Әһли Бејт -АБНА- хәбәр аҝентлијинин вердији хәбәрә әсасән Августун 7-дә Сабунчу полиси тәрәфиндән сахланылан Забрат сакини Һаҹы Меһди Шамиллинин вәкили илә ҝөрүшүнә нәһајәт ки, иҹазә верилиб. Чәршәнбә ахшамы сәһәр саатларында Ҹавад Ҹавадов Күрдәханы тәҹридханасында Һаҹы Меһди илә ҝөрүшүб. Бу барәдә онун вәкили мәлумат вериб.
Ҹ.Ҹавадовун сөзләринә ҝөрә, Һаҹы Меһди она гаршы ирәли сүрүлән иттиһамлары рәдд едир. Вәкил билдирди ки, сахланыларкән М.Шамилли ишҝәнҹәјә мәруз галыб, полисдә ону дөјүбләр: “Һәбс олундугдан сонра Һаҹы Меһдинин үзәриндән наркотик васитә чыхдығы рәсмиләшдирлиб. Амма бу рәсмиләшдирмәјә гәдәр өзүнүн дедијинә ҝөрә, ону 3 ҝүн дөјүбләр. Садәҹә олараг арадан узун заман кечдији үчүн дөјүлмә изләри галмајыб. Бәзи кичик гызартылар галыб”.
Вәкилин сөзләринә ҝөрә, өтән ҝүн Омбудсман апаратынын әмәкдашлары Күрдәханы тәҹридханасында Һаҹы Меһди илә ҝөрүшүбләр. Ҹ.Ҹавадов дејир ки, һазырда барәсиндә елан олунмуш сахта иттиһамлара етираз олараг М.Шамилли истинтага ифадә вермәкдән имтина едиб: “Өзүнү тәгсирли бимир, гәтијјән. Тутулдугдан сонра 3 ҝүн аҹлыг аксијасы кечириб, анҹаг сонрадан аҹлығы дајандырыб. Етираз әламәти олараг ифадә вермәкдән имтина едиб. Һәбсини сифаришли һесаб едир. Ејни заманда онун евиндә полис ганунсуз ахтарыш апарыб, мәһкәмә гәрары олмадан. Евдән бәзи әһәмијјәтсиз шејләр ҝөтүрүлүб”.
Вәкил дејир ки, истинтаг Һаҹы Меһдини хариҹи өлкәләрдән биринә ҹасуслугда иттиһам етмәјә һазырлашыр. Ејни заманда о билдирди ки, мүдафиә тәрәфи сахланылма заманы баш верән ганун позунтулары илә бағлы мәһкәмәјә мүраҹиәт һазырлајыр: “Дөјүлмә фактлары илә бағлы мәһкәмәјә мүраҹиәт едәҹәм, ејни заманда Һаҹы Меһдинин үзәриндән ҝөтүрүлдүјү иддиа олунан наркотикин експертизасыны тәләб едәҹәјик. Һәбс олундугдан сонра Һаҹы Меһди 15-ҹи полис бөлмәсиндә, даһа сонра исә Сабунчу Полис Идарәсиндә сахланылыб. Идарәдә сахланылдығы мүддәтдә она ики дәфә тәҹили јардым чағырылыб. Бүтүн бунлар она гаршы физики вә психоложи тәзјигләрин олдуғуну ҝөстәрир”.
Гејд едәк ки, М.Шамиллинин гардашы Камран бизимлә сөһбәтиндә билдирди ки, өтән ҝүн Омбудсман Апаратынын әмәкдашы Һаҹы Меһди илә ҝөрүшдән сонра онунла телефонла данышыб: “Омбудсман Апаратынын әмәкдашы зәнҝ еләди, деди ки, Меһди Шамилли сәнин телефон нөмрәни верди, деди ки, сизә чатдырым ки, сәһһәтим јахшыдыр”. Камран Шамилли билдирди ки, гардашы она олан тәзјиг вә ишҝәнҹәләрә етираз олараг вәтәндашлыгдан имтина етмәјә һазырлашыр.
Хатырладаг ки, Һаҹы Меһди Шамилли августун 7-дә Забрат гәсәбәсиндәки евиндә һәбс олунуб. Һаҹы Меһди Шамиллијә гаршы Ҹинајәт Мәҹәлләсинин 234-ҹү (ганунсуз олараг наркотик васитәләри, психотроп маддәләри вә ја онларын прекурсорларыны һазырлама, истеһсал етмә, әлдә етмә, сахлама, дашыма, ҝөндәрмә вә ја сатма) маддәси илә ҹинајәт иши башланыб. Һәбс олунан ҝүн полис онун јашадығы евдә ахтарыш апарса да, аилә үзвләринин дедијинә ҝөрә, һеч нә тапылмајыб. Јалныз полис идарәсиндә елан олунуб ки, М.Шамиллинин үзәриндә апарылан ахтарыш заманы 6,69 грам марихуана ашкар едилиб. Сабунчу Рајон Мәһкәмәси онун барәсиндә 2 ајлыг һәбс-гәтимкан тәдбири сечиб. Һазырда Күрдәханы тәҹридханасында сахланылан Һаҹы Меһдинин аҹлыг етдији билдирилир.
Диггәт: Хәбәрдән истифадә етдикдә мәнбәјә истинад лазымдыр
