Әһли Бејт -АБНА- хәбәр аҝентлијинин вердији хәбәрә әсасән Үмум Дүнја Лидер Имам Сејјид әли Хаменеи Ислам Ингилабынын Лидери Имам Хомејнинин вәфатынын 23-ҹү илдөнүмү илә бағлы мәрасимдә Ҝүлүстан вә Түркмәнчај мүгавиләләриндән дә данышыб.
Имам Хамнеи ҹәнаблары чыхышында дејиб: “Биз иранлылар өз тарихимиздә мүхтәлиф дөврләри архада гојмушуг. Лакин Иран Ислам Ингилабы илә нәтиҹәлән сон 200 илдә алчалдыҹы чәтин бир дөврү јашамышыг. Чохларынын тарихдән хәбәри јохдур. Тарихә дәриндән бахмаг вә ондан дәрс ҝөтүрмәк ҝәрәкдир. Бу зилләтин чохлу нишанәси вар. Биз бу дөвр әрзиндә сијасәт саһәсиндә өз реҝионумузда ҝедән просесләрдә тәкләнмиш бир халг идик вә дүнјада ҹәрәјан едән просесләрә һеч бир тәсиримиз јох иди.
Игтисадијјат саһәсиндә исә бизим вәзијјәтимиз ҝүнү-ҝүндән ағырлашырды, елм вә технолоҝија ҹәһәтдән дә ҝери галмышдыг вә дүнјада ҝедән нәһәнҝ елми ҹәрәјанларын гаршысында өнә вериләҹәк һеч бир елми наилијјәтимиз дә јох иди.
Дахили сијасәт саһәсиндә дә әҹнәбиләрин сијасәтләринин ојунчусуна чеврилмишдик, мүстәмләкәчиләр вә дүнјанын һеҝемон дөвләтләри бизим һакимијјәтләримизә тәсир ҝөстәрирдиләр, онлары истәдикләри кими јөнләндирир вә истәкләрини онлара гәбул етдириб онлардан истифадә едирдиләр, бизим һакимијјәтләр, шаһлар вә өлкәдә һаким олан гүввәләр исә бу 200 иллик дөврдә онларын гаршысында тәгдирәлајиг, инсани вә гүрурвериҹи реаксија ҝөстәрмирдиләр. Һәтта дөвләти, өлкәнин әрази бүтөвлүјүнү вә өз һакимијјәтләрини горумаг саһәсиндә белә утандырыҹы зәифлик сәрҝиләјирдиләр.
Бу 200 иллик дөврдә алчалдыҹы Түркмәнчај мүгавиләсинин, ондан бир гәдәр әввәл исә Ҝүлүстан мүгавиләсинин бағланмасы илә Гафгазын 17 вилајәтини Ирандан ајырмышдылар. Елә һәмин 200 иллик дөврдә әҹнәбиләр өлкәмизин о вахткы һакимијјәти вә һакимијјәт мәнсублары тәрәфиндан һеч бир мүгавимәтлә гаршылашмадан Бушәһр вилајәтини дә ишғал етмишдиләр.
Үмуми просес вә һәрәкәт, деградасија просеси иди ки, тарих јарадан вә әзәмәтли тарихи ирсә малик олан Иранын бөјүк халгына бу просес зорла гәбул етдирилмишди. Лакин Иран ислам ингилабы вәрәги чевирди вә бу просесин истигамәтини тамам дәјишди. Бу ингилабын өндәри Имам Хомејнинин ирадәси бу халгда милли әзәмәт руһуну дирчәлтмәјә јөнәлди вә бу әзәмәти дә халга гајтарараг, “Биз баҹарарыг” мәдәнијјәтини халг арасында јајды вә инсанлары буна инандырды. Бу, “Гуран“ мәдәнијјәтинин өзүдүр вә милләтин инкишафына сәбәб олур”.
Диггәт: Хәбәрдән истифадә етдикдә мәнбәјә истинад лазымдыр
