Әһли Бејт -АБНА- хәбәр аҝентлијинин вердији хәбәрә әсасән Бирләшмиш Штатларын Азәрбајҹандакы сәфирлијиндән верилән мәлумата ҝөрә, Ағ ев Азәрбајҹан ордусунун забити Рамил Сәфәровун әфв олунмасыны писләјиб. Милли Тәһлүкәсизлик Шурасынын сөзчүсүнүн јајдығы ачыгламада дејилир: “Президент Барак Обама Азәрбајҹан президентинин Маҹарыстандан гајытдыгдан сонра Рамил Сәфәрову әфв етмәси барәдә еландан чох нараһатдыр. Рамил Сәфәров 2004-ҹү илдә Будапештдә Ермәнистан ордусунун забити Гурҝен Маргарјанын гәтлини етираф едиб вә бу дәһшәтли ҹинајәтә ҝөрә Маҹарыстанда өмүрлүк һәбс ҹәзасыны чәкирди.
Биз Азәрбајҹан һөкумәтинә Рамил Сәфәровун әфв едилмәси һаггында гәрарла бағлы наразылығымызы чатдырырыг. Бу һәрәкәт реҝионал ҝәрҝинлијин азадылмасына вә барышын тәблиғинә јөнәлдилмиш сәјләрлә зиддијјәт тәшкил едир. Америка Бирләшмиш Штатлары Рамил Сәфәровун Азәрбајҹана көчүрүлмәси гәрары илә бағлы Маҹарыстандан да изаһат тәләб едир”.
Мәсәләдән јан галмајан АБШ Дөвләт Департаменти дә мәсәләјә мүнасибәт билдириб. Сөзчү Патрик Вентреллин јајдығы бәјанатда дејилир: “Америка Бирләшмиш Штатлары Азәрбајҹан президентинин Маҹарыстандан Бакыја көчүрүлмүш Азәрбајҹан ордусунун забити Рамил Сәфәрову әфв етмәси хәбәриндән чох нараһатдыр. Рамил Сәфәров 2004-ҹү илдә Будапештдә НАТО тәлими заманы Ермәнистан забити Гурҝен Маргарјаны гәтлә јетирдијинә ҝөрә Маҹарыстанда өмүрлүк һәбс ҹәзасы чәкирди.
Азәрбајҹана бу һәрәкәтлә бағлы дәрин нараһатлығымызы билдиририк вә изаһат хаһиш едирик. Һәмчинин Рамил Сәфәровун Азәрбајҹана көчүрүлмәси гәрары илә бағлы Маҹарыстандан даһа әтрафлы мәлумат хаһиш едирик.
Биз реҝионал ҝәрҝинликләри артыран һәр бир әмәли гынајырыг”.
Рамил Сәфәров 1977-ҹи илдә анадан олуб. Анкара Али Һәрби Мәктәбини битириб. Мүдафиә Назирлијинин Ҝәдәбәјдәки һәрби һиссәләринин бириндә вә Һејдәр Әлијев адына Али Һәрби Мәктәбдә гуллуг едиб, баш лејтенант рүтбәсинә гәдәр јүксәлиб.
2004-ҹү илин јанвар ајында НАТО програмлары чәрчивәсиндә Маҹарыстан пајтахты Будапештдә кечирилән инҝилис дили курсларына езам олунуб. Вәтәнә дөнмәјә аз галмыш һәбс олунуб. О, фервал ајынын 19-да һәмин тәдбирдә иштирак едән ермәни забити Гурген Маркарјаны өлдүрмәкдә тәгсирли билиниб. 2006-ҹы ил апрелин 13-дә Будапешт мәһкәмәси Рамил Сәфәрову 30 ил мүддәтинә әфв олунмаг һүгугундан мәһрум едилмәклә өмүрлүк һәбсә мәһкум едиб.
2011-ҹи ил августун 31-дә Рамил Сәфәров Азәрбајҹана тәһвил верилиб. Елә һәмин ҝүн Азәрбајҹана ҝәтирилән забит президент Илһам Әлијевин сәрәнҹамы илә әфв олунуб.
Сентјабрын 1-дә мүдафиә назири Сәфәр Әбијев Рамил Сәфәрову мајор рүтбәси илә тәлтиф едиб.
Диггәт: Хәбәрдән истифадә етдијдә мәнбәјә истинад лазымдыр
