаллар һәр-һалда өлкәмиздә мөвҹуд олан авторитаризмдән хәбәр верир. Чүнки бу ҝүнләрдә тәкҹә Араз дејил, Тофиг Јагублунун гызы Ниҝар да һәбс олунуб. Бундан әлавә өз инанҹларына вә сијаси фәалијјәтләринә ҝөрә өтән ил дә кифајәт гәдәр иҹтимаијјәт нүмајәндәләримиз һәбс едилиб. Нә демәк олар, бир журналист олараг ҹәмијјәтимиздә ганунсуз олараг баш верән бүтүн һадисәләри писләјирәм”.
Турал Әли
Диггәт: Хәбәрдән истифадә етдијдә мәнбәјә истинад лазымдыр
