Әһли Бејт -АБНА- хәбәр аҝентлијинин вердији хәбәрә әсасән Азәрбајҹанын Тәбриздәки Баш Консуллуғунун әмәкдашлары Иран Ислам Республикасында һәбсдә олан азәрбајҹанлы шаирләр Фәрид Һүсејн вә Шәһријар Һаҹызадә илә ҝөрүшүбләр.
Хариҹи Ишләр Назирлијинин мәтбуат хидмәтинин рәһбәри Елман Абдуллајев журналистләрә бу барәдә мәлумат верәрәк билдириб: «Ҝөрүш Тәбриздәки Мәркәзи Ҹәзачәкмә Мүәссисәсиндә баш тутуб. Биздә олан мәлумата ҝөрә онлара гаршы иттиһам кими Ирана иҹазәсиз ҝәлмәләри ирәли сүрүлүб. Азәрбајҹан вәтәндашлары исә консуллуғун ишчиләринә билдирибләр ки, онлар Иранда фестивала дәвәт олунублар вә һәмин фестивалда иштирак үчүн ҝәлибләр».
Е. Абдуллајев ону да билдириб ки, Фәрид Һүсејн вә Шәһријар Һаҹызадәнин валидејнләри илә ҝөрүшү ИИР тәрәфи илә разылашдырылыб. Бу ҝүн онларын валидејнләри Иран Ислам Республикасына јола дүшүрләр: «Еһтимал олунур ки, сабаһ бу ҝөрүш баш тута биләр.»
Диггәт: Хәбәрдән истифадә етдикдә мәнбәјә истинад лазымдыр
