Әһли Бејт -АБНА- хәбәр аҝентлијинин вердији хәбәрә әсасән Бу ҝүндән етибарән Теһранда Гошулмама Һәрәкатына үзв өлкәләрин саммити өз ишинә башлајыр. Саммитдә дүнјанын 100-дән чох дөвләт нүмајәндәси иштиракы нәзәрдә тутулуб. Азәрбајҹан президенти Илһам Әлијев дә саммитә дәвәтлидир. Саммит кечирилмәмишдән өнҹә Гәрб дөвләтләри, хүсусилә АБШ мүттәфигләринә тәдбирдә иштирак етмәмәклә бағлы чағырышлар едиб.
FaktXeber.com-ун БМТ-дән сонра дүнјанын ән бөјүк тәшкилаты олан Гошулмама Һәрәкатынын Иран Ислам Республикасында кечирилмәси вә гурума рәсми Теһранын сәдрлик етмәси реҝион үчүн нә дәрәҹәдә әһәмијјәтлидир,- суалыны ҹавабландыран Јашыллар Партијасынын сәдри Мајис Ҝүләлијев билдирди ки, Гошулмама Һәрәкатынын варлығы бәшәријјәт үчүн чох әһәмијјәтлидир. Експерт гејд етди ки, саммитин Теһранда вә диҝәр үзв өлкәләрдә кечирилмәсинин фәрги јохдур: "Чүнки Гошулмама Һәрәкаты һәр шејдән өнҹә һәрби блокларын мөвҹудлуғунун әлејһинә олан бир тәшкилатдыр: Һәрби блок бүтүн һалларда гаршыдурмаја, инсан өлүмләринә вә дағынтыларына ҝәтириб чыхардыр. Гошулмама Һәрәкатынын принсипләри вә тәләбләри кифајәт гәдәр һуманист вә ҝәләҹәјә јөнәлик ҹәһәтдән тәһлүкәсиз вә фајдалыдыр. Бу гурум бир даһа дүнјаја бәјан едир ки, һәрби блоклар тәсис едәрәк гаршыдурмалар јаратмаг вә мадди немәтләр истеһсалы үчүн лазымы вәсаити һәрбиләшмәјә јөнәлтмәк олмаз. Һәрбиләшмәјә нә гәдәр вәсаит хәрҹләнирсә, бир о гәдәр дә инсанларын ҝүндәлик тәләбат малларынын сајы азалыр. Бу сәбәбдән дә Гошулмама Һәрәкатынын фәлсәфәси бүтүн һалларда фајдалыдыр."
Һәрәкатын Јахын Шәрг үчүн әһәмијјәтиндән дә данышан Мајис бәј, "Јахын Шәрг һазырда дүнјанын диггәтиндә олан реҝиондур. Чүнки дүнјада енержи ресурслары түкәндикҹә Јахын Шәргин әһәмијјәти вә диггәт мәркәзиндә сахланылмасы ҝүндән-ҝүнә артаҹаг", - дејә билдирди: "Она ҝөрә дә Гошулмама Һәрәкатынын фәлсәфәсинин јајылмасы Гәрб өлкәләрини ҹидди шәкилдә нараһат едир. Чүнки Гәрб өлкәләринин фәлсәфәсинә ҝөрә, нә гәдәр мүмкүндүрсә һәрбиләшмә артмалыдыр. Һәмчинин Гәрб игтисади нәзәријјәсиндә һәрбиләшмә хүсуси јер тутур. Јәни Кенис нәзәријјәси әсасында формалашан Гәрб игтисади нәзәријјәси ону дејир ки, бөһранлар јахынлашдыгҹа, һәрбиләшмәнин хәрҹләри артырылмалы вә мүһарибә имканлары ҝенишләнмәлидир. Белә олан һалда, әһалинин ишлә тәминаты ҝенишләнәрәк бөһрандан чыхыш имканлары артыр. Гәрб игтисадијјаты тамамилә бунун үзәриндә гурулуб. "
Експерт ону гејд етди ки, Гәрбин бүтүн һәдәфи АБШ-ын марагларынын мөһкәмләндирилмәсинә јөнәлиб: "Беләликлә, НАТО-нун өзүнү формалашмасында да әсас мәгсәдләрдән бири диҝәр өлкәләрин енержи вә инсан ресурсларындан истифадә етмәкдир. Јәни НАТО-нун бүтүн малијјәси вә һәрби ҝүҹү диҝәр өлкәләрин малијјә ресурслары һесабына формалашыр. НАТО-дан истифадә едәрәк дүнјада АБШ-ын марагларыны мүдафиә етмәк истәјирләр. Белә олан һалда, АБШ һеч вахт Гошулмама Һәрәкатынын тәрәфдары ола билмәз. Чүнки бу гурум бирбаша АБШ-ын марагларынын әлејһинә јөнәлиб. Гәрб өлкәләри дүнјаны јалныз һәрб васитәсилә әсарәтә алараг өз нүфузларыны ҝенишләндирирләр. Бир сөзлә, Гошулмама Һәрәкаты ачыг-ашкар дүнјада һеҝемонлуг идејасыны јајмаға чалышан АБШ-ын вә онун вассалы олан бәзи Гәрб өлкәләринин мараглары әлејһинә јөнәлмиш бир гурумдур. Гурумун әсас һәдәфләриндән бири сүрәтли силаһланманын гаршысыны алмагдан ибарәтдир."
Һәрәкатын саммитинин Теһранда кечирилмәсинин Гәрб дөвләтләри үчүн хүсуси бир гыҹыг јаратдығыны билдирән политолог, бу мәсәләдә ИИР-ын нүфузунун ҝенишләнмәсинин гурумун јашаја биләҹәјиндән хәбәр вердијини билдирди: "Гошулмама Һәрәкатынын јашамасы ҝәләҹәкдә һәм НАТО-нун, һәм дә ки, АБШ-ын нүфузуна ҹидди сүрәтдә зәрбә вура биләр. Ејни һалда, бу ҝүн АБШ-ын нүфузунун артмасы бәшәријјәтин марагларына зиддир."
Диггәт: Хәбәрдән истифадә етдикдә мәнбәјә истинад лазымдыр
