“Јерим јахшыдыр. Јанымдакы ушагларын һамысы намаз гыландыр. Шүкүр олсун. Ејби јох бу јашда демәк гисмәтимиздә һәбс дә вар имиш. Һеч нәдән нараһатчылығым јохдур. Бирдә ағрыларым вар. О да ки...”
Һаҹы Вагиф Абдуллајев бу сөзләри дејәндә һәлә мәһкәмәнин һөкмү охунмамышды. Мәһкәмәнин һөкмү охунанда ады ҹәми бирҹә јердә чәкилди. Диҝәр 6 нәфәрин һәрәсинә 10 сәһифәлик иттиһамнамә, “дәлил-сүбут” чыхарылды. Амма Һаҹы Вагиф нә гәдәр ҝөзләдисә ҹәми бирҹә јердә адыны ешитди. “Азәрбајҹан Республикасы Милли Тәһлүкәсизлик Назирлијинин мәктубуна әсасән барәсиндә тәдбир ҝөрүлсүн.” Бу да Һаҹы Вагиф Абдуллајевин бүтүн иттиһамы вә 12 ил һәбс...
Инди Һаҹы Вагиф Абдуллајев һәбсхананын бир күнҹүндә ҹан верир. Вәзијјәти чох ағырдыр. Амма она дејәсән һеч кимин көмәк еләмәк фикри јохдур. Бир мүддәт әввәл шаир Әли Кәримин оғлу, тәһсил назирлијиндә әввәлләр ишләмиш вә рүшвәт иттиһамы илә һәбс олунмуш бир нәфәрин һәбсханада вәзијјәти писләшән кими бирбаша президентин әмри илә азад едилди. Дүздүр бурда һүгуг мүдафиәчиләри дә рол ојнадылар. Амма нәдәнсә Һаҹы Вагиф Аббдуллајевә тәрәф бахан да јохдур. Чүнки Һаҹы Вагиф һиҹаб мәһбусудур, намус, виҹдан мәһбусудур. Амма малијјәси гәрбдән ҝәләнләр буна неҹә бахсынлар ки? Бунлары да гынамырыг. “Ким кимин чөрәјин јејирсә онун гапысында сүләнәр” дејиб аталар.
Бу ҝүн 60 јашлы бир ағсаггал хәстәлији уҹбатындан ҹан чәкишир. Дүздүр Һаҹы Вагиф кими дәјәрли инсанлар намус јолунда шәһадәтдән чәкинән дејил. Әҝәр кимләринсә мәгсәди ону өлдүрмәкдирсә бунун јалныз зијаны вар. Һаҹы Вагифи һәбсханада өлдүрмәклә ону мүгавимәт һәрәкатынын илк шәһиди дә едә биләрләр. Амма бундан сонра баш верә биләҹәк фыртынадан ким онлары горујаҹаг?
Бу јердә бир һашијә дә чыхмаг истәјирәм. Әҝәр Һаҹы Вагифи зинданда өлдүрмәклә диндарларын ҝөзүнү горхутмаг истәјирләрсә о заман Һаҹы Абҝүл Сүлејмановун бу сөзләрини бир даһа хатырлатмаг истәрдим. “Биз галибик, бизим һеч нәдән горхумуз јохдур. Зиндан мәғлубијјәт дејил...”
Бәхтијар Сәфа
Диггәт: Хәбәрдән истифадә етдикдә мәнбәјә истинад лазымдыр
