Әһли Бејт -АБНА- хәбәр аҝентлијинин вердији хәбәрә әсасән Азәрбајҹан өз силаһлы гүввәләрини актив шәкилдә јени технолоҝијаларла тәҹһиз едир. Бу ҹүр активлик нә илә бағлыдыр? Русијанын сәси” радиосу нүфузлу експерт-конфликтологларын рәјини бу барәдә ачыглајыб.
Експертләри марагландыран әсас мәсәлә исә сон заманлар Азәрбајҹана даһа чох ҝөндәрилән “Ми-35 М” дөјүш вертолјотлары, еләҹә дә сон 10 илдә Азәрбајҹанын һәрби авиасија програмына ујғун олараг мүхтәлиф өлкәләрдән алдығы 47 дөјүш тәјјарәси вә 109 вертолјот олуб.
“Һәгигәтән дә, Азәрбајҹан сон илләрдә силаһ-сурсат вә һәрби техниканын алышыны кәскин шәкилдә сүрәтләндириб. О, силаһы нәинки Русијадан, еләҹә Исраилдән идхал едир. Белә информасија ҝәзир ки, сон ики илдә Азәрбајҹан силаһ вә һәрби техникаја 3,7 милјард доллар сәрф едиб. Буна шүбһә јохдур ки, Азәрбајҹан бүтүн бунлары нефт сајәсиндә әлдә едир. Нефтин ҝүҹүнә орду ҝүҹләнир. Азәрбајҹан ҝәләҹәкдә сијаси проблемләринин һәллиндә бу потенсиалдан истифадә едә биләр. Русија бу мәрһәләдә бүтүн үсуллардан истифадә етмәлидир ки, Азәрбајҹанын силаһланмада һәдәфи Ермәнистан олмасын” .
Мәгаләдә Азәрбајҹанын Иранла һәмсәрһәд өлкә олмасы да хүсуси вурғуланыр. Гејд олунур ки, Иран ҝәләҹәкдә һәрби-сијаси ҝәрҝинлијин објекти олаҹаг: “Иранла конфликт Азәрбајҹана бирбаша тәсир едә биләр. Азәрбајҹандан фәргли олараг Шимали Иранда азәрбајҹанлылар даһа чох мәскунлашыблар. Һәр һансы сијаси ҝәрҝинлик гачгынларын күтләви һәрәкәтинә вә Иранын шималында јерли етник конфликтләрә сәбәб олаҹаг”.
Русијалы експертләр Азәрбајҹан-Ермәнистан мүнасибәтләри илә бағлы ону гејд едибләр ки, Русијанын дипломатик сәјләри нәтиҹәсиндә Дағлыг Гарабағ мүнагишәси ҝүман ки, тәкрарланмајаҹаг. Чүнки Азәрбајҹанын бу ҹүр шәртләр алтында бир даһа мүһарибәјә башламасы риск оларды.
Диггәт: Хәбәрдән истифадә етдикдә мәнбәјә истинад лазымдыр
