Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Демократ Партијасынын (АДП) сәдри Сәрдар Ҹәлалоғлу һазырда ишғал алтында олан 6 рајонумузун ермәниләрә верилмәси илә бағлы галдырдығы мәсәлә илә өлкә ҝүндәмини гарышдырыб. С.Ҹалалоғлу дејиб ки, һазырда Милли Мәҹлисин бир депутаты 6 рајонун агибәти илә бағлы мәлумата маликдир. Онун сөзләринә ҝөрә, һәмин депутата мәлуматы мәрһум Афијәддин Ҹәлилов вериб.
АДП сәдринин бу чыхышындан сонра мәтбуатда һәмин шәхсин кимлији илә бағлы мүхтәлиф иддиалар сәсләнмәкдәдир.
“Мән бу мәсәләјә јенидән гајыдараг билдирмәк истәјирәм ки, илк нөвбәдә 6 рајонумузун дүшмәнә верилмәсини чох ҹидди һадисә һесаб едирәм. Бу, Азәрбајҹан тарихиндә ән гаранлыг мәгамлардандыр. Бу һагда Афијәддин Ҹәлилов мәнә мәлуматлар вермишди. О, билдирмишди ки, торпагларын ким тәрәфиндән верилмәсини башга бир нәфәрә дә дејиб. Онун мәнә дедији шәхс һазырда депутатдыр. Садәҹә олараг мәним һәмин адамын адыны чәкмәк үчүн әлимдә кифајәт гәдәр сүбутум јохдур. Мәтбуатда кимин адынын чәкилмәјиндән аслы олмајараг, буну јалныз һәмин шәхсин өзү јахшы дејә биләр. Мәним ад чәкмәјимә еһтијаҹ јохдур”.
С.Ҹәлалоғлу гејд едиб ки, индики Мадрид данышыгларынын шәртләри о заман Тер-Петросјанла разылашдырылыбмыш: “Мән белә гәнаәтә ҝәлирәм ки, о заман торпагларын верилмәсиндә индики Минск групу һәмсәдрләри ејни идејаны, програмы ирәли сүрүрсә, белә чыхыр ки, торпагларын верилмәсиндә онлар да башга шәкилдә иштирак едибләр. Афијәддин мәнә дејиб, амма мән онун дедикләрини сүбут етмәк үчүн әлимдә фактларын јохдур. Јенә дә дејирәм ки, Афијәддинлә сөһбәт әснасында о мәнә деди ки, “бу һагда сәнә дедикләрими башга бир нәфәрә дә демишәм””.
Исрарлы шәкилдә Азәрбајҹанын 6 рајонунун ишғал едилмәдән дүшмәнә верилдијини дејән АДП сәдри бу һагда кечмиш әдлијјә назири ишләмиш депутат Илјас Исмајыловун она ҹидди фактлар сөјләдијини билдириб:
“Һәмин торпагларын мүһарәбәсиз, филансыз бошалдылмасы, бир нәфәрин дә бурнунун ганамамасы сүбут едир ки, торпаглар алынмајыб, верилиб. Бу просесләрдән јалныз Афијәддин мәлуматлы олуб. Әсас мәсәлә бу торпагларын ким тәрәфиндән верилмәсидир. Һансы депутат бу һагда билир, бунун нә мәнасы вар ки? Садәҹә олараг Тургут Әр бир мәсәләни гарышдырыр ки, Азәрбајҹанын 6 рајону Бишкек протоколу илә јох, ондан 2-3 ил әввәл верилмишди.
Илјас мүәллим мәнә демишди ки, “биз о заман Губадлыда, Зәнҝиланда оланда Аббас Аббасов ҹамаатын көчүрүлмәси илә бағлы тапшырыглар верирди”. О әрәфәдә Афијәддин Ҹәлилов телевизијада чыхыш едиб деди ки, биз халгын тәһлүкәсизлијини тәмин етмәк үчүн торпагларын бошалдылмасы һагда ҝөстәриш вермишик. Ән азы Азәрбајҹан һөкумәти ики һәфтә өнҹә һәмин торпагларын бошалдылмасы илә бағлы тәдбирләр планы һәјата кечириб. Илјас мүәллим дејир ки, мәәттәл галыб ки, рајонлары бошалтмаг үчүн неҹә ҝөстәриш верибләр. Јәни бу мәсәлә чох ҹидди бир мәсәләдир. Неҹә ола биләр ки, 6 рајонун тутулмасында бир нәфәрин дә бурну ганамамышды. О рајонларын да һамысы мүһарибәсиз верилиб. Ҹамаат чыхарылыб, ермәниләр дә ҝәлиб һәмин торпаглара ҝирибләр. Мәсәлә будур, кимин бу һагда нәсә билмәси өнәмли дејил”.
Диггәт: Хәбәрдән истифадә етдикдә мәнбәјә истинад лазымдыр
